28 ناۋرىز 2019, 11:09 763 0 نۇر وتان اسەل انۋاربەك

Nur Otan پارتياسى: قوعامداعى بىرلىكتى  ساقتاۋعا كۇش جۇمساۋىمىز قاجەت

سەيسەنبى كۇنى #NurOtanTrends پىكىرتالاس الاڭىنىڭ كەزەكتى وتىرىسى ءوتتى. جيىنعا قاتىسۋشىلار ەلدەگى ساياسي وزگەرىستەرگە نازار اۋدارىپ، «قازاقستان ساياساتىنىڭ جاڭا كەلبەتى» تاقىرىبىندا اڭگىمە ءوربىتتى.

#NurOtanTrends پىكىرتالاس الاڭىنا جينالعان ساراپشىلار ەلىمىزدىڭ الدىندا تۇرعان قوعامدىق-ساياسي جانە الەۋمەتتىك-ەكونوميكالىق سالالارعا قاتىستى باسىمدىقتار مەن جاڭا تالاپتار جايىن تالقىلادى. ءوز سوزىندە Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ەلباسىنىڭ تاريحي شەشىمى ەل دامۋىنىڭ جاڭا كەزەڭىن باستاپ بەرگەنىن ايتتى. سوعان بايلانىستى ول ءار قازاقستاندىقتىڭ ەلدىڭ بولاشاعىنا بەيجاي قاراماي، بەلسەندىلىك تانىتۋى ماڭىزدى ەكەنىن جەتكىزدى. «قازىرگىدەي ەل دامۋىنا تىكەلەي اسەر ەتەتىن وقيعالار كەزىندە قوعامنىڭ اۋىزبىرلىگى مەن  بىرتۇتاستىعىن ساقتاۋ وتە ماڭىزدى. سوندىقتان وسىنداي كەزەڭدە  قازاقستاندىقتار جۇدىرىقتاي جۇمىلىپ، ءار ازامات ءوز جاۋاپكەرشىلىگىن ءتۇسىنىپ ارەكەت ەتۋى كەرەك. ويتكەنى مۇنداي جاعدايدى ءوزىنىڭ جەكە مۇددەلەرىنە  پايدالانىپ، ەل اراسىنا ىرىتكى سالۋدى كوزدەيتىن كەيبىر كۇشتەردىڭ بار ەكەنى بەلگىلى. سوندىقتان ارقايسىمىز ەلىمىزدىڭ بولاشاعىنا جاۋاپكەرشىلىكپەن  قاراپ، قوعامداعى بىرلىك پەن بەرەكەنى ساقتاۋعا كۇش جۇمساۋىمىز قاجەت»، – دەدى ماۋلەن اشىمباەۆ.

سونىمەن قاتار Nur Otan پارتياسى توراعاسىنىڭ ءبىرىنشى ورىنباسارى ەلباسى ساياساتىن ودان ءارى جالعاستىرۋدىڭ ماڭىزى مەن تۇڭعىش پرەزيدەنتىمىز انىقتاپ بەرگەن جولدىڭ باسىمدىقتارىنا توقتالدى. «ەلباسى ساياساتىنىڭ نەگىزىندە ەلىمىزدىڭ جاڭا كەزەڭىمەن بىرگە بولاشاعى ءۇشىن دە اسا ماڭىزدى ماقساتتار مەن قۇندىلىقتار بار. اتاپ ايتقاندا، تاۋەلسىزدىك پەن  مەملەكەتتىلىكتى كۇشەيتۋ، ەلىمىزدە كاسىپكەرلىكتى دامىتۋ، جەكەمەنشىك يەلەرىنە قولداۋ كورسەتۋ، ءتيىمدى الەۋمەتتىك ساياساتتى ىسكە اسىرۋ، بەيبىتشىلىك پەن كەلىسىمدى ساقتاۋ جانە ەڭ دامىعان ەلدەردىڭ قاتارىنا قوسىلۋعا باعىتتالعان جۇمىستاردى ودان ءارى جالعاستىرۋ سياقتى باسىمدىقتار ەلباسى ساياساتىنىڭ نەگىزى بولىپ سانالادى. بۇل قۇندىلىقتار مەن ماقساتتار  بىركۇندىك ەمەس. ويتكەنى ولار ءبىزدىڭ بولاشاعىمىزدى ايقىندايتىن سيپاتقا   يە. سوندىقتان قازىرگىدەي تاريحي كەزەڭدە تۇڭعىش پرەزيدەنتىمىزدىڭ ەلىمىزدى  ودان ءارى دامىتۋعا باعىتتالعان ستراتەگيالىق ماقساتتارىن جۇزەگە اسىرۋعا ءار ازامات ءوز ۇلەسىن قوسۋى كەرەك»، – دەدى پارتيا توراعاسىنىڭ ءبىرىنشى ورىنباسارى.

