1 ءساۋىر 2019, 13:10 799 0 ونەر دينارا مىڭجاسارقىزى

رەجيسسەردىڭ ەكى بىردەي ءفيلمى كينوفەستيۆالگە قاتىسادى

قازاقستاندىق رەجيسسەر تۇسىرگەن ەكى بىردەي فيلم قازان قالاسىنداعى كينوفەستيۆالگە قاتىسادى. قىسقامەتراجدى "اسان" كوركەم ءفيلمى جانە "اتا كاسىپ" دەرەكتى ءفيلمى ۇستىمىزدەگى جىلى ءساۋىردىڭ 24-30 ارالىعىندا تاتارستاننىڭ استاناسىندا وتەتىن XV حالىقارالىق مۇسىلمان كينوسى فەستيۆالىنىڭ كونكۋرسىنا قاتىسادى، - دەپ حابارلايدى تengrinews.kz ءتىلشىسى "قازاقفيلم" اق سايتىنا سىلتەمە جاساپ. 

قر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى "قازاقفيلم" اق تۇسىرىلگەن بۇل كينوتۋىندىلار "ۇزدىك قىسقامەتراجدى فيلم" جانە "ۇزدىك دەرەكتى فيلم" نوميناتسيالارى بويىنشا باق سىنايدى.  مۇسىلمان كينوسى فەستيۆالىنىڭ قۇرىلتايشىسى - تاتارستان رەسپۋبليكاسىنىڭ مادەنيەت مينيسترلىگى. وسى مادەني ءىس-شارا تاتارستان كينەماتوگرافيستەر وداعى مەن قازان مەملەكەتتىك مادەنيەت ينستيتۋتىنىڭ ۇيىمداستىرۋىمەن وتەدى. بيىل فەستيۆالدىڭ كونكۋرسىنا تۇسكەن فيلمدەردى دانيا، وڭتۇستىك كورەيا سىندى 10 مەملەكەتتىڭ بەلگىلى كينەماتوگرافيستەرى باعالايتىن بولادى. "اسان" قىسقامەتراجدى ءفيلمى اكەسىن اقتىق ساپارعا شىعارىپ سالۋعا جولعا شىققان بوزبالا تۋرالى باياندايدى. ال "اتا كاسىپ" دەرەكتى ءفيلمى قازاقستاندا تۇراتىن وزبەك حالقى تۋرالى، ونىڭ ىشىندە  وڭتۇستىك قازاقستان وبلىسىندا تۇراتىن وزبەك حالقىنىڭ وكىلى، اتا كاسىپ - بەسىك جاساۋمەن اينالىساتىن 47 جاستاعى ابديماننوپ زۋپاروۆ ەسىمدى شەبەردىڭ ءومىرىن باياندايدى.  "وسى فەستيۆالدە مەنىڭ ەكى بىردەي فيلمدەرىمنىڭ كورسەتىلەتىنىنە قۋانىشتىمىن. ماعان سەنىپ، قولداۋ بىلدىرگەندەرى ءۇشىن "قازاقفيلم" كينوستۋدياسىنىڭ باسشىلىعىنا العىسىمدى ايتامىن", - دەدى فيلمدەردىڭ رەجيسسەرى بەرىك جاحانوۆ.

ەسكە سالايىق، بىلتىر "اسان" ءفيلمى 71-ءشى حالىقارالىق كانن كينوفەستيۆالىنىڭ Short Film Corner اياسىندا (الەمنىڭ قىسقامەتراجدى تۋىندىلارىنا ارنالعان) كورسەتىلگەن بولاتىن. سونىمەن قاتار 2018 جىلى كارتينا بىرنەشە حالىقارالىق كينوفەستيۆالدەرگە قاتىسىپ، كوپتەگەن جۇلدەلەرگە يە بولدى، اتاپ ايتساق، رەسپۋبليكالىق "بايقوڭىر" فەستيۆالىندە "ۇزدىك اكتەر" جۇلدەسىمەن، باكۋدە وتكەن 9-شى حالىقارالىق Start film festival  كينوفەستيۆالىندە قازىلار القاسىنىڭ ارنايى جۇلدەسىمەن، "ۇزدىك قىسقامەتراجدى فيلم" نوميناتسياسى بويىنشا "قۇلاگەر" جۇلدەسىمەن، تاشكەنتتە وتكەن "پرولوگ" كينوفەستيۆالىندە ارنايى جۇلدەمەن جانە ەكاتەرينبۋرگ قالاسىندا وتكەن XV حالىقارالىق "كينوپروبا" كينومەكتەبى فەستيۆالىندە قازىلار القاسىنىڭ ارنايى جۇلدەسىمەن ماراپاتتالدى. ال "اتا كاسىپ" دەرەكتى ءفيلمى دە بىرنەشە جۇلدەلەرگە قول جەتكىزگەن بولاتىن. بىلتىر الماتىدا وتكەن VII حالىقارالىق "باستاۋ" كينوفەستيۆالىندە دەرەكتى فيلم وراز ابىشەۆ اتىنداعى جۇلدەنى يەمدەندى. سونداي-اق باۋىرجان نوگەربەكتىڭ 70 جىلدىعىنا ارنايى ۇ يىمداستىرىلعان كينوفەستيۆالدە قازىلار القاسىنىڭ جۇلدەسىمەن جانە Vosmerka.kz سايتىنىڭ ارنايى جۇلدەسىمەن (تاقىرىپقا تەرەڭ ءۇڭىلىپ، دەرەكتى فيلمدەردى ءتۇسىرۋ داستۇرىنە بار ىقىلاسپەن بەرىلگەن ءۇشىن) ماراپاتتالدى.

سوڭعى جاڭالىقتار