11 ءساۋىر 2019, 16:38 616 0 زاڭ احمەت ومىرزاق

ءبىر كۇندە 133 سالىق ينسپەكتورى جۇمىستان قۋىلدى

وزبەكستان:

قوعامداعى جەمقورلىق ىندەتىمەن كۇرەس وڭاي ەمەس. ساناسىن پاراقورلىق كەسەلى مەڭدەتكەندەردى اقىلعا شاقىرىپ، دۇرىس ادامنىڭ قاتارىنا قوسۋدان اسقان قيىندىق جوق. سودان بولار، كەي ەلدەردە كىسىنىڭ قالتاسىنا كوز سالعىشتاردى قاتال جازالايدى.

وسىدان ون بەس جىل بۇرىن گرۋزيانىڭ پرەزيدەنتى بولىپ سايلانعان ميحايل سااكاشۆيلي بيلىككە كەلۋدەن ەلدىڭ ىشكى ىستەر ورگانى قىزمەتكەرلەرىن تۇگەلگە جۋىق جۇمىستان قۋىپ، الەمدى ايران-اسىر قالدىرعان ەدى. بىراق ونىڭ بۇل قادامىنىڭ ەلدەگى جەمقورلىقتى جويۋ جولىنداعى باتىل قادامى ەكەنىن بىلگەننەن كەيىن، جۇرت گرۋزيندەر باسشىسىنىڭ ول شەشىمىن قولداپ، وزگە ەلدەر وزىنە ۇلگى تۇتا سويلەگەنى بار ەدى.

مىنە وسىعان ۇقساس ءبىر وقيعا وتكەن اپتادا وزبەك ەلىندە دە بولىپ، جۇرتتىڭ نازارىن اۋداردى. وزبەكستان مەملەكەتتىك سالىق ينسپەكتسياسىنىڭ تاراتقان اقپاراتىنا سايكەس، تاشكەنت قالاسى، شايحانتوحۋر اۋدانى مەملەكەتتىك سالىق ينسپەكتسياسىنىڭ 133 قىزمەتكەرى (ىشىندە اۋداندىق سالىق ينسپەكتسياسىنىڭ باسشىسى دا بار) ءبىر مەزگىلدە جۇمىستان بوساتىلعان.

سودان ءبىر كۇن بۇرىن وزبەكستان رەسپۋبليكاسىنىڭ پرەزيدەنتى شاۆكات ميرزيەەۆتىڭ بەينەسەلەكتور ارقىلى وتكىزگەن جينالىسىندا تاشكەنت قالاسىنداعى بىرقاتار مەملەكەتتىك سالىق ينسپەكتسيالارىنىڭ قۇرامىن جاڭالاۋ تۋرالى بۇيرىق بەرگەن كورىنەدى. جينالىستا پرەزيدەنت شاۆكات ميرزيەەۆ از عانا ۋاقىت ىشىندە مەملەكەت قازىناسىنا تۇسەر سالىق مولشەرىنىڭ مۇلدە ازايىپ كەتكەنىن ايتىپ، سوڭعى كەزدە سالىق قىزمەتكەرلەرىنىڭ جۇمىسىنىڭ قوجىراپ كەتكەنىن سىناعان ەكەن.

وزبەكستان مەملەكەتتىك سالىق ينسپەكتسياسىنىڭ مالىمدەۋىنشە، تاشكەنت قالاسى، شايحانتوحۋر اۋداندىق سالىق ءبولىمىنىڭ تۇگەلگە جۋىق قىزمەتكەرى جانە ميروبود، ميرزو ۋلۋعبەك، ۋچتەپا، سەرگەلي، يۋنۋسوبود، بەكتەمير اۋداندارىنىڭ سالىق ينسپەكتسياسى باسشىلارى «ءوز ارىزدارى نەگىزىندە» جۇمىستان بوساتىلعان.

قالاي دەگەندە دە وزبەكستان باسشىلىعىنىڭ بۇل قادامى مەملەكەتتىك قىزمەتكەرلەردىڭ جۇمىسىن شيراتۋ ءۇشىن عانا ەمەس، سونىمەن بىرگە ەلدىڭ جەمقورلىققا قارسى كۇرەستى كۇشەيتۋ ماقساتىندا جاسالعانىنا كۇمان جوق.

احمەت جۇماعاليۇلى

سوڭعى جاڭالىقتار