28 اقپان 2019, 10:17 1032 0 قوعام دينارا مىڭجاسارقىزى

زەينوللا الشىمباەۆ: بارلىق باعدارلاما – حالىقتىڭ يگىلىگى ءۇشىن

قوعامدىق ءومىردىڭ بەل ورتاسىندا ءجۇرىپ، بەلسەندى ەڭبەگىمەن، ونەگەلى ومىرىمەن، ءبىلىم-بىلىگىمەن، اقىل-پاراساتىمەن، بۇكىل ادامگەرشىلىك اسىل قاسيەتتەرىمەن ەل ازاماتى رەتىندە اتى حالىقتىڭ اۋزىندا جۇرەتىن تۇلعاسى بولەك ازاماتتار بولادى. سونىڭ ءبىرى حالقىنا قالتقىسىز ەڭبەگى سىڭگەن قوعام قايراتكەرى زەينوللا الشىمباەۆ. پارلامەنت مىنبەرىنە جۇرتتىڭ مۇڭ-مۇقتاجىن جەتكىزىپ، شەشىمىن تابۋىنا اتسالىسقان دەپۋتات رەتىندە جۇرتقا بەلگىلى.  

– پارلامەنتتىڭ  3-ءشى جانە 4-شاقىرىلىمدارىنىڭ  دەپۋتاتى كەزىندە ايماقتىڭ جانە ەلىمىزدىڭ وزەكتى ماسەلەلەرى توڭىرەگىندە ۇكىمەتكە، ونىڭ قۇرىلىمدارى باسشىلارىنىڭ اتىنا ءوز باستاماڭىزبەن 79, ارىپتەستەرمەن بىرلەسىپ 100-دەن استام دەپۋتاتتىق ساۋال مەن ۇسىنىس جولداعان ەكەنسىز. سول كەزگە ءسال شەگىنىس جاساڭىزشى، ماسەلە دەر كەزىندە شەشىمىن تابۋشى ما ەدى؟

– ءيا، بەلسەندى دەپۋتات بولدىم دەسەم، ارتىق ايتپاعانىم بولار. اسىرەسە، ەكونوميكا ماسەلەسى نازاردان تىس قالعان جوق. ءوزىم ماڭعىستاۋ وبلىسىنان سايلانعاندىقتان دا، ءوڭىردىڭ جايىن  ءبىر ءسات ەستەن شىعارعان جوقپىن. ناتيجەسىندە جاڭاوزەندەگى «راحات» شاعىن اۋدانى مەن تەڭگە، ماڭعىستاۋ كەنتتەرىندە، اتامەكەن سەلوسىندا جاڭا مەكتەپتەر، جەتىبايدا اۋرۋحانا مەن ەمحانا عيماراتتارى بوي كوتەردى. اقتاۋ قالاسىنداعى ش.ەسەنوۆ اتىنداعى كاسپي مەملەكەتتىك تەحنولوگيالار جانە ينجينيرينگ ۋنيۆەرسيتەتىنىڭ باس عيماراتىن سالۋ تۋرالى باستاما كوتەرىپ، رەسپۋبليكالىق بيۋدجەتتەن قارجى بولدىرۋگە سەپتىگىم ءتيدى. ماڭعىشلاق ستانساسىندا دەربەس اكىمشىلىگى بار «ماڭعىستاۋ تاسىمالداۋ بولىمشەسىن» قۇرۋ، استانا-ماڭعىستاۋ تىكەلەي پويىزىن جۇرگىزۋ، «استانا-اقتاۋ» باعىتىنا ۇشاق ۇشقىزۋ، اقتاۋ حالىقارالىق اۋەجايىنىڭ ينفراقۇرىلىمدارىن كۇردەلى جوندەۋ جانە رەكونسترۋكتسياسى مەن «وزەن – تۇركىمەنستان – يران» تەمىرجول جانە «قىزىلساي – شوپان اتا – وعىلاندى» اۆتوكولىك جولىنا، «قوشقار اتا» ۋلى كولىن رەكۋلتيۆاتسيا جاساۋعا، اقتاۋ قالاسىندا كەمتار بالالارعا مەكتەپ-ينتەرنات سالدىرۋعا قارجى ءبولدىرۋ جانە تاعى باسقا ۇسىنىستاردى ۇكىمەتكە جولداپ، وڭدى شەشىم تاپقانىن ايتا كەتكىم كەلەدى. ءماجىلىس دەپۋتاتى بولىپ جۇرگەن جىلداردا وبلىستىڭ بارلىق تۇكپىرىنەن كومەك سۇراعان، ۇسىنىس-پىكىر ايتقان حاتتار تولاسسىز كەلىپ جاتاتىن. ولاردىڭ بىردە-بىرەۋىن ەسكەرۋسىز قالدىرمايتىن ەدىم. اسىرەسە، زاڭسىزدىققا جول بەرىلىپ، ورىنسىز ءجابىر كورگەن ادامداردىڭ ەسەسىن تۇگەندەپ، زاڭدىلىقتى قالپىنا كەلتىرۋگە ايانباي كىرىسكەن كەزىم از ەمەس.

