4 ءساۋىر 2019, 11:15 858 0 ىشكى ساياسات دينارا مىڭجاسارقىزى

اكىمدەردىڭ وفلايننان ونلاينعا ۇمتىلىسى

جاقىندا مەملەكەت باسشىسى قاسىم-جومارت توقاەۆ ءوڭىر اكىمدەرىنىڭ حالىقپەن ۇنەمى كەزدەسۋگە جانە ەلدى مەكەندەردى ءجيى ارالاۋعا ءتيىس ەكەنىن ايتتى. سونداي-اق، ول اكىمدەردىڭ حالىق الدىندا ەسەپ بەرۋىن كوزبوياۋشىلىققا تەڭەدى. ق.توقاەۆتىڭ ايتۋىنشا، بۇدان بىلاي شەنەۋنىكتەردىڭ ۇستىنەن حالىق تاراپىنان شاعىم تۇسسە، ول ماسەلە ءجىتى قارالىپ، مەملەكەتتىك قىزمەتكەر مىندەتتى تۇردە جاۋاپقا تارتىلاتىن بولادى. 

«ورتالىق جانە جەرگىلىكتى ورگانداردىڭ باسشىلارىنا قاتىستى ورىندى شاعىم تۇسكەن جاعدايدا ولاردىڭ ءبارى جازالاناتىن بولادى. سوندىقتان باسشىلار حالىقپەن تىعىز قارىم-قاتىناستا جۇمىس ىستەۋى قاجەت. جىلىنا ءبىر رەت ۇيىمداستىرىلاتىن ەسەپ بەرۋ كەزدەسۋلەرى – كوزبوياۋشىلىق. حالىقپەن كۇن سايىن بىرگە بولىپ، قويان-قولتىق جۇمىس ىستەۋى كەرەك. وسى ماسەلەگە بايلانىستى بۇل سالادا كوپ جۇمىس ىستەلدى. ونى ءارى قاراي جانداندىرا ءتۇسۋ قاجەت. جەمقورلىقپەن كۇرەس كۇشەيە تۇسەدى»، – دەگەن مەملەكەت باسشىسى بارلىق دەڭگەيدەگى شەنەۋنىكتەردەن ادىلدىكتى تالاپ ەتتى. «قوعامداعى ادىلەتتىلىك، ەڭ الدىمەن، اتقارۋشى بيلىككە بايلانىستى. ۇكىمەتتىڭ، مينيسترلەردىڭ، بارلىق دەڭگەيدەگى اكىمدەردىڭ، پوليتسيانىڭ، پروكۋراتۋرانىڭ، سوتتاردىڭ باستى ماقساتى – ازاماتتاردىڭ قۇقىعىن قورعاۋ. بۇل – ولاردىڭ كونستيتۋتسيالىق مىندەتى ءارى ازاماتتىق بورىشى. مۇنداعى مەنىڭ باستى ۇستانىمىم انىق، ايقىن. بۇل – زاڭنىڭ ۇستەمدىگى. زاڭنان جوعارى ەشنارسە بولماۋى كەرەك»، – دەدى ول.

