28 ناۋرىز 2019, 15:45 1061 0 دەنساۋلىق تاڭسۇلۋ الدابەرگەنقىزى

جاستار جىلىنىڭ ءبىر سيپاتى

شىمكەنت قالاسىندا جوعارى بىلىكتى مامان-كادرلار دايىندايتىن جوعارى وقۋ ورىندارى جەتەرلىك. قاھارلى قىستان كەيىن جەر بەتىن نۇرلاندىرىپ، ساۋلەسىن شاشا كەلەتىن ءاز-ناۋرىز مەيرامىنىڭ قارساڭىندا اتالعان قالاداعى بىرنەشە جوعارى وقۋ ورىندارىنىڭ ستۋدەنتتەرىمەن كەزدەسۋ ءوتتى. ەلباسىمىزدىڭ «بولاشاققا باعدار: رۋحاني جاڭعىرۋ» اتتى ماقالاسىنىڭ جۇيەسىمەن بيىلعى جىلدىڭ «جاستار جىلى» اتالۋى دا تەگىننەن تەگىن بولماسا كەرەك.

وتكەن جىلدىڭ قاراشا ايىندا قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنتىمەن «ازاماتتارعا ارنالعان ۇكىمەت» مەملەكەتتىك كورپوراتسياسى تۇركىستان وبلىسى بويىنشا فيليالىنىڭ باستاماسىمەن اگرارلىق كوللەدجدە «ستۋدەنتتەرگە قىزمەت كورسەتۋ» ورتالىعى جۇمىس ىستەپ كەلەدى ەكەن. ورتالىقتىڭ نەگىزگى ماقساتى – تسيفرلاندىرۋ جۇيەسىمەن بارلىق سالالارداعى مۇمكىندىكتەردى پايدالانۋ، جاستاردى تسيفرلىق-ەلەكتروندى تۇردە قىزمەت الۋعا ۇيرەتۋ جانە ەلەكتروندىق ۇكىمەت پورتالىندا قىزمەت الۋدى جەتىلدىرۋ اياسىندا قىرىقتان استام مەملەكەتتىك قىزمەت كورسەتە الادى. سونىمەن قاتار «تسيفرلى قازاقستان» باعدارلاماسىن جۇزەگە اسىرۋ وسى ورتالىقتا جۇزەگە اسىپ كەلەدى ەكەن.

كەزدەسۋدى وسى ءبىلىم وشاعىنان باستاعاندى ءجون سانادىق. ەل ەكونوميكاسىنا قاجەتتى تەحنيكالىق جانە كاسىپتىك ءبىلىمدى مامانداردى دايارلاۋ ماسەلەسىن قولعا الىپ، ناتيجەلى ەڭبەك ەتىپ كەلە جاتقان تۇركىستان جوعارى اگرارلىق كوللەدجىنىڭ ىرگەتاسى 1972 جىلى قالانعان. رەسپۋبليكامىزداعى تەحنيكالىق جانە كاسىپتىك ءبىلىم بەرەتىن وقۋ ورىندارى اراسىندا ءبىلىم بەرۋ ساپاسى مەن ءتالىم-تاربيە جاعىنان ۇزدىك وندىققا كىرگەن بۇل وشاقتىڭ تۇتقاسىن ۇستاپ وتىرعان گاۋھار بەكبەرگەنوۆا دا ءبىلىمدى، ءوز ءىسىنىڭ وزىق ويلى مامانى. ويتكەنى كوللەدج قابىرعاسىندا ءبىلىم الاتىن ون ەكى ماماندىق بويىنشا مىڭ جەتى جۇزدەن استام ستۋدەنتى بار ۇلكەن ۇجىمدى باسقارىپ، ۇيىتىپ وتىرۋ دا وڭاۋ تىرلىك ەمەستىگى بەلگىلى. تولىعىراق ايتار بولساق، 323 ەلەكتر-مەحانيكا، 515 زووۆەتەريناريالىق، 497 تەحنولوگيالىق جانە 328 ستۋدەنت اگرارلىق بولىمدە ءدارىس الادى. جوعارى بىلىكتىلىگىن ارتتىرۋ ماقساتىندا 26 ءبىلىم الۋشىنى تاعى قوسىڭىز. ءبىلىم بەرۋ جۇيەسىن دامىتۋ بارىسىندا الەمدىك وزىق تەحنولوگيالاردى قولدانا وتىرىپ، دامىعان شەتەلدىك وقۋ ورىندارىنىڭ باي تاجىريبەسىن باتىل ەنگىزىپ، يننوۆاتسيالىق تۇرعىدان قالىس قالىپ قويماۋ ماسەلەسى دە ۇنەمى نازاردا ۇستانىپ وتىراتىن ءۇردىس. سوندىقتان كوللەدج ءدارىسحانالارى مەن زەرتحانالارىندا قاجەتتى وقۋ-قۇرال جابدىقتارى مەن تەحنيكالىق وقۋ قۇرالدارى جەتكىلىكتى جابدىقتالعان. وقۋ-تاربيەلىك ۇدەرىسىن ۇيىمداستىرۋ ءۇشىن كوللەدجدە 58 وقىتۋ كابينەتتەرى، 25 زەرتحانا، 5 وقۋ شەبەرحاناسى، دەربەس كومپيۋتەرلەرمەن جابدىقتالعان 4 سىنىپ جاڭا وقۋ جىلىندا سوڭعى جاڭا ۇلگىدەگى 75 كومپيۋتەرمەن جانە 10 پرينتەرمەن جابدىقتالدى. ونىڭ بارلىعى دەرلىك لوكالدىق جەلىگە بىرىكتىرىلگەن جانە ينتەرنەتكە قوسىلعان. 2018-2019 وقۋ جىلىندا اگروتەحنولوگيالىق، اۋىلشارۋاشىلىعىن مەحانيكالاندىرۋ جانە ۆەتەرينارلىق كافەدرالارىندا ون ءۇش ءدارىسحانا مەن زەرتحانا جۇمىس جاسادى.