– ەلباسى جىل سايىن جاريالايتىن جولداۋى مەن باعدارلامالارىندا ەلىمىزدىڭ ءال-اۋقاتىن كوتەرۋگە بايلانىستى بارىنشا جۇمىلا ارەكەت ەتۋگە شاقىرادى. سىزدىڭشە، قازىر حالىقتىڭ ءومىر ءسۇرۋ ساپاسى جاقساردى ما، الدە...

– پرەزيدەنت ن.نازارباەۆتىڭ ءار جىلعى جولداۋى – ەل كۇتەتىن جىلدىڭ ءىرى ساياسي وقيعاسى. ەلباسى ءوزىنىڭ ءبىر كەزەكتى جولداۋىندا «مەن ءاربىر جولداۋىمدا حالىقتىڭ الەۋمەتتىك جاعدايى مەن تۇرمىس ساپاسىن جاقسارتۋعا ەرەكشە ءمان بەرىپ كەلەمىن» دەگەن بولاتىن. وسى رەتتە «نۇرلى جول»، «نۇرلى جەر»، «7-20-25» مەملەكەتتىك باعدارلامالارى مەن «رۋحاني جاڭعىرۋ»، «ۇلى دالانىڭ جەتى قىرى» جانە ت.ب. ۇلتتىق دەڭگەيدەگى جوبالاردىڭ باستى ماقساتى – حالىقتىڭ الەۋمەتتىك جاعدايى مەن تۇرمىس ساپاسىن جاقسارتۋعا، رۋحاني دامۋىنا ارنالعانى بەلگىلى. قازىر كورىپ وتىرعانىمىزداي ەل ەكونوميكاسى قارقىندى دامىپ كەلەدى. سوڭعى 20 جىل ىشىندە ەلىمىزگە 300 ميلليارد اقش دوللارى كولەمىندە  تىكەلەي شەتەل ينۆەستيتسياسى تارتىلدى. بۇل ءوز كەزەگىندە كوپتەگەن ءوندىرىس ورىندارىن اشۋعا، حالىقتى جاڭا جۇمىس ورىندارىمەن قامتۋعا مۇمكىندىك بەردى. يمپورت جانە ەكسپورت وپەراتسيالارىنىڭ كولەمى وسۋدە. ازىرگە، ەلىمىزدەن شيكىزات قورى كوبىرەك شەتەلگە شىعارىلادى. كەلەشەكتە، تەك شيكىزات ەمەس، وزگە دە باسەكەگە قابىلەتتى قازاقستاندىق تاۋارلاردى كوپتەپ شىعارۋ باستى ماقسات بولۋى ءتيىس.

