4 ناۋرىز 2019, 12:36 1977 0 ءبىلىم نازىم تويلىباەۆا

 «T2T Networking» جوباسىنىڭ ماقساتى قانداي؟

قازاق ۇلتتىق قىزدار پەداگوگيكالىق ۋنيۆەرسيتەتىنىڭ جاس عالىمدارىنىڭ باستاماسىمەن قولعا الىنعان «T2T Networking» جوباسى قىزىلوردا وبلىسىنداعى مەكتەپتەرگە تانىستىرىلدى. بۇل تۋرالى وقۋ ورنىنىڭ ءباسپاسوز قىزمەتىنىڭ جەتەكشىسى جاندار اسان حابارلادى.

قىزدار ۋنيۆەرسيتەتىنىڭ بازاسىندا قۇرىلعان قازاقستاننىڭ جاس پەداگوگ-عالىمدارى قاۋىمداستىعىنىڭ ۇيىتقى بولۋىمەن قولعا الىنعان باستاما ورتا ءبىلىم بەرۋ سالاسىندا باسشىلىق قىزمەت اتقاراتىن ۋنيۆەرسيتەت تۇلەكتەرى مەن ەلىمىزدىڭ پەداگوگيكالىق جوعارى وقۋ ورنىنداعى جاس عالىمداردىڭ ورتاق ديالوگ الاڭىن قۇرىپ، اۋىلدىق مەكتەپتەردىڭ عىلىمي-پەداگوگيكالىق الەۋەتىن كوتەرۋدى ماقسات تۇتادى.

بۇعان دەيىن «T2T Networking» جوباسى الماتى وبلىسىندا ۇيىمداستىرىلعان بولاتىن. جۋىردا جاس عالىمدار قىزىلوردا وبلىسىنداعى بىرنەشە مەكتەپكە ارنايى ءىس-ساپارمەن بارىپ، مەكتەپ مۇعالىمدەرى مەن وقۋشىلارىنا جاڭارتىلعان ءبىلىم بەرۋ باعدارلاماسىنا ارنالعان كەشەندى رەسپۋبليكالىق سەمينار-ترەنينگتەر جۇرگىزدى. اتاپ ايتقاندا، شارا بارىسىندا حيميا عىلىمدارىنىڭ PhD دوكتورى ءمولدىر ابدرايموۆا مەكتەپ باسشىلارى مەن وقۋشىلارعا قىزدار ۋنيۆەرسيتەتى تۋرالى تولىققاندى مالىمەت بەرىپ، قازاقستان جاس پەداگوگ-عالىمدارى قاۋىمداستىعىنىڭ جۇمىس بارىسىمەن تانىستىردى. ال، فيلولوگيا عىلىمدارىنىڭ PhD دوكتورى، قازاق ادەبيەتى كافەدراسىنىڭ مەڭگەرۋشىسى نارگيزا بالتاباەۆا «ۇبت-نىڭ جاڭا فورماتى جانە ماماندىقتار تۋرالى تولىق مالىمەت»، «جاڭاشا وقىتۋ – زامان تالابى» تاقىرىبىندا شەبەرلىك سىنىبىن، PhD دوكتورى شاحيسلام لايسحانوۆ «عارىشتىق تۇسىرىلىمدەردى پايدالانۋ ارقىلى ەكولوگيالىق ماسەلەلەردى انىقتاۋ»، پسيحولوگ ايسۇلۋ اۋباكىر «وزىڭە دەگەن ماحاببات – ومىرگە دەگەن ماحاببات» تاقىرىبىندا ترەنينگتەر وتكىزدى. سونداي-اق قولونەر شەبەرلەرى ساندىك-قولدانبالى ونەر، اشەكەي  بۇيىمداردى ازىرلەۋگە ارنالعان شەبەرلىك سىنىبىن جۇرگىزدى. جيىنعا شيەلى اۋدانىنداعى جاس ماماندار دا قاتىستى.

– جاستار جىلى مەن قىزدار ۋنيۆەرسيتەتىنىڭ 75 جىلدىعى اياسىندا قولعا الىنعان جوبانىڭ كوزدەگەن ماقساتى مول. بۇل باستاما – وقۋ ورنى تۇلەكتەرىنىڭ باسەكەگە قابىلەتتىگىن ارتتىرىپ، ولاردىڭ جۇمىسپەن قامتاماسىز ەتۋىنە ىقپال جاسايدى. سونىمەن قاتار پەداگوگتاردىڭ كاسىبي الەۋەتىن جەتىلدىرەدى جانە ءبىلىم بەرۋدە جاڭا تەحنولوگيالاردى قولدانۋدى دامىتادى. ءبىزدىڭ وقۋ ورنى ستۋدەنتتەرىنىڭ باسىم بولىگى اۋىلدىق مەكتەپتەردىڭ تۇلەگى ەكەندىگىن ەسكەرەتىن بولساق، اتالعان ءبىلىم ۇيالارى جاڭا ءبىلىم بەرۋ باعدارلامالارىن تولىققاندى مەڭگەرىپ، جەتە تانىسقانى وتە ماڭىزدى، – دەيدى جوبا اۆتورلارى.