تۇركىستان جوعارى اگرارلىق كوللەدجىندە ەلىمىزگە بەلگىلى قوعام قايراتكەرى، «جاسىل ەكونوميكا»، بالامالى ەنەرگەتيكا كوزدەرى جانە تدم-2030 تۇراقتى دامۋىنىڭ ناسيحاتتاۋشىسى سالتانات راقىمبەكوۆانىڭ قاتىسۋىمەن اشىلعان جاسىل يننوۆاتسيالار مەن تەحنولوگيالاردى وقىتاتىن رەسۋرستىق ورتالىقتىڭ جۇمىسى دا ءوز ناتيجەسىن بەرۋدە. بۇل ورتالىققا ەلىمىزدىڭ ەكونوميكا جانە ەكولوگيا سالاسىندا ەڭبەگى ەرەن، قر پرەزيدەنتى جانىنداعى «جاسىل ەكونوميكاعا» كوشۋ جونىندەگى كەڭەسىنىڭ مۇشەسى، ەكونوميكا عىىمدارىنىڭ دوكتورى، پروفەسسور سالتانات تەمىرقۇلقىزىنىڭ ەسىمى بەرىلىپتى. ورتالىق زاماناۋي جابدىقتالعان ادىستەمەلىك تالاپتارعا ساي. ماقسات – بولاشاق اۋىل شارۋاشىلىعى ماماندارىنا «جاسىل ەكونوميكا» باعىتتارى بويىنشا ءبىلىم بەرۋ، قازاقستان ەكونوميكاسى سالالارىن جاڭعىرتۋ بارىسىندا «جاسىل» ستاندارتتاردى ەنگىزۋگە ىقپال ەتۋ جانە ءبىلىم الۋشىلاردىڭ حالىقارالىق ءھام وتاندىق جوبالاردى جۇزەگە اسىرۋىنا جول اشۋ. كەزدەسۋ بارىسىندا «جاستار» جىلىنىڭ رەسمي باستالۋىنا وراي تۇركىستان جوعارى اگرارلىق كوللەدجىندە «Sاpاly urpaq» جوباسى فرونت-كەڭسەسىنىڭ ناتيجەلى جۇمىستارى دا ءسوز بولدى. ءبىلىم بەرۋ سالاسىنداعى سىبايلاس جەمقورلىق دەڭگەيىنىڭ قىسقارۋىنا، بولاشاق ۇرپاقتا سىبايلاس جەمقورلىققا قارسى وي-ءورىستى جانە مادەنيەتتى قالىپتاستىرۋعا، ازاماتتاردىڭ مەملەكەتتىك بيلىك ينستيتۋتتارىنا سەنىمىن ارتتىرۋ باعىتىنداعى جوبانىڭ جۇمىس ءستيلى دە ەرەكشە ەكەن. «جەمقورلىققا قارسى تەحنولوگيالىق زەرتحانا بولىپ تابىلاتىن ورتالىقتىڭ نەگىزگى مىندەتى: سىبايلاس جەمقورلىقتان ازات قازاقستاندا تۇراتىن پاتريوت جانە باسەكەگە قابىلەتتى جاستاردى قالىپتاستىرۋ بولۋى ءتيىس»، – دەيدى رەسپۋبليكالىق جوبالىق كەڭسەسىنىڭ باسشىسى قايىردان توقىشەۆ مىرزا.

سونداي-اق كوللەدجدە 50 مىڭعا جۋىق كىتاپ قورى بار ورتالىقتاندىرىلعان كىتاپحانا جۇمىس ىستەيدى. ءبىلىم ورداسىنىڭ ىشىندەگى ءبىلىم وتاۋىندا بولعان كەزدەسۋ وسىنداي ءبىراز ماعلۇماتتار بەرۋىمەن قاتار، ونداعى ستۋدەنت-جاستاردىڭ بۇگىنگى كۇننىڭ وزەكتى ماسەلەلەرى جايلى قويعان سۇراقتارىنان دا شىمكەنت جاستارىنىڭ وتانعا، تۋعان جەرگە دەگەن ماحابباتتارى سەزىلىپ تۇردى. گۋمانيتارلىق-رۋحاني الەمنەن ءسال-ءپال الشاق جاتقان اۋىلشارۋاشىلىعى سالاسىندا ءبىلىم الىپ ءجۇرىپ، وسىناۋ مادەني-رۋحاني دۇنيەلەردەن دە مازمۇندى سۇراق قويىپ، مۇقيات تىڭداۋلارى جانىمىزدى سەرگىتتى.

شىمكەنت قالاسى

سوڭعى جاڭالىقتار