28 ناۋرىز 2019, 16:09 759 0 قوعام اسەل انۋاربەك

5600 بالا «مۇزبالاقتى» تەگىن تاماشالادى

وتكەن جىلدىڭ قازان ايىندا وتاندىق انيماتسيا قورجىنى «مۇزبالاق» اتتى جاڭا تۋىندىمەن تولىققانىن ايتىپ، سۇيىنشىلەگەن ەدىك. ال بيىلعى ناۋرىز مەيرامىندا ەلوردالىق 5600 بالا اتالعان انيماتسيالىق ءفيلمدى تەگىن تاماشالادى.

قر مادەنيەت جانە سپورت ءمينيسترى ارىستانبەك مۇحامەديۇلى ۇلىستىڭ ۇلى كۇنى – ناۋرىز  مەيرامىن جاڭا فورماتتا مەرەكەلەۋدى ۇسىنعان بولاتىن. سوندا مينيستر ناۋرىز مەرەكەسىنىڭ ەڭ الدىمەن، بالالارعا ارنالۋى قاجەتتىگىن تىلگە تيەك ەتكەن ەدى. وسى ورايدا، قر مادەنيەت جانە سپورت  مينيسترلىگىنىڭ باستاماسىمەن «قازاقكونتسەرت» مەملەكەتتىك كونتسەرتتىك ۇيىمى ناۋرىز مەرەكەسىنە وراي كوپبالالى جانە الەۋمەتتىك تۇرعىدان از قامتىلعان وتباسىلاردان شىققان بالالار، جەتىمدەر ءۇيىنىڭ تاربيەلەنۋشىلەرى مەن مۇگەدەك بالالار ءۇشىن مادەني ءىس-شارالاردىڭ كەشەنىن ۇيىمداستىردى. سونىڭ ءبىرى – «مۇزبالاق» ءمۋلتفيلمىنىڭ تەگىن كورسەتىلىمى. مۋلتفيلم كىشكەنتاي كورەرمەندەرگە قازاق جانە ورىس تىلدەرىندە ۇسىنىلدى.

ۇيىمداستىرۋشىلاردىڭ ايتۋىنشا، ناۋرىز مەرەكەسى اياسىندا بالالارعا وتاندىق كينو ونەرىنىڭ تۋىندىلارىن ۇسىنۋ باستاماسى ناۋرىزدىڭ جاڭا تۇرپاتتا تويلانۋىنا ۇلەس قوسپاق.

ايتا كەتەيىك، بۇركىت پەن ادامنىڭ دوستىعى تۋرالى باياندايتىن ءمۋلتفيلمدى قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ  اتىنداعى «قازاقفيلم» اق تۇسىرگەن. فيلمگە بۇركىتتى قۇس پاتشاسى دەپ دارىپتەگەن كوشپەندى حالىقتىڭ قىران قۇسقا دەگەن سۇيىسپەنشىلىگى ارقاۋ بولعان. ەكى جىلدان استام ۋاقىت تۇسىرىلگەن بۇل ءمۋلتفيلمدى ازىرلەۋگە 40-قا جۋىق كينەماتوگرافيانىڭ انيماتسيا جانرىندا ەڭبەك ەتىپ جۇرگەن وتاندىق مامان قاتىستى. ۇزاقتىعى 67 مينۋت بولاتىن ءمۋلتفيلمنىڭ 70 پايىزى 2D, 30 پايىزى 3D فورماتىندا جاسالىپ، باس-اياعى 96 500 سۋرەت سالىنعان.

سوڭعى جاڭالىقتار