28 ناۋرىز 2019, 12:25 698 0 قوعام اسەل انۋاربەك

«ەۋروپانىڭ جۇرەگى» – قولايلى قالا

بۇل تىزىمدە قالالار ەكونوميكاسى مەن ينفراقۇرىلىمىنىڭ دامۋى، مەديتسينا، ءبىلىم، دەمالىس قىزمەتتەرىنە قول جەتىمدىلىك بويىنشا باعالاندى. بۇدان وزگە ساياسي جانە الەۋمەتتىك ورتا، الەۋمەتتىك-مادەني جاعدايى مەن كليماتتىق جاعدايى دا ەسەپكە الىنعان. ەسەپكە الىنعان قالالاردىڭ جالپى سانى – 231. «Mercer» كونسالتينگتىك كومپانياسىنىڭ ەسەبىنشە، ەڭ جوعارى ستاندارتقا يە قالالاردىڭ باسىم كوپشىلىگى ەۋروپادا ورنالاسقان. ۆەنادان كەيىنگى ورىندار شۆەيتساريانىڭ تسيۋريح جانە كانادانىڭ ۆانكۋۆەر قالالارىنا بۇيىردى. سونداي-اق ءومىر سۇرۋگە قولايلى ۇزدىك شاھارلار قاتارىندا ديۋسسەلدورف (گەرمانيا), فرانكفۋرت (گەرمانيا), كوپەنگاگەن (دانيا), جەنەۆا (شۆەيتساريا), بازەل (شۆەيتساريا) بار.

الەمدەگى ءومىر سۇرۋگە ەڭ قولايلى شاھار – ۆەنا حالقىنىڭ 96 پايىزى شاھارداعى ءومىر ءسۇرۋ دەڭگەيىنە، 95 پايىزى قوعامدىق كولىك جۇيەسىنە رازى بولسا، 88 پايىزى مەديتسينا قىزمەتىنە قاناعاتتانادى. ۆەنا – اۆستريانىڭ ساياسي-ەكونوميكالىق، مادەني ورتالىعى. بۇل قالانى جۇرتشىلىق «ەۋروپانىڭ جۇرەگى» دەپ اتايدى. سونداي-اق مۇندا وپەك، وبسە سياقتى حالىقارالىق ۇيىمداردىڭ شتاب-پاتەرى ورنالاسقان. ۆەناداعى ەسكى قالا مەن شەنبۋرنن سارايى 2001 جىلى يۋنەسكو-نىڭ الەمدىك مۇرالارىنىڭ قاتارىنا ەنگەن.

الايدا الەمدەگى تۋريستەر ءجيى باس سۇعاتىن، حالىقارالىق اقپارات قۇرالدارىندا اتاۋى ءجيى اتالاتىن شاھارلار رەيتينگتە تومەنگى ورىندارعا جايعاسقان. ماسەلەن سۇلۋ قالا پاريج – 39, اتى جەر جاھانعا ءماشھۇر نيۋ-يورك – 44, اعىلشىندار استاناسى – لوندون – 41-ورىنعا تۇراقتاپتى. ال كورشىلەس رەسەي استاناسى – ماسكەۋ – 167, كيەۆ – 173, سانكت-پەتەربۋرگ – 174, مينسك – 188, باكۋ – 195-ورىنعا ورنالاستى.

قازاقستاننىڭ وڭتۇستىك استاناسى – الماتى بۇل تىزىمدە 177-ورىنعا يە بولدى. ايتا كەتەيىك، جىل باسىندا حالىقارالىق Numbeo زەرتتەۋ ورتالىعىنىڭ رەيتينگى بويىنشا، الماتى شاھارى ءومىر سۇرۋگە قولايلى الەمدەگى 226 قالانىڭ ىشىنەن 208-ورىندى قاناعات تۇتقان ەدى. دەسەك تە، الماتى تۇرعىندارىنىڭ سانى جىل سايىن 50 مىڭعا ارتادى ەكەن. بۇل قالاداعى ءومىر ءسۇرۋ ساپاسىنىڭ جوعارى ەكەندىگىن بايقاتسا كەرەك. جوسپار بويىنشا، الداعى 15 جىلدا الماتى حالقى 3 ملن ادامعا جەتپەك. ءوز كەزەگىندە بۇل جۇمىسپەن قامتۋ، الەۋمەتتىك سالا مەن قورشاعان ورتانى قورعاۋ جانە قاۋىپسىزدىك سياقتى كوپتەگەن سالادا جاڭا كەشەندى شارالار قابىلداۋدى قاجەت ەتەدى.

«Mercer» پورتالىنىڭ ەسەبىنە قايتا ورالساق، رەيتينگتەگى سوڭعى ورىن يراك استاناسى – باعداد قالاسىنا بۇيىردى. ياعني، باعداد كەزەكتى رەت الەمدەگى ءومىر سۇرۋگە ەڭ قولايسىز قالا دەپ تانىلدى.

 

سوڭعى جاڭالىقتار