ەل پرەزيدەنتى بۇل ماسەلەگە «ەگەمەن قازاقستان» جانە «ايقىن» گازەتىنە بەرگەن سۇحباتىندا دا ورالعان. «كەيبىر شەنەۋنىكتەرگە قاراپايىمدىلىق، ادامي قارىم-قاتىناس جەتىسپەيدى. اكىمدەردىڭ ەسەپ بەرۋ فورماتىنىڭ ەسكىرگەنى، باياندامالارىنىڭ جاداعاي تسيفرلارعا قۇرىلاتىنى، شىن مانىندە حالىقتى جالىقتىردى جانە جۇرتشىلىقتىڭ سەنىمىنە سەلكەۋ تۇسىرەدى دەپ ويلايمىن. ءبىزدىڭ كەيبىر شەنەۋنىكتەرىمىزگە جەتپەي جاتاتىنى – قاراپايىمدىلىق، ادامي قارىم-قاتىناستار. «اكىم بول – حالقىڭا جاقىن بول» دەپ حالىق بەكەر ايتپايدى. ولارعا وسى ءسوز بويتۇمار بولۋى ءتيىس»، – دەدى مەملەكەت باسشىسى. سونداي-اق اكىمدەردى جيناعان كەڭەستە مۇنى ەسكەرتكەنىن، حالىقتىڭ سۇرانىسىنا جەدەل ءۇن قاتىپ، ماسەلەنى شۇعىل شەشۋ قاجەتتىگىن تاپسىرعانىن اتاپ ءوتتى. «حالىققا اشىق قىزمەت كورسەتۋگە قاجەتتى بارلىق كوممۋنيكاتسيالىق قۇرالداردى پايدالانا بىلگەن ءجون. سونىمەن بىرگە كەرى بايلانىس ورناتۋدىڭ پايداسى زور. وكىنىشكە قاراي، حالىقپەن توتە بايلانىس بارلىق جەردە بىردەي ەمەس، بايلانىس ورتالىقتارى ەلىمىزدەگى 17 اكىمدىكتىڭ تەك تورتەۋىندە، ال ءموبيلدى حالىقتىق باقىلاۋ 7 وڭىردە عانا بار. مۇنداي جاعدايدا اتقارۋشى بيلىك ەلدىڭ مۇڭ-مۇقتاجىنا دەر كەزىندە جاۋاپ قاتا المايدى. وسى ۋاقىتقا دەيىنگى وڭتايلى رەفورمالاردىڭ ءبارى جەرگىلىكتى جەرلەرگە كەلىپ تىرەلەدى. ەگەر حالىقپەن قويان-قولتىق جۇمىس اتقاراتىن بولسا، اكىمدىكتەر كوپتەگەن وزەكتى ماسەلەلەردى ءتيىستى دەڭگەيدە تەز شەشە الادى. بۇل ازاماتتاردىڭ بيلىك ينستيتۋتىنا دەگەن سەنىمىن ارتتىرادى. ءوڭىر اكىمدەرى حالىقپەن ەسەپتىك كەزدەسۋلەردە عانا ەمەس، تۇراقتى نەگىزدە كەزدەسىپ، بارلىق ەلدى مەكەندى ارالاۋعا ءتيىس»، – دەدى ق.توقاەۆ.

دەمەك، پرەزيدەنتتىڭ وسى تۇيتكىلدى قايتا-قايتا تىلگە تيەك ەتۋى بەكەر ەمەس. ءتىپتى، ول مەملەكەتتىك باسقارۋ اكادەمياسىنىڭ بازاسىندا ارناۋلى كۋرستار اشىپ، ولارعا حالىقپەن بەلسەندى قارىم-قاتىناس جاسايتىن شەنەۋنىكتەردى جىبەرۋ كەرەكتىگىن، اكىمدەرگە حالىقپەن قارىم-قاتىناستىڭ جاڭا فورماتىنا كوشۋدى، اشىق جانە شۇعىل ارەكەت ەتۋدى تاپسىرعانىن جانە بۇل اۋدانداردان باستاپ وبلىسقا دەيىنگى بارلىق دەڭگەيدەگى اكىمدەرگە قاتىستى ەكەنىن تەكتەن-تەك ايتپادى.

