28 اقپان 2019, 10:36 822 0 قوعام "تۇركىستان" گازەتىنىڭ اۆتورلارى

ۇلتتىق بولمىستىڭ وزەگى نەدە؟

عاسىرلاردان جالعاسىپ، تەكتىلىك تەگەۋرىنىن ۇعىندىرعان ابزال جاندار جانىن شۇبەرەككە تۇيە ءجۇرىپ، اياۋلى انا تاس ەمشەگىن جىبىتسە، ارداقتى اكە ار نامىس ابىرويىن بيىك ۇستادى. تاعدىر اتقان جەبەگە كەۋدەسىن توستى. قاجىر-قايراتتىڭ ارقاسىندا قايماعى بۇزىلماعان قادىر-قاسيەتىمىزدى ايالاپ، ۇلتتىق بولمىستى ۇرپاققا امانات ەتتى.

بۇل كۇندە كەيبىر ۇرپاق كونەنىڭ كوزىن كەرىتارتپالىققا ساناپ ءجۇر. باسىن بايگەگە تىككەن بابالارىمىزدىڭ اسقاق ارمانىن اياقاستى ەتىپ، اماناتقا قيانات جاساۋدا. وعان قىنجىلىپ جۇرگەندەردىڭ قاتارى ساۋساقپەن سانارلىق. تامىرىنا سىڭىرگەن تاعلىم تۇگەسىلىپ، قۇر-الاقان قالارىن ىشتەرى سەزسە دە، سەلت ەتپەيدى. زامان تالابى دەگەن سىلتاۋدى ساناسىنا قۇيىپ العان. وسكەلەڭ ۇرپاق ەلىكتەۋدىڭ يىرىمىنە بوي الدىرىپ، جۇمباعىنا جۇتىلىپ بارادى.

اسىلىندە ۇلتتىق بولمىستى ساقتاۋ – رۋحاني جاڭعىرۋدىڭ باستى شارتى ەمەس پە؟ بۇل تۇيتكىلگە نەمقۇرايلى قاراۋعا بولمايدى.

«بۇگىندە ءتول تاريحىمىزعا وڭ كوزقاراس كەرەك. بىراق قانداي دا ءبىر تاريحي وقيعانى تاڭدامالى جانە كونيۋنكتۋرالىق تۇرعىدان عانا سيپاتتاۋمەن شەكتەلۋگە بولمايدى. اق پەن قارا – ءبىر-بىرىنەن اجىرامايتىن ۇعىمدار. بۇلار ءوزارا بىرلەسكەندە جەكە ادامداردىڭ دا، تۇتاس حالىقتاردىڭ دا ومىرىنە قايتالانباس رەڭك بەرەدى. ءبىزدىڭ تاريحىمىزدا قاسىرەتتى ساتتەر مەن قايعىلى وقيعالار، سۇراپىل سوعىستار مەن قاقتىعىستار، الەۋمەتتىك تۇرعىدان قاۋىپتى سىناقتار مەن ساياسي قۋعىن-سۇرگىندەر از بولمادى. مۇنى ۇمىتۋعا حاقىمىز جوق. كوپقىرلى ءارى اۋقىمدى تاريحىمىزدى دۇرىس ءتۇسىنىپ، قابىلداي ءبىلۋىمىز كەرەك»، – دەدى قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ.

وسىدان ءبىر جارىم جىل بۇرىن ەلباسى جاريالاعان «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىنىڭ جالعاسى رەتىندە قاراستىرىلعان «ۇلى دالانىڭ جەتى قىرى» اتتى ماقالاسىنان ۇلتتىق بولمىستى ساقتاۋدىڭ باستى وزەگى انا تىلىمىزدە بولسا، قاينار كوزى ءتول تاريحىمىزدا ەكەنىن ايقىن اڭعارۋعا بولادى.

«انا ءتىلىنسىز حالىق بولمايدى. تىلىنەن ايىرىلعان ۇلت – تاريحىنان، ءتۇپ-تامىرىنان ايىرىلعان ۇلت. ءتىلسىزدى ۇلت دەۋگە بولمايدى. تىلىنەن ايىرىلعان حالىق – اتا-باباسىنىڭ، تۋعان اكەسى مەن اناسىنىڭ اتىن ۇمىتقان حالىق. ال وندايلاردى ماڭگۇرت دەپ اتايدى»، – دەيدى بەلگىلى جازۋشى پۋبليتسيست شەرحان مۇرتازا. ماڭگۇرتتىكتەن ۇلتىمىزدى قىزعىشتاي قورىپ، رۋحاني بايلىعىمىزدىڭ ورتالانۋىنا جول بەرمەۋ كەرەك. بابالارىمىز سالىپ كەتكەن سارا جولدىڭ سۇرلەۋىنەن اداسپاي، ءتىلىمىزدى، ءدىنىمىزدى،ءتول تاريحىمىزدى وسكەلەڭ ۇرپاقتىڭ ساناسىنا قۇيىپ، ساۋلە ەتىپ دارىپتەۋىمىز قاجەت

قابدۋالي ساۋلەت

سوڭعى جاڭالىقتار