5 ناۋرىز 2019, 16:51 914 0 قوعام نازىم تويلىباەۆا

قازاقستاندا التىن وندىرەتىن تاعى ءبىر كاسىپورىن اشىلادى

الماتى وبلىسىنىڭ سارقان اۋدانىندا التىن وندىرەتىن فابريكا مامىر ايىندا جۇمىسىن باستايدى. بۇل تۋرالى اۋدان اكىمى مارات رازبەكوۆ وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا ايتتى، دەپ حابارلايدى قازاقپارات.

التىن وندىرەتىن كاسىپورىن بالقاش كولىنىڭ جاعالاۋىندا ورنالاسپاق. جاڭا جوباعا 1,6 ملرد تەڭگە ينۆەستيتسيا تارتىلدى. سارقان اۋدانىنىڭ اكىمى مارات رازبەكوۆتىڭ ايتۋىنشا، زاۋىتقا بۇگىنگى كۇنى بارلىق تەحنيكالار الىنىپ، دايىنداق جۇمىستارى پىسىقتالۋدا.

«اۋدان ەكونوميكاسى بىلتىرعى جىلى قارقىندى دامۋ كورسەتكىشتەرىنە قول جەتكىزىپ، بىرقاتار زاۋىت ىسكە قوسىلدى. ونەركاسىپتى العا جىلجىتۋ شەڭبەرىندە 2019 جىلعا دا جوبالار وتە كوپ. سونىڭ ءبىرى - التىن شىعارۋ زاۋىتى. ول ءوز جۇمىسىن باستاسا، 60-قا جۋىق  ادام ۆاحتالىق جۇمىسپەن قامتىلماق. قازىرگى تاڭدا التىننىڭ سىنامالارى الىندى، ولار زەرتحانالاردا تەكسەرىلىپ، وڭ ناتيجەلەر كورسەتۋدە» ،- دەيدى ول.

جالپى العاندا، سارقان اۋدانىنىڭ بيۋدجەت كىرىسى 1 ملرد 334 ملن تەڭگەنى قۇراپ، بىلتىرعى جىلمەن سالىستىرعاندا 107 پايىزعا وسكەن.

سونداي-اق اۋدان باسشىسى 2019 جىلى اتقارىلاتىن جۇمىستارعا دا توقتالىپ ءوتتى. اۋىل شارۋاشىلىعى بويىنشا وندىرىلگەن ءونىم كولەمىن  35 ملرد تەڭگەگە جەتكىزۋ كوزدەلىپ وتىر. بيىل 2850 گەكتارعا قانت قىزىلشاسى سەبىلەدى. ونەركاسىپ ءوندىرىسىنىڭ كولەمىن 4 ملرد 90 ملن تەڭگەگە جەتكىزىلمەك.

كوكتەم ايلارىندا ەلباسىنىڭ «ۇلى دالانىڭ جەتى قىرى» اتتى ماقالاسىنا سايكەس توپولەۆكا اۋىلىندا «سيۆەرس» الماسىنىڭ گۇلدەنۋىنە ارنالعان فەستيۆال ۇيىمداستىرىلادى.

 

سوڭعى جاڭالىقتار