حالىققا جاقىن مينيستر ھام اكىم كىم؟

جالپى، حالىققا مينيستردەن گورى اكىم ءبىرتابان جاقىن دەسە بولادى. سوندىقتان دا رەيتينگ جاساۋشىلار كوبىنەسە اكىمدەرگە مويىن بۇرادى. دەسەك تە، مينيسترلەر حالىقپەن قارىم-قاتىناستى بلوگى ارقىلى ورناتۋىنا مۇمكىندىك بار. ءبىز مينيسترلەردىڭ سايتىنا كىرىپ، جۇرتتىڭ ساۋالىنا قانشالىقتى دەڭگەيدە جاۋاپ بەرەتىنىن كوردىك. ارينە، ساۋالدىڭ باسىم بولىگى ءبىلىم جانە عىلىم، مادەنيەت جانە سپورت، ەڭبەك جانە حالىقتى الەۋمەتتىك قورعاۋ، دەنساۋلىق ساقتاۋ مينيسترلەرىنە قويىلعان. كۇنىنە بىرنەشە سۇراق قويىلىپ جاتسا دا، جاۋاپسىز قالمايدى ەكەن. كوپشىلىكتى مازالاعان جايتتارعا مينيستردىڭ ءوزى جاۋاپ بەرە مە، الدە، سوعان تيەسىلى مامان بولىنگەن بە، ايتەۋىر جاۋاپسىز سۇراق جوق. ءبىر ايتا كەتەرلىگى، بەرىلگەن جاۋاپ تۇشىمدى، ناقتى ەمەس. بىلايشا ايتقاندا، «تيسە تەرەككە، تيمەسە بۇتاققا». تاعى ءبىر كوزگە تۇرپىدەي كورىنگەنى – جاڭالىقتار بولىمىندەگى اقپاراتتىڭ دەنى ورىس تىلىندەگى نۇسقادان سوزبە-ءسوز اۋدارىلعان. قازاق تىلىندەگى اقپاراتتى وقىساڭىز، گرامماتيكالىق، ستيليستيكالىق قاتەدەن كوز سۇرىنەدى.

الدىڭعى جىلى اقپارات جانە قوعامدىق دامۋ ءمينيسترى داۋرەن اباەۆ اقپارات قولجەتىمدىلىگىن قامتاماسىز ەتۋدە ۇزدىك ناتيجە كورسەتكەن، حالىققا جاقىن مەملەكەتتىك ورگانداردىڭ ينتەرنەت رەسۋرستارىن اتاعان ەدى. مينيسترلىك ارنايى مونيتورينگ جۇرگىزىپ، سونىڭ ناتيجەسىنە سايكەس، مەملەكەتتىك ورگاندار ىشىندە ەنەرگەتيكا مينيسترلىگى، ادىلەت مينيسترلىگى، ينۆەستيتسيالار جانە دامۋ مينيسترلىگى، دەنساۋلىق ساقتاۋ، ەڭبەك جانە حالىقتى الەۋمەتتىك قورعاۋ مينيسترلىگىنىڭ ينتەرنەت-رەسۋرستارى مەيلىنشە تولىق اقپاراتتارمەن قامتىلعانى انىقتالدى. ال جەرگىلىكتى اتقارۋ ورگاندارى مەن اكىمدىكتەر ىشىندە شىعىس قازاقستان، وڭتۇستىك قازاقستان مەن الماتى وبلىستارىنىڭ سايتتارى ۇزدىك دەپ تانىلدى.

سول سياقتى جىل سايىن اكىمدەردىڭ دە رەيتينگى جاڭارىپ وتىرادى. جۇمىسىن ىڭ-شىڭسىز اتقاراتىن، ءتىپتى، جۇرگەن-بارعان جەرىن فوتو-ەسەپ ارقىلى جارنامالايتىن اكىم دە بار. بىراق قايسىسى كوپشىلىككە تانىمال؟ ارينە، ەكىنشىسى. ال جارناماعا دا، ماقتاۋعا دا زارۋلىك تانىتپايتىن بىردەن-ءبىر ىسكەر ازامات اقتوبە وبلىسىنىڭ بۇرىنعى اكىمى بەردىبەك ساپارباەۆ ەكەنىن ايتا كەتكەن ءجون. ناعىز اكىم – حالىققا جاقىن اكىم. ول باسپاسوزگە بەرگەن سۇحباتتارىندا دا كابينەتتەن شىعىپ، ەلدىڭ اراسىندا جۇرگەندى ۇناتاتىنىن بۇكپەسىز ايتادى. شىنىندا، سولاي. كەز كەلگەن وقيعانىڭ باسى-قاسىنان تابىلىپ، ماسەلەنىڭ دەر كەزىندە شەشىمىن تابۋىنا ءوزى ۇيىتقى بولىپ جۇرگەنىن كوردىك تە.

