27 ناۋرىز 2019, 10:56 917 0 قوعام نازىم تويلىباەۆا

قازاقستاندا ورالمانداردىڭ مارتەبەسى ۇزارتىلدى

قر ەڭبەك جانە حالىقتى الەۋمەتتىك قورعاۋ مينيسترلىگى قازاقستاندا ازاماتتىق الماعان ورالماندارعا مارتەبەسىن ۇزارتۋعا قاتىستى تۇسىنىكتەمە بەردى، دەپ حابارلايدى قازاقپارات.

«تاۋەلسىزدىك العان ساتتەن باستاپ قازاقستان ەتنيكالىق قازاقتاردىڭ ەلگە ەرىكتى تۇردە ورالۋىن ىنتالاندىرۋ ساياساتىن جۇرگىزەدى. 1991 جىلدان باستاپ 303 مىڭ وتباسى نەمەسە 1 ملن 40 مىڭ ەتنيكالىق قازاق تاريحي وتانىنا قونىستاندى جانە ورالمان مارتەبەسىن الدى. بۇل كورسەتكىش ەل حالقىنىڭ 6 پايىزىن قۇرايدى. وسىنىڭ ارقاسىندا كوشى-قوننىڭ تەرىس سالدوسىنىڭ دەڭگەيىن تومەندەتىپ، دەموگرافيالىق وسىمگە قول جەتكىزىلدى. ولاردىڭ كوپشىلىگى ازاماتتىقتى الىپ، باسقا قازاقستاندىقتارمەن تەڭدەي ەلىمىزدىڭ الەۋمەتتىك-ەكونوميكالىق دامۋىنا قوماقتى ۇلەس قوسىپ كەلەدى. قازاقستاندا ەتنيكالىق رەپاتريانتتاردىڭ بەيىمدەلۋى مەن ينتەگراتسيالاۋ كۇشىن بارىنشا قولايلى جاعدايلار جاسالعان. وسىلايشا، ورالمان مارتەبەسىن العاندارعا قازاقستان رەسپۋبليكاسىنىڭ ازاماتتىعىن جەڭىلدەتىلگەن تارتىپپەن الۋعا قۇقىعى بار (قالعان شەتەلدىكتەر قازاقستاندا كەمىندە 5 جىل تۇرۋى قاجەت)»، - دەلىنگەن مينيسترلىك حابارلاماسىندا.

سونىمەن قاتار، ورالمان مارتەبەسى ونى العان كۇننەن باستاپ ءبىر جىل وتكەن سوڭ توقتاتىلادى. ورالمان مارتەبەسىن ۇزارتۋ ورالمان مارتەبەسى توقتاتىلعان كۇننەن باستاپ ءۇش ايدان اسپايتىن مەرزىمگە ءوتىنىش بەرگەن كەزدە جەڭىلدەتىلگەن تارتىپپەن ازاماتتىق الۋ ماقساتتارى ءۇشىن عانا كوزدەلەدى.

«بۇگىنگى تاڭدا قاراستىرىلعان ۋاقىت ىشىندە جەڭىلدەتىلگەن تارتىپپەن قازاقستاندىق ازاماتتىعىن الماعان ورالماندار قانداي جاعدايدىڭ تۋىنداۋى سەبەپتەرىنە قاراماستان، مۇنداي مۇمكىندىكتەن ايىرىلادى. قر ەڭبەك جانە حالىقتى الەۋمەتتىك قورعاۋ مينيسترلىگىنە وسى ماسەلەنى شەشۋگە كومەك كورسەتۋ بويىنشا كوپتەگەن وتىنىشتەر كەلىپ تۇسۋدە. وسىعان بايلانىستى، اعىمداعى جىلدىڭ 16 ناۋرىزىندا قازاقستان رەسپۋبليكاسىنىڭ پرەزيدەنتى - ەلباسى نۇرسۇلتان نازارباەۆ ازاماتتىقتى جەڭىلدەتىلگەن تارتىپپەن الۋ ءۇشىن ورالماندار مارتەبەسىن 2019 جىلدىڭ 31 جەلتوقسانىنا دەيىن ۇزارتۋ تۋرالى شەشىم قابىلدادى. وسىلايشا، مارتەبەسى اياقتالعان ورالماندار ونى ۇزارتۋ ءۇشىن جەرگىلىكتى اتقارۋشى ورگاندارعا جانە قازاقستاندىق ازاماتتىعىن جەڭىلدەتىلگەن تارتىپپەن الۋ ءۇشىن ىشكى ىستەر ورگاندارىنا جۇگىنە الادى»، - دەپ اتاپ وتىلگەن ۆەدومستۆو مالىمەتىندە.

 

سوڭعى جاڭالىقتار