11 ءساۋىر 2019, 14:03 1519 0 سىرتقى ساياسات احمەت ومىرزاق

ۇلجان – وزبەك ەلىندە وتكەن جىرشىلار فەستيۆالىنىڭ باس جۇلدەسىن الدى

ورتالىق ازيا ەلدەرى تاۋەلسىزدىگىن العالى بەرى ۇلتتىق ونەردى قايتا جاڭعىرتىپ، ۇلتتىق مۋزىكا مادەنيەتىن دامىتۋعا جاڭاشا سەرپىن بەرۋ ماقساتىندا كوپتەگەن مادەني شارالار ۇيىمداستىرىپ كەلەدى. بۇعان ەلىمىزدە جانە كورشى ءتۇبى ءبىر تۇركى ەلدەرىندە بولىپ جاتقان ءتۇرلى ءىس-شارالار دالەل.

وزگەلەرمەن بىرگە بۇل ۇردىسكە وزىنشە وزبەك ەلى دە ۇلەس قوسىپ كەلەدى. ماسەلەن بۇدان كوپ جىل بۇرىن تۇركىلىك عانا ەمەس، جالپى شىعىس حالىقتارىنا ارنالىپ، سامارقاند قالاسىندا ۇيىمداستىرىلىپ كەلگەن «شارح تارونالاري» (شىعىس سازدارى) اتتى ونەر فەستيۆالى ءبىراز جىل بويى تۇراقتى تۇردە وتكىزىلگەن-ءدى. ەندى سوعان جاڭاشا ءوڭ بەرىپ، وزبەك ەلى بيىلدان باستاپ حالىقارالىق جىرشىلىق ونەرى فەستيۆالىن وتكىزۋدى باستادى.

2018 جىلدىڭ 1 قاراشاسىندا وزبەكستان پرەزيدەنتى شاۆكات ميرزيەەۆتىڭ بۇيرىعىمەن «حالىقارالىق باقسىلىق (جىرشىلىق) ونەر فەستيۆالىن وتكىزۋ» تۋرالى قارار قابىلدانعان-دى. سول نەگىزدە وتەتىن العاشقى فەستيۆال وتكەن اپتادا باستالدى.

تەرمەز قالاسىندا وسى جىلدىڭ بەسىنشى ساۋىرىندە اشىلىپ، بەس كۇنگە سوزىلاتىن العاشقى فەستيۆالعا 74 مەملەكەتتەن 160-تان اسا ونەر يەلەرى قاتىستى. بۇل مارتەبەلى ونەر دوداسىندا سىر بويى جىراۋلىق مەكتەبىنىڭ وكىلى، اتاقتى بيداس رۇستەمبەكوۆتىڭ شاكىرتى، جىراۋ ۇلجان بايبوسىنوۆا باس جۇلدە الىپ، ۇلتتىق ونەرىمىزدىڭ ابىرويىن اسقاقتاتتى.

احمەت جۇماعاليۇلى

سوڭعى جاڭالىقتار