شەنەۋنىكتەر جاپپاي الەۋمەتتىك جەلىگە تىركەلۋدە

ايتپاقشى، بۇعان دەيىن وبلىس، قالا، اۋدان اكىمدەرى حالىقپەن بايلانىسقا ينتەرنەت سايتتاعى بلوگى ارقىلى شىقسا، ەندى ارقايسىسى الەۋمەتتىك جەلىدەن اككاۋنت اشىپ، جۇمىسىن ناتيجەلى جۇرگىزۋ مىندەتتەلدى. بۇل ءۇردىستى سەنات توراعاسى كەزىندە باستاپ، تۆيتتەردەگى پاراقشاسىندا ءار ماسەلە جايىندا ويىن اشىق ءبىلدىرىپ وتىرعان مەملەكەت باسشىسى قاسىم-جومارت توقاەۆتىڭ ءوزى اكىمدەردىڭ الەۋمەتتىك جەلىلەردە بەلسەندى بولۋىن تاپسىرعان-دى.

ەلىمىزدىڭ استاناسى نۇر-سۇلتان قالاسىنىڭ اكىمى باقىت سۇلتانوۆ فەيسبۋك جەلىسىن 2012 جىلدان بەرى پايدالانادى. وندا سۇلتانوۆ ءوز قىزمەتىنە قاتىستى ماڭىزدى مالىمدەمەلەر مەن قۇتتىقتاۋلاردى جاريالاپ وتىرادى. جازبا استىنان وزگە جەلى قولدانۋشىلارىنىڭ قالدىرعان پىكىرىن كورۋگە بولادى. ازىرگە، استانا اكىمىنىڭ فەيسبۋكتە بەس مىڭ «دوسى» مەن ەكى مىڭعا جۋىق جازىلۋشىسى بار. «قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا بارلىق اۋدان اكىمدەرى مەن باسقارما باسشىلارى قالا تۇرعىندارىمەن تۇراقتى بايلانىستا بولۋعا ءتيىس. كونتەنتتىڭ مازمۇنىنا ەرەكشە نازار اۋدارۋ قاجەت. سونداي-اق، بەلگىلى ءبىر الەۋمەتتىك جەلىگە عانا قوسىلۋدىڭ قاجەتى جوق. اۋديتوريانى ناقتى ءبىلۋ ءارى سەزىنۋ كەرەك. مىسالى، مەنىڭ بىلۋىمشە، وقۋشىلار مەن ستۋدەنتتەر ۆكونتاكتە جەلىسىن پايدالانادى. سوندىقتان ءبىلىم باسقارماسىنىڭ قىزمەتكەرلەرى تەك فەيسبۋكتە عانا ەمەس، ۆكونتاكتە جەلىسىندە بولۋى كەرەك. تۆيتتەردى ينۆەستيتسيالاردى تارتۋ، برەندتىڭ اتىن شىعارۋ ءۇشىن پايدالانۋعا بولادى. سوندىقتان بۇل تاپسىرمانى ورىنداۋعا جۇيەلى تۇردە كىرىسۋ كەرەك»، – دەپ اتاپ ءوتتى باقىت سۇلتانوۆ.

پاۆلودار وبلىسىنىڭ اكىمى بولات باقاۋوۆ الەۋمەتتىك جەلى ارقىلى اجەپتاۋىر تانىلىپ قالدى. اقپان ايىندا بولات باقاۋوۆ ينستاگرامدا پاراقشا اشىپ، ەكى ايدا 15 مىڭعا جۋىق وقىرمان جينادى. پاراقشادا اكىمنىڭ وقيعالارعا جەكە پىكىرلەرى، وتباسىلىق سۋرەتتەرى، ءوڭىر جاعدايى تۋرالى مالىمەتتەر جازىلعان.

