17 ءساۋىر 2019, 23:19 1036 0 قوعام دينارا مىڭجاسارقىزى

اشىمباەۆ ەقىۇ-نىڭ سايلاۋ جونىندەگى كەڭەسشىلەرىمەن كەزدەستى

بۇگىن Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ەۋروپاداعى قاۋىپسىزدىك جانە ىنتىماقتاستىق ۇيىمى دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ سايلاۋ جونىندەگى كەڭەسشىلەرى راديۆويا گرۋيچ جانە ۆلاديمير ميسەۆپەن، سونداي-اق، ەقىۇ پارلامەنتتىك اسسامبلەياسىنىڭ وكىلى دميتري تودوريچپەن كەزدەستى. 

كەزدەسۋدە تاراپتار الداعى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا قاتىستى ماسەلەلەردى تالقىلادى.

ءسوز باسىندا Nur Otan پارتياسى توراعاسىنىڭ ءبىرىنشى ورىنباسارى قازاقستاننىڭ تاۋەلسىزدىكتىڭ العاشقى جىلدارىنان باستاپ ەقىۇ-نىڭ حالىقارالىق قاۋىپسىزدىكتى ساقتاۋ، بەيبىتشىلىكتى قامتاماسىز ەتۋ، ادام قۇقىقتارىن قورعاۋ جانە دەموكراتيالىق تەتىكتەردى ىلگەرىلەتۋگە باعىتتالعان ساياساتىن قولداپ كەلە جاتقانىن ايتتى. سونداي-اق ول قازىرگى تاڭدا قازاقستان مەن ەقىۇ اراسىنداعى قارىم-قاتىناستىڭ كۇشەيە تۇسكەنىنە نازار اۋداردى.

«قازاقستاننىڭ ەقىۇ-مەن ىنتىماقتاستىعى ەلىمىزدىڭ وسى ۇيىمعا توراعالىق ەتكەن كەزەڭىندە بۇرىنعىدان دا نىعايا ءتۇستى. سول كەزدە قابىلدانعان استانا دەكلاراتسياسى ۇيىمنىڭ دامۋىنا تىڭ سەرپىن بەرگەن ماڭىزدى قۇجات بولدى»، - دەپ اتاپ ءوتتى ماۋلەن اشىمباەۆ.

سونىمەن قاتار، ول ەقىۇ-نىڭ بارلىق ستاندارتتارى قازاقستاننىڭ مەملەكەتتىك باعدارلامالارى ءۇشىن نەگىزگى باعدار بولىپ سانالاتىنىن تىلگە تيەك ەتتى. ونىڭ ايتۋىنشا، قازاقستان ءۇشىن ەقىۇ-مەن، ۇيىمنىڭ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىمەن جانە باسقا دا قۇرىلىمدارىمەن ىنتىماقتاستىقتى ودان ءارى نىعايتۋ اسا ماڭىزدى. سوندىقتان پارتيا توراعاسىنىڭ ءبىرىنشى ورىنباسارى الداعى ۋاقىتتا ەكىجاقتى قارىم-قاتىناستىڭ دامي تۇسەتىنىنە سەنىم ءبىلدىردى.

بۇدان باسقا ماۋلەن اشىمباەۆ ءدال قازىر قازاقستاندىقتاردىڭ تاريحي كەزەڭدى باستان وتكەرىپ جاتقانىنا نازار اۋدارىپ، نۇرسۇلتان ءابىشۇلى نازارباەۆ قازاقستان پرەزيدەنتى رەتىندەگى وكىلەتتىگىن توقتاتقانىمەن، Nur Otan پارتياسىنىڭ توراعاسى بولىپ قالا بەرەتىنىن جەتكىزدى.

«ءبىزدىڭ پارتيا ەلباسىمىز ايقىنداپ بەرگەن ەلىمىزدىڭ بارلىق ستراتەگيالىق ماقساتتارىنا قول جەتكىزۋ جولىنداعى جۇمىستارىن جالعاستىرا بەرەدى. سوندىقتان الداعى پرەزيدەنت سايلاۋىنا بەلسەندى تۇردە قاتىسامىز. كەلەسى اپتادا وتەتىن پارتيانىڭ كەزەكتەن تىس XIX سەزىندە سايلاۋعا قاتىساتىن كانديداتىمىزدى ۇسىنامىز. Nur Otan سايلاۋدىڭ اشىق ءارى ءادىل وتۋىنە جانە بارلىق دەموكراتيالىق نورمالاردىڭ ساقتالۋىنا مۇددەلى. ويتكەنى بۇل بيلىك ساباقتاستىعىن قامتاماسىز ەتەتىن تەتىكتەردىڭ ءبىرى بولىپ سانالادى»، - دەدى ماۋلەن اشىمباەۆ.

سونىمەن بىرگە، Nur Otan پارتياسى توراعاسىنىڭ ءبىرىنشى ورىنباسارى سايلاۋالدى ۇگىت-ناسيحات جۇمىستارى قازاقستان رەسپۋبليكاسىنىڭ سايلاۋ تۋرالى زاڭىنا جانە حالىقارالىق تالاپتارعا سايكەس جۇرگىزىلەتىنىن ايتىپ، پارتيانىڭ بۇل ىستە حالىقارالىق باقىلاۋشىلارمەن بىرلەسىپ جۇمىس ىستەۋگە دايىن ەكەنىن جەتكىزدى.

ءوز كەزەگىندە ەقىۇ دەموكراتيالىق ينستيتۋتتار جانە ادام قۇقىقتارى جونىندەگى بيۋروسىنىڭ سايلاۋ جونىندەگى كەڭەسشىسى راديۆويا گرۋيچ ەلىمىزگە قازاقستاننىڭ سىرتقى ىستەر مينيسترلىگىنىڭ ۇسىنىسى بويىنشا كەلگەندەرىن ايتتى.

