12 ناۋرىز 2019, 11:04 781 0 سىرتقى ساياسات نازىم تويلىباەۆا

الجير پرەزيدەنتى بۋتەفليكا سايلاۋعا تۇسپەيتىنىن مالىمدەدى

الجير پرەزيدەنتى ابدەلازيز بۋتەفليكا بەسىنشى رەت پرەزيدەنت سايلاۋىنا تۇسپەيتىنىن مالىمدەدى. ول 18 ساۋىرگە جوسپارلانعان پرەزيدەنت سايلاۋىن كەيىنگە شەگەردى. 82 جاستاعى بۋتەفليكانىڭ حاتىن 11 ناۋرىزدا الجيرلىك APS اقپارات اگەنتتىگى جاريالادى، دەپ حابارلايدى  centralasian.org.

بۋتەفليكا جىل سوڭىنا دەيىن ەلدە رەفەرەندۋم ارقىلى جاڭا كونستيتۋتسيا قابىلداناتىنىن، سايلاۋ ودان كەيىن وتەتىنىن مالىمدەدى.

APS اقپارات اگەنتتىگىنىڭ حابارلاۋىنشا، ەل پرەمەر-ءمينيسترى احمەد ۋياحيا باستاعان ۇكىمەت وتستاۆكاعا كەتكەن. ونىڭ ورنىنا وسىعان دەيىن ىشكى ىستەر ءمينيسترى بولعان نۋرەددين بەدۋي تاعايىندالدى.

10 اقپاندا الجير پرەزيدەنتى ابدەلازيز بۋتەفليكا ساۋىردە وتەتىن سايلاۋعا قاتىساتىنىن جاريالاعان. ونىڭ جازباشا مالىمدەمەسىن مەملەكەتتىك تەلەارنالاردىڭ ءبىرى تاراتتى. وسىدان كەيىن ەلدە جاستار جاپپاي نارازىلىققا شىعىپ، بۋتەفليكانىڭ بيلىكتەن كەتۋىن تالاپ ەتىپ جاتىر. 2 ناۋرىزدا مىڭداعان ادامنىڭ نارازىلىعىن پوليتسيا كۇشپەن باسۋعا تىرىسقان. پوليتسيامەن قاقتىعىستا 180-گە جۋىق ادام زارداپ شەككەن.

بۋتەفليكا بۇعان دەيىن ءتورت رەت سايلاۋعا ءتۇسىپ، جەڭىسكە جەتكەن. 2013 جىلى ينسۋلت الىپ، سودان بەرى جۇرت الدىنا شىقپادى. مالىمدەمەلەرىن ەلدەگى تەلەارناداعى تەلەجۇرگىزۋشىلەر نەمەسە ماڭايىنداعى كومەكشىلەرى وقىپ ءجۇر. حالىقارالىق اقپارات اگەنتتىكتەرى بۋتەفليكانىڭ قازىر شۆەيتساريادا ەمدەلىپ جاتقانىن حابارلاعان. ول 11 ناۋرىزدا شۆەيتساريادان ەلگە ورالعان. الەمدىك اقپارات قۇرالدارىنىڭ جازۋىنشا، التى جىل بۇرىن ينسۋلت العان بۋتەفليكانىڭ ءجۇرىپ-تۇرۋى قيىن.

1991 جىلى الجيردە يسلاميستىك توپتار مەن بيلىك اراسىندا ازاماتتىق سوعىس باستالدى. بۋتەفليكا بيلىككە ەلدەگى ازاماتتىق سوعىس كەزىندە، 1999 جىلى، كەلدى. ول الجيردەگى ازاماتتىق سوعىستى توقتاتىپ، ەلدە بەيبىتشىلىك ورناتتى. قازىر نارازىلىققا شىققانداردىڭ اراسىندا "پرەزيدەنتكە قارسى ەمەسپىز، ول الجير ءۇشىن كوپ ءىس تىندىردى. بىراق قازىر پرەزيدەنت بولۋعا دەنساۋلىعى كەلمەيدى" دەيتىندەر دە بار.

سوڭعى جاڭالىقتار