باتىس قازاقستان وبلىسىنىڭ اكىمى التاي كولگىنوۆ تۆيتتەر جەلىسىن بەلسەندى پايدالانادى. ول دا ەلىمىزدىڭ جانە اسىرەسە باتىس قازاقستاننىڭ وزەكتى جاڭالىقتارىمەن ءجيى بولىسەدى. دەگەنمەن، تۆيتتەر – حالىق كوپ قولدانا بەرمەيتىن جەلى بولعاندىقتان، كەرى بايلانىس جوق. ازىرگە ونىڭ 431 وقىرمانى عانا بار.

2019 جىلدىڭ 20 اقپانىندا اقمولا وبلىسىنىڭ بۇرىنعى اكىمى مالىك مىرزالين قاراماعىنداعى اكىمدەرگە الەۋمەتتىك جەلىلەرگە تىركەلىپ، حالىققا «قولجەتىمدى» بولۋدى تاپسىرعان ەدى. اقمولا وبلىسىنىڭ قازىرگى اكىمى ەرمەك مارجىقپاەۆ تا كوكشەتاۋ قالاسىنىڭ اكىمى بولىپ تۇرعاندا فەيسبۋك پەن ينستاگرام جەلىلەرىنە تىركەلىپ، حالىقتىڭ مۇڭ-مۇقتاجىنا جاۋاپ بەرۋگە تىرىسقان. قازىر دە اكىم پاراقشالارىن ءجيى جاڭارتادى.

پرەزيدەنت تاپسىرماسىنان كەيىن سولتۇستىك قازاقستان وبلىسىنىڭ اكىمى قۇمار اقساقالوۆ ءبىر-ەكى كۇندە فەيسبۋككە تىركەلدى. العاشقى جازباسىندا وبلىس اكىمى الەۋمەتتىك جەلىنىڭ اتقارۋشى بيلىك پەن حالىق اراسىنداعى بايلانىس كوپىرى ەكەنىن، پىكىرتالاستار الاڭىنا اينالاتىنىن ايتقان.

سونداي-اق، اقتوبە وبلىسىنىڭ اكىمى وڭداسىن ورازالين دە فەيسبۋكتەگى پاراقشاسىن اشتى. ەندى ول الەۋمەتتىك جەلى ارقىلى وڭىردە بولىپ جاتقان جاڭالىقتارمەن ءبولىسىپ وتىرماقشى. شىعىس قازاقستان وبلىسىنىڭ اكىمى دانيال احمەتوۆتىڭ الەۋمەتتىك جەلىلەردە بىردە-ءبىر پاراقشاسى جوق. ەسەسىنە، وسكەمەن قالاسىنىڭ اكىمى جاقسىلىق ومار مەن سەمەي قالاسىنىڭ اكىمى ەرماك ءسالىموۆتى فەيسبۋك پەن ينستاگرامنان تابۋعا بولادى.

شىمكەنت قالاسىنىڭ اكىمى عابيدوللا ءابدىراحىموۆتىڭ الەۋمەتتىك جەلىلەردە پاراقشاسى بولعانمەن، بىلتىرعى جازباسىمەن تۇر. پرەزيدەنتتىڭ تاپسىرماسىنان كەيىن قولعا الاتىن شىعار دەگەن ءۇمىت بار.