جاقىندا ماڭعىستاۋ وبلىسى اكىمى ە.توعجانوۆتىڭ  جۇرتشىلىق الدىنداعى جىلدىق ەسەبىندە ءوڭىردىڭ ەكونوميكالىق دامۋىنىڭ بارلىق كورسەتكىشتەرىنىڭ وڭ ديناميكاسى اتاپ ءوتىلدى. اتاپ ايتساق، وبلىستا 2,9 ترلن تەڭگەنىڭ ونەركاسىپ ءونىمى ءوندىرىلىپ، ونىڭ ناقتى كولەمى رەسپۋبليكادا وندىرىلگەن ءونىمنىڭ 11 پايىزىن  قۇرادى. بۇل وڭىرلەر اراسىنداعى ەكىنشى كورسەتكىش. ەكسپورتقا باعىتتالعان يندۋستريالاندىرۋ ماسەلەسى ەكونوميكالىق ساياساتتىڭ نەگىزگى ەلەمەنتى بولۋعا تيىستىگى جولداۋدا باسا ايتىلعان بولاتىن. سوندىقتان ونەركاسىپ سالاسىنداعى وڭدەۋ سەكتورىنىڭ دامۋىنا ەكپىن بەرىلۋدە. وڭدەۋشى سەكتورى بويىنشا ءوندىرىستىڭ ءوسۋى 12 پايىزعا ءوستى. ەلباسى شەشىمىمەن بۇل سالاعا الداعى ءۇش جىلدا  قوسىمشا 500 ملرد تەڭگە بولىنگەلى وتىر. بۇل ەكسپورتتىق سەرپىندى جوبالاردى ىسكە اسىرۋعا زور مۇمكىندىك بەرەدى دەگەن ءسوز. جولداۋدا ايتىلعان كەلەسى ءبىر ماڭىزدى ماسەلە – ەڭبەك نارىعىندا ورتا جانە شاعىن بيزنەستى دامىتۋ بولسا، بۇل سالا 108,7 پايىز قۇرادى. 35328 جاڭا جۇمىس ورنى قۇرىلدى. ناتيجەسىندە، جالپى جۇمىسسىزدىق دەڭگەيى 4,8%-كە دەيىن، جاستار جۇمىسسىزدىعى 3,1%-كە دەيىن تومەندەدى. تۇرعىن ءۇي قۇرىلىسىنا سەرپىن بەرىپ وتىرعان «نۇرلى جول» باعدارلاماسى ماڭعىستاۋ وبلىسىندا تابىستى ىسكە اسۋدا. وتكەن جىلى  1,2 ملن شارشى مەتر تۇرعىن ءۇي پايدالانۋعا بەرىلدى. بۇل رەسپۋبليكا بويىنشا ءۇشىنشى كورسەتكىش ەكەنىن ايتا كەتكەن ءجون. مەملەكەت باسشىسىنىڭ تاپسىرماسى بويىنشا «نۇر وتان» پارتياسىنىڭ قامقورلىعىمەن كوپ بالالى از قامتىلعان وتباسىلاردى، مۇگەدەكتەر مەن جەتىم بالالاردى قولداۋعا باعىتتالعان «باقىتتى وتباسى» جوباسىن ىسكە اسىرۋ باعىتىندا ناقتى شەشىمدەر قابىلداندى. بۇگىنگى تاڭدا وڭىردە 28 ملرد تەڭگە سوماسىندا حالىقتىڭ الەۋمەتتىك وسال توپتارىنا مەملەكەتتىك قولداۋ كورسەتۋ كوزدەلۋدە. بۇل سالادا اتقارىلار ىستەر اۋقىمى از ەمەس. ەل ەكونوميكاسىن ودان ءارى دامىتۋ، حالىقتىڭ الەۋمەتتىك تۇرمىس جاعدايىن كوتەرۋ، قابىلدانعان باعدارلامالاردىڭ جۇزەگە اسىرىلۋىن تالداۋ ماسەلەلەرى «نۇر وتان» پارتياسىنىڭ سەزىندە دە كەڭىنەن قارالدى. مۇنىڭ ءبارى حالىق يگىلىگى ءۇشىن.

– البەتتە، سىزگە ماڭعىستاۋ ءوڭىرىنىڭ تىنىس-تىرشىلىگى ەتەنە تانىس. مۇنداعى ءبىلىم بەرۋ، دەنساۋلىق ساقتاۋ، مادەني، شاعىن جانە ورتا كاسىپكەرلىك سالاسىنىڭ دامۋ قارقىنى قالاي؟ 

– ءبىلىم بەرۋ سالاسى بويىنشا وتكەن جىلى 3 241 ورىندى 36 بالاباقشا پايدالانۋعا بەرىلدى. ناتيجەسىندە 3 جاستان 6 جاسقا دەيىنگى بالالاردى بالاباقشامەن قامتاماسىز ەتۋ كورسەتكىشى 97,2% قۇرادى. سونىمەن قاتار، وتكەن جىلى 6300 ورىندىق 9 مەكتەپ پايدالانۋعا بەرىلدى. ستۋدەنتتەر ءۇشىن 210 ورىندىق جاتاقحانا پايدالانۋعا بەرىلدى. جىل سوڭىنا قاراي 460 ورىندىق تاعى ەكى جاتاقحانا سالىنادى. ءبىلىم بەرۋ سالاسىندا «بالالاردى بالاباقشالارعا اۆتوماتتى تۇردە كەزەككە قويۋ» اقپاراتتىق جۇيەسى، ەلەكتروندىق جۋرنالدار مەن كۇندەلىكتەر جۇيەسى ەنگىزىلدى.

