11 ءساۋىر 2019, 13:50 777 0 تايقازان اياۋلىم سالىقجانوۆا

الەمدىك باسپاسوزگە شولۋ

قازاقستانداعى كەزەكتەن تىس پرەزيدەنت سايلاۋى:

1tv.ru (رەسەي): قازاقستانداعى پرەزيدەنت سايلاۋى 2020 جىلعى جەلتوقساندا ءوتۋى كەرەك بولاتىن. ياعني، توقاەۆتىڭ كەم دەگەندە تاعى ءبىر جىل ۋاقىتى بولدى، بىراق ول پرەزيدەنت مەرزىمىنەن بۇرىن سايلانۋى قاجەت دەپ شەشتى. قاسىم-جومارت توقاەۆ بۇل شەشىمىن «ەلدەگى قوعامدىق-ساياسي كەلىسىمدى قامتاماسىز ەتىپ، العا باسۋ ءۇشىن، الەۋمەتتىك-ەكونوميكالىق ماقسات-مىندەتتەردى لايىقتى جۇزەگە اسىرۋ ءۇشىن بىزگە ايقىندىق قاجەت» – دەۋىمەن ءتۇسىندىردى.

ۇندەۋدە پرەزيدەنت ەكى تىلدە – قازاق جانە ورىس تىلدەرىندە سويلەدى.

Hurriyetdailynews.com (تۇركيا):

78 جاستاعى نازارباەۆ 18 ميلليون ادام تۇراتىن ەلدە «ۇلت كوشباسشىسى»، قاۋىپسىزدىك كەڭەسىنىڭ توراعاسى جانە «نۇر وتان» پارتياسىنىڭ جەتەكشىسى رەتىندە كەڭ وكىلەتتىگىن ساقتاپ قالدى. ساراپشىلاردىڭ ايتۋىنشا، ونىڭ كەلەسى پرەزيدەنت كانديتۋراسىن قولداۋى داۋىس بەرۋدىڭ شەشۋشى فاكتورى بولادى.

Euronews (ەۋروپا، شتاب پاتەرى – فرانتسيا): قازاقستانداعى كەزەكتەن تىس سايلاۋ. مەملەكەت باسشىسىنىڭ مىندەتىن اتقارۋشى قاسىم-جومارت توقاەۆ بۇل شەشىمدى پارلامەنت سپيكەرلەرىمەن جانە بۇرىنعى پرەزيدەنت نۇرسۇلتان نازارباەۆپەن كەڭەسكەننەن كەيىن قابىلداعانىن ايتتى.

«كەزەكتەن تىس سايلاۋ تۋرالى شەشىم ماڭىزدى جانە اسا قاجەت. ەلباسىمىزدىڭ ارقاسىندا ءبىز الەمدەگى تابىستى، بەدەلدى مەملەكەت قۇردىق. قازاقستان حالىقارالىق قوعامداستىقتا لايىقتى ورىنعا يە بولدى. ءبىزدىڭ ەلىمىزبەن بۇكىل الەم ساناسادى»، – دەدى ول حالىققا جولداعان ۇندەۋىندە.

ال الماتى تۇرعىندارى توقاەۆتى نازارباەۆتىڭ مۇراگەرى دەپ سانايدى:

– مەن ءوزىمنىڭ داۋىسىمدى قاسىم-جومارت توقاەۆقا بەرەمىن. مەن ءبىرىنشى پرەزيدەنتتىڭ تاڭداۋىنا تولىق سەنەمىن جانە قاسىم-جومارت توقاەۆتى لايىقتى كانديدات دەپ ويلايمىن.

– مەن سايلاۋعا كىمدەردىڭ تۇسەتىنىن بىلمەيمىن. بىراق وتكەن زاماننىڭ ادامدارى سايلاۋعا تۇسكەنىن قالامايمىن. ولار جاسارىن جاسادى عوي.

– نەگىزىندە مۇندا ناتيجە ايقىن، كوپتەگەن ادامدار كەلەسى پرەزيدەنتتىڭ كىم بولاتىنىن بىلەدى.

voanews.com (اقش): قازاقستان پرەزيدەنتى قاسىم-جومارت توقاەۆ سەيسەنبىدە پرەزيدەنت سايلاۋىن مەرزىمىنەن بۇرىن ماۋسىم ايىندا وتكىزەتىنىن مالىمدەدى. ورتالىق ازيا مەملەكەتى ەلدى ۇزاق ۋاقىت بويى باسقارىپ كەلگەن نازارباەۆتىڭ كۇتپەگەن جەردەن ءوز ەركىمەن وتستاۆكاعا كەتكەنىنەن كەيىن جاڭا كوشباسشى ىزدەۋدە.

«مۇنداي شەشىم تەك حالىقتىڭ تىكەلەي ەركىمەن سايلاۋدا قابىلدانۋى قاجەت. قازاقستان – دەموكراتيالىق مەملەكەت. پرەزيدەنت حالىقتىڭ تاڭداۋىمەن سايلانادى. مەن، مەملەكەت باسشىسى رەتىندە، سايلاۋدىڭ تازا، اشىق ءارى ءادىل وتۋىنە كەپىلدىك بەرەمىن! بۇل – مەنىڭ بەرىك ۇستانىمىم!»، – دەدى توقاەۆ ۇندەۋ بارىسىندا.

دەسە دە، توقاەۆ پرەزيدەنت سايلاۋىنا ءوزىنىڭ قاتىساتىنىن، نە قاتىسپايتىنىن اشىپ ايتقان جوق. بىراق ساياساتتانۋشىلاردىڭ كوبى ونى، كەم دەگەندە، قىسقا مەرزىم ارالىعىنداعى نازارباەۆتىڭ مۇراگەرى رەتىندە تانيدى.

        اۋدارعان  اياۋلىم باقىتقىزى

سوڭعى جاڭالىقتار