اتىراۋ وبلىسى اكىمدىگىنىڭ Telegram چات-كانالىنا 5 مىڭنان استام ادام تىركەلگەن. اكىمنىڭ جەكە اككاۋنتى جوق. قىزمەتكەرلەرىن مۇمكىندىگىنشە اشىق جۇمىس ىستەۋگە شاقىرعان اتىراۋ وبلىسىنىڭ اكىمى ن.نوعاەۆ: «قازىر الەۋمەتتىك جەلىلەر ارقىلى ماسەلەلەر شەشىلىپ جاتىر. Telegram جەلىسىندەگى «اتىراۋ وبلىستىق اكىمدىگى» قوسىمشاسىنا تۇرعىنداردان ساۋالدار كوپ تۇسەدى. تۇرعىن ءۇي-كوممۋنالدىق شارۋاشىلىعى، جەر تەلىمدەرىن، باسپانا ءبولۋ سالارىندا. تۇرعىنداردىڭ ساۋالدارىنا جەدەل جاۋاپ بەرۋ ارقىلى كوپ ماسەلەلەردى شەشەمىز. بارلىق باسشىلارعا ءوز قىزمەتتەرىنە ىشكى تالداۋ جۇرگىزۋ كەرەكتىگىن ەسكەرتەمىن. Telegram-دا ءار اۋداننىڭ چات-كانالى اشىلدى. قازىر ازاماتتارمەن قالاي جۇمىس ىستەپ جاتقاندارىڭىزعا قاراپ وتىرمىز، كەيبىر اۋدانداردا تەك قولايلى ساۋالدارعا جاۋاپ بەرۋ جاعدايلارى كەزدەسۋدە. بۇلاي بولمايدى. ەسكەرتۋدى قاپەرگە الماعان باسشىلارعا شارا قولدانىلادى»، – دەيدى نۇرلان نوعاەۆ. ال ءبىر-ەكى كۇندىكتە تۇركىستان وبلىسىنىڭ اكىمى ومىرزاق شوكەەۆ حالىقپەن تىعىز بايلانىس ورناتۋ ءۇشىن فەيسبۋك الەۋمەتتىك جەلىcىندە جەكە پاراقشاسىن اشتى. وسىلايشا، ايماق باسشىسى تۇرعىنداردى تولعاندىرعان ماسەلەلەرمەن تانىسىپ، ولاردىڭ وڭ شەشىلۋىنە ىقپال جاساماق. «قۇرمەتتى وتانداستار! قازىرگى تاڭدا الەۋمەتتىك جەلىلەر كوپتەگەن قىزمەت سالالارىندا ماڭىزعا يە جانە قوعاممەن بايلانىس ءۇشىن ەڭ تانىمال پلاتفورما بولىپ قالا بەرەدى. الەۋمەتتىك جەلىلەردى پايدالانۋ – ۋاقىت تالابى. سوعان سايكەس، ەندى فەيسبۋك الەۋمەتتىك جەلىسىندە ءوز پاراقشامدى اشىپ وتىرمىن. بۇل پاراقشا ارقىلى ايماقتاعى جاڭالىقتاردى جانە وزگەرىستەردى حابارلايتىن بولامىن. سونىمەن قاتار، ماعان سىزدەردىڭ پىكىرلەرىڭىزدى ءبىلۋ جانە ۇسىنىستارىڭىزدى قاراپ، جاۋاپ بەرۋ ماڭىزدى. ەندى #Shokeevke_suraq حەشتەگى ارقىلى ءوز پىكىرلەرىڭىزدى، تىلەكتەرىڭىزدى قالدىرا الاسىزدار» دەلىنگەن پاراقشادا.

ال الماتى قالاسى، ماڭعىستاۋ، قاراعاندى، قوستاناي، الماتى، جامبىل وبلىستارىنىڭ اكىمدەرى الەۋمەتتىك جەلىلەرگە تىركەلمەگەن. بۇل وڭىرلەردە حالىقتىڭ وتىنىشتەرىنە جاۋاپ بەرۋ جۇمىسىن ارنايى ءباسپاسوز قىزمەتتەرى نەمەسە اكىمدەردىڭ ورىنباسارلارى اتقارادى.