دەنساۋلىق ساقتاۋ سالاسى بويىنشا وتكەن جىلى وبلىستىق «انا مەن بالا» پەريناتالدىق ورتالىعى، سونداي-اق، مەملەكەتتىك-جەكەمەنشىك ارىپتەستىك اياسىندا جاڭاوزەندەگى 250 ورىندىق گەمودياليز ورتالىعى پايدالانۋعا بەرىلدى. دەنساۋلىق سالاسىندا تىركەلگەن حالىقتىڭ 94% – ەلەكتروندىق دەنساۋلىق پاسپورتى بار، مەديتسينالىق ۇيىمداردىڭ 89% قاعازسىز قۇجات اينالىمىنا ءوتتى. بىلتىر وبلىستا 7 سپورت نىسانى سالىندى. بيىل جەكە ينۆەستيتسيالار ەسەبىنەن تاعى 11 سپورت نىسانى پايدالانۋعا بەرىلەدى. ناتيجەسىندە 225 مىڭ ادام ۇنەمى سپورتپەن شۇعىلداناتىن بولادى. ەلباسىنىڭ «رۋحاني جاڭعىرۋ» باعدارلاماسى مەن «ۇلى دالانىڭ جەتى قىرى» اتتى ماقالاسى اياسىندا بىرقاتار ءىس-شارالار وتكىزىلدى. ماسەلەن، رەسپۋبليكالىق دەڭگەيدە «امال» مەرەكەسى، «ماڭعىستاۋ وبلىسىنىڭ ماتەريالدىق جانە ماتەريالدىق ەمەس تاريحي-مادەني مۇراسىن» زەرتتەۋ ەكسپەديتسياسى ۇيىمداستىرىلدى. قىسقا مەرزىم ىشىندە جاڭا جاعالاۋدا امفيتەاتر سالىندى. تاۋەلسىزدىك كۇنى قارساڭىندا «ميف الاڭى» اشىلدى. قازاقتىڭ كورنەكتى اقىنى اباي قۇنانباەۆقا جانە قازاق كسر حالىق ءارتىسى نۇرمۇحان جانتورينگە ەسكەرتكىش ورناتىلدى. بيىل دا ايتۋلى مادەني ءىس-شارالار جوسپارلانىپ وتىر. ەڭ الدىمەن، بۇل اتاقتى قازاق جازۋشىسى ءابىش كەكىلباەۆتىڭ 80 جىلدىعىن اتاپ ءوتۋ. بيىل اقتاۋدا ءا.كەكىلباەۆتىڭ مۇراجايى اشىلادى.

وتكەن جىلى ماڭعىستاۋ وبلىسىندا شاعىن جانە ورتا بيزنەستىڭ دامۋى وڭ ديناميكانى كورسەتتى. شاعىن بيزنەستە جۇمىس ىستەيتىندەردىڭ سانى 126 288 ادامعا جەتتى، ولار جالپى سوماسى 792 ملرد تەڭگەگە ءونىم شىعاردى. وسىلايشا، كاسىپكەرلەر 2,2 ميلليارد تەڭگەگە شاعىن نەسيە الدى. «بيزنەستىڭ جول كارتاسى – 2020» باعدارلاماسى اياسىندا 210 جوبا 1,5 ملرد تەڭگەگە سۋبسيديا الدى. «نۇر كاپيتال» ايماقتىق باعدارلاماسى اياسىندا ەكىنشى دەڭگەيلى بانكتەر 3,6 ملرد تەڭگە 200 جوبانى قارادى. ونىڭ ىشىندە 60 جوبا جالپى سوماسى 1,2 ملرد تەڭگەگە قارجىلاندىرىلدى. بۇدان باسقا، 9 جولدىڭ تورابىندا ورنالاسقان ماڭعىستاۋ ورتالىق كولىكتىك-لوگيستيكالىق توراپقا اينالادى. شەتپە – بەينەۋ، قياقتى – تۇششىقۇدىق جولدارىن قايتا جاڭارتۋ جۇمىستارى اياقتالدى. بۇدان باسقا، بيىلعى جىلى 2 جاڭا جوبا (50 كم) ىسكە اسىرىلاتىن بولادى: «اتا جولى» جولى جانە باسقۇدىق ەلدى مەكەنىنەن حالىققا قىزمەت كورسەتۋ ورتالىعىنا دەيىنگى جول. قۇرىق پورتىنىڭ ءبىرىنشى كەزەگى ىسكە قوسىلدى. 2018 جىلى جۇك تاسىمالداۋدىڭ جالپى كولەمى 1,8 ملن توننانى قۇرادى.