جاس ىزدەنۋشىلەر قىزىلوردالىق جاس مامانداردى قازاقستاننىڭ جاس پەداگوگ-عالىمدارى قاۋىمداستىعىمەن بىرلەسە جۇمىس ىستەۋگە شاقىردى. ءوز كەزەگىندە شيەلى اۋداندىق ءبىلىم ءبولىمىنىڭ باسشىسى بولات سەيىلحانوۆ جاس عالىمدارعا يگىلىكتى ىسكە ۇيىتقى بولىپ وتىرعاندارى ءۇشىن العىسىن ءبىلدىرىپ، بۇل باستاما ايماقتاعى مەكتەپ مۇعالىمدەرىنىڭ الەۋەتىن كوتەرۋگە سەرپىن بەرەتىندىگىن اتاپ ءوتتى.

وڭىرگە جاساعان ساپار اياسىندا جاس عالىم-پەداگوگتار قىزىلوردا قالاسىنداعى «بولاشاق» ۋنيۆەرسيتەتىندە ۇيىمداستىرىلعان «زاماناۋي عىلىمنىڭ بولاشاعى – جاستاردىڭ قولىندا» تاقىرىبىنداعى رەسپۋبليكالىق جيىنعا قاتىستى. القالى كەڭەسكە مۇحتار اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىنىڭ، «بولاشاق» ۋنيۆەرسيتەتىنىڭ دە جاس ىزدەنۋشىلەرى قاتىسىپ، سالاداعى تۇيىتكىلدى ماسەلەلەردى تالقىلادى. باسقوسۋ بارىسىندا قىزدار ۋنيۆەرسيتەتىنىڭ PhD دوكتورى جۇلدىز بازاەۆا «لاتىن گرافيكاسىنا نەگىزدەلگەن قازاق ءالىپبيىن ۇيرەتۋدىڭ يننوۆاتسيالىق ادىستەرى»، اعا وقىتۋشى گۇلميرا ماحانوۆا «قولدانبالى قولونەر»، عىلىم ماگيسترى قايىردەن باەتوۆ «ماتەماتيكانى اعىلشىن تىلىندە وقىتۋ»، وقىتۋشى شىنار اسىلبەكوۆا «ءبىلىم بەرۋ جۇيەسىندە ەلەكتروندى رەسۋرستاردى پايدالانۋدىڭ تيىمدىلىگى» تاقىرىبىندا شەبەرلىك سىنىبىن وتكىزدى.

جيىن سوڭىندا قازاقستاننىڭ جاس پەداگوگ-عالىمدارى قاۋىمداستىعى مەن «بولاشاق» ۋنيۆەرسيتەتى ءوزارا ىنتىماقتاستىق تۋرالى مەموراندۋمعا قول قويدى. قۇجاتتا بىرلەسكەن ءبىلىم بەرۋ باعدارلامالارىن، وقۋ-ادىستەمەلىك قۇرالدارىن ازىرلەۋ، ستۋدەنتتەردىڭ بىرلەسكەن عىلىمي زەرتتەۋلەرى مەن جوبالارىن جۇزەگە اسىرۋ، پەداگوگ قىزمەتكەرلەردىڭ بىلىكتىلىگىن ارتتىرۋعا ىقپال ەتۋ سىندى ماسەلەلەر قاراستىرىلعان.

–  الداعى ۋاقىتتا قىزىلوردا وبلىسىنداعى جەتەكشى جوعارى وقۋ ورنىنىڭ ءبىرى – «بولاشاق» ۋنيۆەرسيتەتىنىڭ بازاسىندا قىزدار ۋنيۆەرسيتەتىنىڭ قازاق ادەبيەتى كافەدراسىنىڭ فيليالى اشىلماق. بۇل قوس ءبىلىم ورداسى اراسىنداعى ارىپتەستىكتى جاڭا دەڭگەيگە كوتەرۋگە ىقپال ەتەدى، – دەيدى قاۋىمداستىق توراعاسى ءمولدىر ابدرايموۆا.

جوبا ۇيىمداستىرۋشىلارىنىڭ ايتۋىنشا، الداعى ۋاقىتتا بۇل شارا ەلىمىزدىڭ وزگە دە وڭىرلەرىندە جالعاسىن تاپپاق.

ايتا كەتەيىك، وتكەن جىلدىڭ ءساۋىر ايىندا قازاقستاننىڭ جاس پەداگوگ-عالىمدارىنىڭ ءبىرىنشى رەسپۋبليكالىق سلەتى قارساڭىندا وتاندىق جاس پەداگوگ-عالىمداردىڭ قاۋىمداستىعى قۇرىلعان بولاتىن. قۇرىلتايشىسى قىزدار ۋنيۆەرسيتەتى بولىپ تابىلاتىن ۇيىمدى قۇرۋداعى باستى ماقسات – مەملەكەت پەن قوعام دامۋىنا بەلسەندى قىزمەت ەتەتىن، جاڭاشا تۇرعىدا ويلاي الاتىن جاس پەداگوگ-عالىمداردى بىرىكتىرۋ، ولاردىڭ ديالوگ الاڭىن قۇرۋ. سونىمەن قاتار ءبىلىم مەن عىلىم سالاسىنداعى وزەكتى ماسەلەلەر بويىنشا جاس پەداگوگتاردىڭ جۇيەلەنگەن پىكىرلەرىن مۇددەلى تاراپتارعا جەتكىزۋ، وقىتۋ مەن تاربيەلەۋدىڭ ءتيىمدى تەحنولوگيالارىمەن الماسۋ دا قاراستىرىلعان. قاۋىمداستىققا 35 جاسقا دەيىنگى جوعارى ءبىلىم بەرۋ جۇيەسىندە قىزمەت ەتەتىن، پەداگوگيكا سالاسىندا عىلىمي-زەرتتەۋ تاجىريبەسى بار وقىتۋشىلار مۇشە بولا الادى.

سوڭعى جاڭالىقتار