5 ءساۋىر 2019, 11:36 791 0 سپورت Túrkistan Gazeti

زىلتەمىرشىلەرگە ارتىلعان ءۇمىت

قازاقستان اۋىر اتلەت مايتالماندارىنىڭ الەم سپورتىندا الاتىن ورنى ەرەكشە. وسىنى ەسكەرسە كەرەك، قازاقستان رەسپۋبليكاسىنىڭ اۋىر اتلەتيكا فەدەراتسياسى جاس اتلەتتەردى قولداۋعا باعىتتالعان «جاس قۋات» باعدارلاماسىن باستادى.

اتالمىش باعدارلاما Rompetrol كومپانياسىنىڭ قولداۋىمەن جۇزەگە اساتىن بولادى. جوبا اياسىندا كەلەشەگىنەن ءۇمىت كۇتتىرەتىن، جاسى 20-عا دەيىنگى اتلەتتەر ءبىر جىل بويى ارنايى شاكىرتاقى الىپ وتىرادى. بۇدان بولەك، «جاس قۋات» باعدارلاماسى بويىنشا ايماقتىق سپورتتىق مەكەمەلەردەگى اۋىر اتلەتيكا سەكتسيالارىنا جوندەۋ جۇرگىزىلىپ، ماتەريالدىق-تەحنيكالىق بازا كۇشەيتىلمەك.

قازىرگى ۋاقىتتا فەدەراتسيا كەڭەسىنىڭ باپكەرلەرى شاكىرتاقىدان ءۇمىت ەتە الاتىن سپورتشىلاردىڭ ىرىكتەلۋ تالابىن ازىرلەگەن. وعان سايكەس، مىندەتتى تۇردە «سپورت شەبەرىنە ۇمىتكەر» سپورتتىق دارەجەسى بولۋى كەرەك. سونىمەن بىرگە، دوپينگكە قاتىستى داۋى بولماۋى ءتيىس.

«وڭىرلەردەگى جاس اتلەتتەردى قولداۋ يدەياسى باياعىدان بار ەدى. ونىڭ ۇستىنە بيىلعى جىلدى ەلباسى نۇرسۇلتان نازارباەۆتىڭ جاستار جىلى دەپ جاريالاعانى بەلگىلى. ءبىز ايماقتاردان ۇزدىك دەگەن 85 اتلەتتى تاڭداپ الۋدى كوزدەپ وتىرمىز. ولاردىڭ ءبارى دە فەدەراتسيادان جىل بويى شاكىرتاقى الاتىن بولادى. ءبىزدىڭ جاستار ءۇشىن بۇل ايتارلىقتاي قولداۋ جانە جىگەرلەندىرۋ تەتىگى بولماق. كەلەشەكتە شاكىرتاقى يەگەرلەرى ەلىمىزدىڭ اتىن الەمگە پاش ەتەرىنە سەنىم زور. جاقىندا عانا لاس ۆەگاستا جاسوسپىرىمدەر اراسىنداعى الەم چەمپيوناتىندا جارقىراعان جاستارىمىز سەكىلدى جاس اتلەتتەرگە ءۇمىت ارتامىز»، – دەيدى فەدەراتسيانىڭ اتقارۋشى ديرەكتورى الديار نۇرالينوۆ.

ەسكە سالا كەتسەك، وتكەن ايدا لاس-ۆەگاستا اۋىر اتلەتيكادان جاسوسپىرىمدەر اراسىندا وتكەن Əلەم چەمپيوناتىندا قازاقستاندىق 5 زىلتەمىرشى بەس التىن مەدال العان بولاتىن.

 

 

سوڭعى جاڭالىقتار