16 ءساۋىر 2019, 13:07 725 0 قوعام Túrkistan Gazeti

پاۆلوداردا وليمپيادا باستالدى!

پاۆلوداردا 17 جوو-نان كەلگەن جۋرناليستيكا ماماندىعىنىڭ ستۋدەنتتەرى باس قوستى. بولاشاق جۋرناليستتەر رەسپۋبليكادا 11-ءىنشى رەت وتكىزىلىپ وتىرعان پاندىك وليمپياداسىنا قاتىسۋعا كەلدى. سايىستىڭ وتكىزىلۋ ماقساتى: جان جاقتان جينالعان ستۋدەنتتەرگە ءبىر-بىرىمەن تاجىريبە الماسۋعا مۇمكىندىك بەرەدى.

جىل سايىنعى داستۇرگە اينالعان سايىستىڭ ەرەجەلەرى بۇل جولى كۇردەلەنە ءتۇستى. جاڭا ءبولىم: ەرتىس-بايان ولكەسى جايلى ءوز اسەرلەرىمىزبەن بولىسەتىن بەينەسيۋجەت دايىنداۋ قاجەت.

سايىستىڭ العاشقى كۇنىن قاتىسۋشىلاردىڭ دايىن سيۋجەت تانىستىرۋلارى مەن جۋرناليست شەبەرلىگىن كورسەتەتىن ەسسە جازۋدان باستادىق. ازداعان ۇزىلىستەن سوڭ كەلگەن قالا قوناقتارىن پاۆلودار قالاسىنا ەكسكۋرسياعا الىپ شىقتى. ەكسكۋرسيا بارىسىندا كۋتۋزوۆ پەن لەرمونتوۆ كوشەلەرىنىڭ قيىلىسىندا ورنالاسقان مەملەكەتتىك رامىزدەر پاركىنە باردىق. وندا ەگەمەندىكتىڭ سيمۆولى تۋ، ەلتاڭبا جانە ءانۇران بار. پارك قازاقستان تاۋەلسىزدىگىنىڭ 20 جىلدىعىنا ارناپ سالىنعان. كەيىن سۇلتانماحمۇت تورايعىروۆ ەسكەرتكىشىنە باردىق. ءمۇسىن اۆتورى ەسحان سەرگەباەۆ اقىندى اسا شەبەرلىكپەن قيالشىل جاس كەيپىندە كوركەم بەينەلەگەن. ءماشھۇر ءجۇسىپ كوپەەۆ اتىنداعى مەشىتكە دە اياق باستىق. مەشىت قالا ورتالىعىندا ورنالاسقان. ارحيتەكتۋراسى كەسەنەگە ۇقساس عيماراتتىڭ 4 مۇناراسى بار. اسپانمەن تالاسقان مۇنارالاردىڭ بيىكتىگى پايعامبار جاسىنا وراي 63 مەتر ەكەن. 3 قاباتتى عيماراتتا اسحانا، مۇراجاي، كىتاپحانا، يسلام ءدىنىن ناسيحاتتايتىن بەينەزال، نەكە قيۋ بولمەسى بار. مەشىتكە كىرگەن كەزدە بىردەن كوزگە تۇسەتىن ۇلكەن زالداعى گاۋھار تاستى شامنىڭ سالماعى 3.5 توننا، بيىكتىگى 16,5, ەنى 6 م. دەشتى قىپشاق ساۋلەت ستيلندە 8 قابىرعالى قىلىپ سالىنعان مەشىتتىڭ ءىشى قازاقى ويۋلارمەن كومكەرىلگەن. ۇلكەن عيبادات ۇيىندە ءبىر مەزەتتە 1500 ادامنىڭ نامازعا جىعىلۋعا مۇمكىندىكتەرى بار. سوڭعى نۇكتەمىز بۇقار جىراۋ اتىنداعى ادەبيەت جانە ونەر مۇراجايىنا بولدى. 1992 جىلى ۇلىستىڭ ۇلى كۇنىندە اشىلعان مۋزەيگە بۇقار جىراۋدىڭ 325 جىلدىعىنا وراي ەسىمى بەرىلگەن. ەرەكشە ديزاينمەن سالىنعان قىزىل عيمارات قالا ورتالىعىندا ورنالاسقان. مۇراجاي حالىق اۋىز ادەبيەتى، كونە تۇرىك جازبا ادەبيەتى، بۇقار جىراۋ قالقامانۇلىنىڭ شىعارماشىلىعى، حح عاسىر باسىنداعى ادەبيەت، ادەبيەتتەر دوستاستىعى جانە قازىرگى زامان ادەبيەتى زالى سياقتى 6 زالدان تۇرادى. سونىمەن قاتار، قولدانىسقا جاستار جىلىنا بايلانىستى ونەر زالى بەرىلمەكشى. سونداي-اق، مۇراجاي ورتاسىندا قانىش ساتپاەۆتىڭ 125 جىلدىعىنا وراي ەڭبەكتەر جيناعى توپتاستىرىلعان. مۋزەيدە 46 مىڭنان استام جادىگەرلەر بار. ولاردىڭ ىشىندە باسىم كوپشىلىگى ولكە جازۋشىلارى مەن اقىندارىنىڭ مۇرالارى. تاريح سىرىنا تولى مۇراجاي ءوزىنىڭ ۇيلەسىمدىلىگىمەن، تاربيەگە باي ماعلۇماتتارىمەن ەسىمىزدە قالدى.ۋنيۆەرسيتەت اكت زالىندا وتكەن «قىز جىبەك» كلۋبىنىڭ «جاتاقحانا ءومىرناماسى» اتتى قويىلىمىن تاماشالاپ تارقاستىق.

وليمپيادانىڭ ەكىنشى كەزەڭى تەستىلەۋدەن باستالىپ، قازىرگى ۋاقىتتا «جەدەل اقپارات» بولىمىمەن جالعاسىن تابۋدا. جالپى، 15-16 ءساۋىر ارالىعىندا ءوتىپ جاتقان وليمپياداعا ءبىز اتىراۋ قالاسىنىڭ نامىسىن قورعاۋعا كەلدىك.

اتىراۋلىق Batyspear كومانداسى

سوڭعى جاڭالىقتار