16 ءساۋىر, 11:30 478 0 ءبىلىم TURKYSTAN.KZ

جۇيرىكتەر سىنعا ءتۇستى

16 ءcاۋىر – «TÚRKISTAN» weekly.  پاۆلودار قالاسى س.تورايعىروۆ اتىنداعى پاۆلودار مەملەكەتتىك ۋنيۆەرسيتەتىندە 15-16 ساۋىردە جۋرناليستيكا ماماندىعى بويىنشا رەسپۋبيكالىق پاندىك وليمپيادا وتۋدە. بۇل شارا بيىل XI رەت ۇيىمداستىرىلىپ وتىر.

 

العاشقى «تانىستىرۋ» كەزەڭىندە ءار وڭىردەن كەلگەن جاس جۋرناليستەر «ۇلى دالا ۇلاعاتى» تاقىرىبى اياسىندا ۆيدەو سيۋجەتتەرىن كورسەتتى. كەلەسى كەزەڭدە قاتىسۋشىلار ءار ءتۇرلى تانىمدىق تاقىرىپتارعا سايكەس ەسسە جازىپ، جازۋ قابىلەتتەرىن كورسەتتى.

 

ەكىنشى كۇنى «قازاق جۋرناليستيكاسىنىڭ تاريحى»، «جاڭا مەديا جانە ينتەرنەت جۋرناليستيكا»، «تەلەراديوجۋرناليستيكا» پاندەرى بويىنشا تەستەن ءوتىپ، بىلىمدەرى مەن بىلىكتىلىكتەرىن تانىتتى.

رەسپۋبليكالىق ءپان وليمپياداسىنىڭ ماقساتى – جاس جۋرناليستەردىڭ تاجىريبە الماسىپ، تانىمىن كەڭەيتىپ، شەبەرلىگىن ارتتىرۋ. جۋرناليستىك قابىلەت-قارىمدى ايقىنداپ، وتاندىق باق-تى الەمدىك دەڭگەيگە كوتەرۋ.

«پاندىك وليمپيادا وتە تارتىستى باسەكە ەكەنىن بۇرىن بىلمەگەن ەكەنمىن. جان-جاقتان كەلگەن قاتىسۋشىلاردىڭ ءبىلىمى مەن تاجىريبەلەرىمەن تانىسىپ، پىكىر الماسۋدامىز. شارانىڭ ۇيىمداستىرۋشىلارىنا زور العىس بىلدىرەمىز»، - دەدى ءال-فارابي اتىنداعى قازۇۋ ستۋدەنتى حالىق بالجان.

رەسپۋبليكالىق ءپان وليمپياداسىنىڭ جەڭىمپازدارى كوماندالىق ەسەپتە انىقتالادى. جەڭىمپازدار قر ءبىلىم جانە عىلىم ءمينيسترىنىڭ جانە س.تورايعىروۆ اتىنداعى پاۆلودار مەملەكەتتىك ۋنيۆەرسيتەتى رەكتورىنىڭ ديپلومدارىمەن ماراپاتتالادى.

نازىم سامەت

سوڭعى جاڭالىقتار