وبلىس دامۋىنىڭ تاعى ءبىر ماڭىزدى سالاسى – تۋريزم. وتكەن جىلى قازاقستان مەن شەت ەلدەن 191 مىڭنان استام تۋريستەر وڭىرگە باردى. 2018 جىلى جالپى سوماسى 1 ملرد تەڭگەگە 1,7 شاقىرىم جاعالاۋدى جايلاستىرۋ بويىنشا ۇلكەن جوبا ىسكە اسىرىلدى. سونىمەن قاتار، وسى جىلى ناۋرىزدا «ءتۋريزمدى دامىتۋدىڭ 2019-2023 جىلدارعا ارنالعان» مەملەكەتتىك باعدارلاماسىن قابىلداۋ جوسپارلانۋدا. باعدارلاما اياسىندا جالپى سوماسى 27 ملرد تەڭگەگە ءىرى ينفراقۇرىلىمدىق جوبالار ىسكە اسىرىلماق. بيىل تۋريزم باعىتىندا 4 جاڭا نىساندى ىسكە قوسۋ جوسپارلانۋدا.

– سiز اقش-تا ون جىلدان استام ۋاقىت بويى تۇرىپ كەلدiڭiز. «قازاقستانعا بiراز ينۆەستورلاردى الىپ كەلدiم» دەپ ايتقان ەدىڭىز.

– 1990 جىلدىڭ تامىزىندا ەل باسشىلىعىنىڭ ۇسىنىسى بويىنشا ماڭعىستاۋ وبلىستىق پارتيا كوميتەتىنىڭ ەكونوميكانى رەفورمالاۋ، سىرتقى ەكونوميكالىق بايلانىستاردى دامىتۋ، مۇناي ونەركاسىبىنە ينۆەستيتسيا تارتۋ ماسەلەلەرىنە باسشىلىق جاسايتىن ەكىنشى حاتشىسى بولىپ سايلاندىم. ماڭعىستاۋ وبلىسىنداعى ەركىن ەكونوميكالىق ايماق قۇرۋعا ىقپال ەتۋ جونىندەگى قوردىڭ پرەزيدەنتى قىزمەتىن اتقاردىم. 1991-1992 جىلدارى وبلىس اكىمىنىڭ ورىنباسارى بولا ءجۇرىپ، شارۋاشىلىقتى قايتا قۇرۋ، رەفورمالاۋ جۇمىستارىنا باسشىلىق جاساعانىم بار. وسى كەزدە پرەزيدەنت ن.نازارباەۆتىڭ باستاماسىمەن باسشى كادرلاردى شەتەلدەرگە وقۋعا جىبەرۋ باستالدى. مەن دە تمد ەلدەرىنەن ارنايى ىرىكتەلگەن باسشى قىزمەتكەرلەر قاتارىندا اقش-قا جول تارتتىم. امەريكانىڭ بوستون قالاسىنداعى ماسساچۋسەتس ۋنيۆەرسيتەتىندە وقىپ، اعىلشىن ءتىلىن ۇيرەنىپ، قارجى، بانك جۇيەسى، مەنەدجمەنت، ماركەتينگ جانە ەركىن رىنوك ۇيىمداستىرۋدىڭ قىر-سىرىن مەڭگەردىم. ەلگە ينۆەستيتسيا تارتىپ، ەلىمىزدىڭ وڭ ءيميدجىن قالىپتاستىرۋ جولىندا سول جاقتا ءبىراز جىل قىزمەت ەتۋ قاجەتتىلىگى تۋىندادى. سول ارادا اقش-تاعى تەحاس شتاتىنىڭ حيۋستون قالاسىنداعى «Anglo-Dutch Petroleum International» كومپانياسى شەتەل ينۆەستيتسيالارى جونىندەگى ديرەكتورلىق قىزمەتكە شاقىردى. جاڭا جاعداي، جاڭا جۇمىسقا ءبىر-ەكى جىلدىڭ ىشىندە-اق توسەلىپ الدىم. 2000 جىلى قىزمەتىم جوعارىلاپ، وسى كومپانيانىڭ ۆيتسە-پرەزيدەنتى بولدىم. وسى كومپانيادا قىزمەت جاساي ءجۇرىپ شەتەلدىك ماماندارمەن بىرگە قازاقستان مەن تمد ەلدەرىندەگى مۇناي كەن ورىندارىن يگەرۋدىڭ جوبالىق قۇجاتتارىن جاساقتاۋعا ارالاسىپ جانە وسى كەنىشتەردى يگەرۋگە ينۆەستيتسيا تارتۋ جونىندەگى تايۆان، يزرايل، رەسەي، رۋمىنيا، ۇلىبريتانيا، الجير، گرەكيانىڭ، سونداي-اق، «قازمۇنايگاز»، «وپيك»، «حالليبۋرتون»، «پەترولەۋم»، «شەلل»، «بەيكەر حيۋز»، «لۋكويل»، «دەپەكي» جانە ت.ب. كومپانيالارمەن كەلىسسوز جۇرگىزۋ پروتسەستەرىنە جانە اقش-تىڭ لۋيزيانا شتاتىنداعى «رونەك» كەن ورنىنىڭ ماركەتينگىلەۋ جۇمىستارىنا تىكەلەي قاتىستىم.

