24 ناۋرىز 2019, 13:58 922 0 قوعام نازىم تويلىباەۆا

مانەرلەپ سىرعاناۋ: ەليزابەت تۇرسىنباەۆا ءوز ونەرىن دەنيس تەنگە ارنادى

جاپونيانىڭ سايتاما قالاسىندا مانەرلەپ سىرعاناۋدان الەم چەمپيوناتىندا جوعارى ورىن العاندار گالاباعدارلامادا ءوز ونەرلەرىن كورسەتتى، دەپ حابارلايدى قازاقپارات.

وسى الەم بىرىنشىلىگىندە كۇمىس جۇلدەگەر اتانعان قازاقستاندىق ەليزابەت تۇرسىنباەۆا ءوز ونەرىن ومىردەن ەرتە كەتكەن دەنيس تەنگە ارنادى.

ەليزابەت قازاقستاننىڭ كوك بايراعىن سان جارىستا بيىككە جەلبىرەتىپ، 2014 جىلعى سوچي وليمپياداسىنىڭ جۇلدەگەرى اتانعان دەنيس تەنگە دەگەن قۇرمەتىن وسىلايشا ءبىلدىردى.

د.تەن 2013 جىلعى الەم چەمپيوناتىندا قازاقستان تاريحىندا العاش رەت كۇمىس جۇلدەگەر اتاندى. سوچيدەن كەيىن 2015 جىلى دۇنيەجۇزىلىك دودادا قولا مەدالگە دە يە بولدى. 25 جاسىندا قاراقشىنىڭ قولىنان قازا تاپپاعاندا، دەنيستىڭ الار بيىگى از بولماس ەدى.

ال ە.تۇرسىنباەۆا قازاق قىزدارى اراسىندا تۇڭعىش رەت الەم چەمپيوناتىنىڭ كۇمىس جۇلدەسىن يەلەندى. وعان قوسا ەتەري تۋتبەريدزەنىڭ شاكىرتى وسى دۇنيەجۇزىلىك دودادا ءتورت اينالىمدىق سالحوۆ ەلەمەنتىن العاش ورىنداعان مانەرلەپ سىرعاناۋشى رەتىندە ەسىمىن تاريحقا جازدى.

ەليزابەتتىڭ اكەسى بايتاق تۇرسىنباەۆتىڭ سوزىنە قاراعاندا، قىزى ەندى جاراقاتتارىنان تولىق ەمدەلەدى. سودان كەيىن جاڭا اسۋلار كۇتىپ تۇر.

ەسكە سالا كەتەيىك، بۇدان بۇرىن ەليزابەت تۇرسىنباەۆانىڭ الەم چەمپيوناتىنىڭ كۇمىس جۇلدەگەرى اتانعانىن جازعان بولاتىنبىز.

 

سوڭعى جاڭالىقتار