پرەزيدەنت «ينستاگرامعا» تىركەلدى

مينيسترلەر مەن اكىمدەر الەۋمەتتىك جەلىنىڭ نە ەكەنىن بىلە قويماعان ۋاقىتتا تۆيتتەردەن پاراقشا اشىپ، بەلگىلى ءبىر ماسەلەگە پىكىرىن اشىق ءبىلدىرىپ، سونداي-اق اتقارعان جۇمىسىن كوپشىلىككە جاريا ەتۋدە بەلسەندىلىك تانىتىپ كەلگەن مەملەكەت باسشىسى قاسىم-جومارت توقاەۆ ينستاگرام جەلىسىنەن رەسمي پاراقشا اشتى.

ول العاشقى جازباسىندا: «قۇرمەتتى وتانداستار! جاقىندا ءوڭىر اكىمدەرىنە جۇرتپەن ەتەنە بايلانىس ورناتۋ ءۇشىن زاماناۋي بايلانىس قۇرالدارىن ۇتىمدى پايدالانۋعا، ياعني حالىقپەن كەرى بايلانىس ورناتۋ ماقساتىندا əلەۋمەتتىك جەلىلەردە بەلسەندى بولۋعا شاقىردىم. وزدەرىڭىزگە بەلگىلى، مەن بىرنەشە جىلدان بەرى تۆيتتەر جەلىسىن بەلسەندى قولدانىپ، مەملەكەتىمىز ءۇشىن ەڭ ماڭىزدى دەگەن دۇنيەلەرمەن ءبولىسىپ كەلەمىن. ەندىگى رەتتە وسى ءۇردىستى حالىق ەڭ كوپ شوعىرلانعان Instagram جەلىسىندە دە جالعاستىرۋدى ءجون دەپ تاپتىم»، – دەپ جازدى.

ايتا كەتۋ كەرەك، قازىر پرەزيدەنتتىڭ اتىمەن اشىلعان فەيك-پاراقشالار دا كوبەيىپ كەتكەن. قازىردىڭ وزىندە 34 جالعان اككاۋنت تىركەلىپ ۇلگەرىپتى. سوندىقتان حالىق الدەقانداي اقپاراتتارعا الدانىپ قالماس ءۇشىن رەسمي پاراقشانىڭ سكرينشوتىن ۇسىنىپ وتىرمىز.

P.S. مينيسترلەر كابينەتى مەن اكىمدىكتەر جاپپاي الەۋمەتتىك جەلىدەن پاراقشا اشۋعا كىرىستى. ارينە، بۇل جاقسى ءۇردىس. الايدا، مۇنى ءجاي ناۋقانشىلدىققا اينالدىرماي، حالىقتىڭ تۇيتكىلىن شەشۋگە جۇمىلدىرسا قانەكي. ايتقانداي، وسى ۇرىمتال تۇستى پايدالانعاندار قر پرەمەر-ءمينيسترى اسقار ماميننىڭ اتىنان ينستاگرامدا پاراقشا اشىپ ۇلگەرىپتى. الايدا، پرەمەر-ءمينيستردىڭ ءباسپاسوز قىزمەتى «ينستاگرام جەلىسىندەگى @mamin_online اككاۋنتىنىڭ جالعان ەكەنىن  حابارلايمىز. بۇل پاراقشانىڭ قىزمەتىن توقتاتۋ تۋرالى سايكەس شارالار جاسالدى»، –  دەگەن مالىمدەمە جاسادى. ياعني، باق پەن الەۋمەتتىك جەلى قولدانۋشىلارى قر پرەمەر-ءمينيسترىنىڭ رەسمي سايتىندا جانە فەيسبۋك، ۆكونتاكتە، تۋيتتەر، پەريسكوپ، Youtube راستالعان پاراقشالارىندا جاريالانعان اقپاراتتى عانا پايدالانۋىن سۇرادى.

دينارا مىڭجاسارقىزى

سوڭعى جاڭالىقتار