«ءبىز مۇندا سايلاۋعا قاتىستى كەيبىر تالاپتارعا باعالاۋ جۇمىستارىن جۇرگىزىپ، الداعى ساياسي ناۋقانعا دايىندىقتىڭ قازىرگى دەڭگەيىن باعامدايمىز. سونداي-اق ۇيىمنىڭ اتىنان سايلاۋعا باقىلاۋشىلار جىبەرۋ ءىسىن پىسىقتاپ، قازاقستاننىڭ بىرقاتار مەملەكەتتىك ورگاندارىمەن، بۇقارالىق اقپارات قۇرالدارىمەن جانە ساياسي پارتيا وكىلدەرىمەن كەزدەسۋلەر وتكىزەمىز»، - دەدى راديۆويا گرۋيچ.

سونداي-اق، ەقىۇ وكىلى الداعى ۋاقىتتا Nur Otan پارتياسىنىڭ جۇمىسى قاي باعىتتا ءوربيتىنىن سۇرادى. بۇل ساۋالعا جاۋاپ بەرگەن پارتيا توراعاسىنىڭ ءبىرىنشى ورىنباسارى ەڭ الدىمەن Nur Otan قازاقستاننىڭ تۇڭعىش پرەزيدەنتىنىڭ ساياساتىن ءارى قاراي جالعاستىرىپ، بيلىك ساباقتاستىعىنىڭ بەيبىت جولمەن جۇرگىزىلۋىنە باسىمدىق بەرەتىنىن ايتتى.

«ەلباسى ساياساتىنىڭ نەگىزىندە ەل دامۋىنىڭ نەگىزگى باسىمدىقتارى انىق كورسەتىلگەن. ءبىرىنشى باسىمدىق – نارىقتىق ەكونوميكانى دامىتۋ. قازىردىڭ وزىندە ءبىز بۇل باعىتتا كوپتەگەن جەتىستىكتەرگە قول جەتكىزدىك. ەكىنشى باسىمدىق – الەۋمەتتىك ساياسات. تۇڭعىش پرەزيدەنتىمىز ۇنەمى وسى سالاعا ايرىقشا ءمان بەرىپ، حالىقتىڭ ءال-اۋقاتىن ارتتىرۋعا ارنالعان ەلىمىزدىڭ الەۋمەتتىك دوكتريناسىن قالىپتاستىرىپ بەردى. ءۇشىنشى باسىمدىق – ەلىمىزدە بەيبىتشىلىك پەن كەلىسىمدى قامتاماسىز ەتۋ. بۇل – كوپۇلتتى جانە گەوساياسي جاعدايى كۇردەلى قازاقستان ءۇشىن اسا ماڭىزدى سالا. كەلەسى باسىمدىق – ەلىمىزدىڭ كوپۆەكتورلى سىرتقى ساياساتىن جۇيەلى تۇردە جۇرگىزۋ. پارتيامىز ەلباسى انىقتاپ بەرگەن وسىنداي باسىمدىقتاردى ءارى قاراي جالعاستىرىپ، ولاردىڭ ساقتالۋى ءۇشىن جۇمىس ىستەيدى»، - دەدى ماۋلەن اشىمباەۆ.

سونىمەن قاتار، ول قازاقستاننىڭ الدىندا تۇرعان باستى ماقسات – الەنىڭ ەڭ دامىعان 30 ەلىنىڭ قاتارىنا قوسىلۋ ەكەنىنە نازار اۋدارىپ، بۇل پارتيا جۇمىسىنىڭ دا نەگىزگى باسىمدىعى بولىپ قالا بەرەتىنىن ايتتى.

«ەڭ دامىعان ەلدەرمەن بىرگە ەكونوميكالىق ىنتىماقتاستىق جانە دامۋ ۇيىمى ەلدەرىنىڭ قاتارىنا قوسىلۋ دا ەلىمىزدىڭ نەگىزگى ماقساتتارىنىڭ ءبىرى. وسى باعىتتاعى باسىمدىقتار پارتيانىڭ جاڭا باعدارلاماسىندا انىق كورسەتىلگەن. اتالعان مىندەتتەر ءبىزدىڭ سايلاۋالدى ناۋقان كەزىندەگى جۇمىسىمىزدا دا باستى نازاردا بولادى»، - دەدى Nur Otan پارتياسى توراعاسىنىڭ ءبىرىنشى ورىنباسارى.

ايتا كەتەيىك، ەۋروپاداعى قاۋىپسىزدىك جانە ىنتىماقتاستىق ۇيىمى ساياسي ديالوگقا ارنالعان حالىقارالىق ۇيىم. نەگىزگى ماقساتى – جەتىلدىرىلگەن باسقارۋ مەن دەموكراتيالىق ءۇردىس نەگىزىندەگى ايماقتىق تىنىشتىق پەن قاۋىپسىزدىكتى قامتاماسىز ەتۋ. ۇيىمنىڭ قۇرامىندا از ۇلتتاردىڭ ءىسى جونىندەگى 9 جوعارعى كوميسسار، دەموكراتيالىق ينستيتۋتتار مەن ادام قۇقىقتارى جونىندەگى بيۋرو جانە پارلامەنتتىك اسسامبلەيا بار. قازاقستان بۇل ۇيىمعا 1992 جىلى مۇشە بولدى. ال 2010 جىلى ەلىمىز ۇيىمعا توراعالىق ەتىپ، الەمدىك دەڭگەيدەگى وزەكتى ماسەلەلەردىڭ وڭ شەشىلۋىنە ءوز ىقپالىن تيگىزدى.

سوڭعى جاڭالىقتار