وڭىرگە ينۆەستيتسيا تارتۋ – ەلباسىمىزدىڭ العا قويعان باستى مىندەتتەردىڭ ءبىرى. ەگەر وتكەن جىلى جالپى سوماسى 16 ملرد تەڭگە بولاتىن 24 جوبا ىسكە قوسىلعان بولسا، ۇستىمىزدەگى جىلى 66 ملرد تەڭگەگە تاعى  23 جوبا جوسپارلانعان. وبلىستا ءبىر جىلدىڭ ىشىندە 15 جىلىجاي ىسكە قوسىلىپ، جالپى سانى 42-گە جەتتى. ماڭعىستاۋ ءوڭىرى اۋىل شارۋاشىلىعىن دامىتۋعا قولايسىز ەكەنى بەلگىلى. دەگەنمەن بۇل سالانى دامىتۋعا مۇمكىندىكتەر دە از ەمەس. مەملەكەتتىك سۋبسيديالار مەن جەڭىلدىكتەر ۇسىنۋ ارقىلى بۇل سالاعا ناقتى قولداۋ كورسەتىلۋدە. اعىمداعى جىلى اۋىل شارۋاشىلىعى سالاسىنا ينۆەستيتسيالىق قۇنى 2 ملرد تەڭگەگە 4 ءىرى جوبا جوسپارلانعان. ولاردىڭ ىسكە اسۋى ماڭعىستاۋ ءوڭىرىن كوكونىسپەن 25 پايىزعا، قۇس ەتىمەن 50 پايىزعا قامتاماسىز ەتۋگە مۇمكىندىك بەرەدى.

– كەشە «نۇر وتان» پارتياسىنىڭ ءحVىىى سەزى ءوتتى. بۇعان دەيىن جۇكتەلگەن تاپسىرما مەن مەجەلى مىندەت تاعى دا ساراپقا سالىندى. ءسىزدىڭ پىكىرىڭىزدى بىلسەك...

– «نۇر وتان» پارتياسى مەجەلى كەزەڭىنە ۇلكەن تابىستارمەن كەلىپ وتىر. جالپى، حالىق پارتيا سەزىنەن ۇلكەن ءۇمىت كۇتتى جانە ول اقتالدى. پارتيانى ءتىرى ورگانيزم دەپ الۋعا بولادى. پارتيا دا قوعامداعى وزگەرىستەرمەن بىرگە دامىپ وتىرادى. سەزد شەشىمدەرىنىڭ قوعامعا دا ۇلكەن اسەر ەتەتىنى داۋسىز. سوندىقتان وسى سەزدىڭ شەشىمدەرىن بۇكىل قوعام بولىپ ىسكە اسىرامىز دەپ ايتساق، قاتەلەسپەيمىز. ەلدىڭ دامۋى، ىشكى جانە سىرتقى جاعدايىنا قاتىستى بىرقاتار ماسەلەلەر قارالدى. اسىرەسە، سوڭعى كەزدە ءجيى تالقىعا سالىنعان كوپبالالى وتباسىنىڭ جاعدايى، باسپانا ماسەلەسىنە قولجەتىمدىلىك كۇن تارتىبىنە الىندى.

– اڭگىمەڭىزگە راحمەت!

 اڭگىمەلەسكەن

دينارا مىڭجاسارقىزى

 

سوڭعى جاڭالىقتار