13 ناۋرىز 2019, 16:15 920 0 دەنساۋلىق نازىم تويلىباەۆا

تۇركىستاندا انا مەن بالا دارىگەرىن دايارلايتىن ورتالىق اشىلدى

بۇگىن تۇركىستان وبلىسىندا تۇڭعىش رەت  وبلىستىق دەنساۋلىق ساقتاۋ باسقارماسىنىڭ جانە بۇۇ-نىڭ بالالار قورىنىڭ (يۋنيسەف) ۇيىمداستىرۋىمەن مەديتسينالىق قىزمەتكەرلەردىڭ بىلىكتىلىگىن ارتتىرۋعا باعىتتالعان وقۋ ورتالىعى اشىلدى. سالتاناتتى راسىمگە يۋنيسەف-ءتىڭ قازاقستانداعى وكىلى يۋري وكساميتنىي، تۇركىستان وبلىسى دەنساۋلىق ساقتاۋ باسقارماسىنىڭ باسشىسى مۇقان ەگىزباەۆ جانە وبلىستىڭ مەديتسينالىق قوعامداستىق وكىلدەرى قاتىستى. بۇل تۋرالى تۇركىستان وبلىسى اكىمىنىڭ ءباسپاسوز قىزمەتى حابارلادى.

اتالعان ورتالىق الداعى ۋاقىتتا اياعى اۋىر ايەلدەر مەن كىشكەنتاي بالالارى بار وتباسىلار ءۇشىن امبەباپ-وزىق ۇلگىدەگى كەشەندى قىزمەت كورسەتە الاتىن پاتروناجدى مەدبيكەلەردى دايىنداپ شىعاراتىن بولادى. ورتالىق جىل سايىن مىڭداعان پاتروناجدى مەدبيكەلەرگە، دارىگەرلەرگە، الەۋمەتتىك قىزمەتكەرلەرگە، سونداي-اق پسيحولوگتارعا بالالاردىڭ تولىققاندى  دامۋى جايلى اتا-انالاردى اقپاراتتاندىرۋعا قاجەتتى بىلىممەن قامتاماسىز ەتپەك. نەگىزگى ماقساتى – دۇرىس ءبىلىم بەرەتىن مەكەمەلەردى قۇرۋ جانە دەنساۋلىق ساقتاۋ جۇيەسىنە قاجەتتى انا مەن بالانىڭ دەنساۋلىعىن قورعايتىن مەديتسينالىق جانە الەۋمەتتىك قىزمەتكەرلەردىڭ سانى مەن ساپاسىن جاقسارتۋدى قامتاماسىز ەتۋ.

ايتا كەتەرلىگى، ورتالىق كىشى جاستاعى بالالاردىڭ تولىق دامۋى سالاسىنداعى يۋنيسەف پەن ددسۇ-نىڭ حالىقارالىق ستاندارتتارىنا سايكەس كەلەتىن وزىق ءبىلىمى بار دارىگەرلەردى، پاتروناجدى مەدبيكەلەر مەن الەۋمەتتىك قىزمەتكەرلەردى وقىتىپ شىعارۋعا قاجەتتى قۇرالدارمەن تولىقتاي جابدىقتالعان.

سونداي-اق، ورتالىقتىڭ اشىلۋىنا وراي تۇركىستان وبلىسى اكىمدىگى مەن يۋنيسەف-ءتىڭ قازاقستانداعى وكىلى اراسىندا مەموراندۋم ءتۇزىلدى. حالىقارالىق ۇيىم وكىلى يۋري وكساميتنىيمەن كەزدەسكەن وبلىس اكىمى ومىرزاق شوكەەۆ  جاڭا ورتالىقتىڭ اشىلۋىمەن قۇتتىقتادى.

«رەسۋرستىق ورتالىقتىڭ اشىلۋى ءبىزدىڭ ءوڭىر ءۇشىن ماڭىزدى وقيعا. بالالاردىڭ دەنساۋلىعىن جاقسارتۋ – باستى نازاردا بولۋى قاجەت. بالالاردىڭ دەنساۋلىعىنا بارىنشا كومەك كورسەتۋدە ءبىز قولدان كەلگەن كومەگىمىزدى ايامايمىز.  جاقىن ارادا ورتالىقتىڭ جۇمىسى ءبىزدىڭ وڭىردەگى اياعى اۋىر ايەلدەر مەن كىشكەنتاي بۇلدىرشىندەرى بار وتباسىلاردىڭ دەنساۋلىعى مەن ءال-اۋقاتىن جاقسارتۋعا وڭتايلى اسەر ەتەتىندىگىنە سەنىمدىمىن»، – دەدى ومىرزاق شوكەەۆ.

ءوز كەزەگىندە يۋنيسەف-ءتىڭ قازاقستانداعى وكىلى ەكىجاقتى كەلىسىمگە ريزاشىلىعىن ءبىلدىرىپ، ورتالىقتا الداعى ۋاقىتتا بىلىكتى ماماندار دايارلاناتىنىن جەتكىزدى.

 

سوڭعى جاڭالىقتار