جيىن بارىسىندا ەلباسىنىڭ قاۋىپسىزدىك كەڭەسى مەن Nur Otan پارتياسىنىڭ توراعاسى بولىپ قالا بەرۋى اتالعان ساياسي ينستيتۋتتاردىڭ ءرولىن ودان ءارى كۇشەيتەتىنى دە ايتىلدى. بۇل جونىندە ماۋلەن اشىمباەۆ  پارتيانىڭ حالىقتىڭ بىرلىگىن ساقتاپ، نۇرسۇلتان ءابىشۇلى نازارباەۆتىڭ جولىن جالعاستىرۋداعى جاۋاپكەرشىلىگى ارتا تۇسكەنىن ايتتى. «ەلباسىمىزدىڭ اتالعان قۇرىلىمداردىڭ توراعاسى بولىپ قالۋى بۇل ينستيتۋتتاردىڭ جاۋاپكەرشىلىگىن ارتتىرا تۇسەدى. Nur Otan پارتياسى وسى جاۋاپكەرشىلىكتى  سەزىنە وتىرىپ، ەلىمىزدەگى بارلىق ساياسي كۇشپەن ارىپتەستىك ورناتۋعا دايىن. ءبىز ءار تاراپتىڭ ۇستانىمىنا قۇرمەتپەن قاراپ، ەلدىك مۇددە جولىندا بىرلەسىپ  جۇمىس ىستەۋ ءۇشىن ءوزىمىزدىڭ بارلىق الاڭدارىمىزدى پايدالانۋعا دايىنبىز. قاجەت بولسا، جاڭا الاڭداردى دا ىسكە قوسامىز. ءبىزدىڭ باستى ماقساتىمىز –   ەلباسىنىڭ ەكونوميكالىق، ساياسي، الەۋمەتتىك سالاداعى جاڭعىرۋ باعىتىن   جۇزەگە اسىرۋدىڭ ءتيىمدى تەتىكتەرىن پىسىقتاۋ. سوندىقتان پارتيامىز بارلىق   مۇددەلى توپپەن جۇمىس ىستەۋگە دايىن»، – دەدى ماۋلەن ساعاتحانۇلى.

ايتا كەتەيىك، وتىرىستىڭ مودەراتورلىق مىندەتىن ادەتتەگىدەي «Talap» قولدانبالى زەرتتەۋلەر ورتالىعىنىڭ ديرەكتورى راحىم وشاقباەۆ اتقاردى. ال قوعام قايراتكەرى، ساياساتتانۋشى ايدوس سارىم، پارلامەنت ءماجىلىسىنىڭ زاڭناما جانە سوت-قۇقىقتىق رەفورما كوميتەتىنىڭ توراعاسى نۇرلان ءابدىروۆ، قازاقستان رەسپۋبليكاسىنىڭ پرەزيدەنتى جانىنداعى قازاقستان ستراتەگيالىق زەرتتەۋلەر ينستيتۋتى ديرەكتورىنىڭ ورىنباسارى سانات كوشكىنباەۆ جانە Nur Otan پارتياسى جانىنداعى ستراتەگيالىق باستامالار ينستيتۋتى ديرەكتورىنىڭ ورىنباسارى ەۆگەني كوچەتوۆ پىكىرتالاسقا اتسالىسىپ، تاقىرىپقا بايلانىستى ءوز پىكىرلەرىن ءبىلدىردى.

سوڭعى جاڭالىقتار