22 اقپان 2019, 11:54 749 0 دەنساۋلىق نازىم تويلىباەۆا

ەم قابىلداعانداردىڭ 60 پايىزى شۇعىل جاعدايدا جەتكىزىلگەن

وتكەن جىلى الماتىلىق دارىگەرلەر ميلليوننان استام سكرينينگتىك تەكسەرۋلەر وتكىزگەن. پروفيلاكتيكالىق ماقساتتاعى تەكسەرۋلەردەن وتكەندەردىڭ 475 مىڭى كامەلەت جاسىنا تولماعان بالالار مەن جاسوسپىرىمدەر. بۇل تۋرالى  «الەۋمەتتىك مەديتسينالىق ساقتاندىرۋ قورى» كەاق الماتى قالالىق فيليالى حابارلادى. 

فيليال مالىمەتىنشە، الماتى تۇرعىندارى وتكەن جىلى ەمحانالارعا 9,9 ملن رەت بارعان. ولاردىڭ ۇشتەن ءبىر بولىگى دارىگەرلەر كومەگىنە بالا دەنساۋلىعىنا بايلانىستى جۇگىنگەن.

جالپى، تاۋلىك بويى جۇمىس ىستەيتىن اۋرۋحانالاردا ەم قابىلداعان 290 مىڭعا جۋىق ادامنىڭ ىشىندە 70 مىڭ بالا دا بار. ولاردىڭ ءار قايسىسى اۋرۋحانادا ورتا ەسەپپەن 8 كۇن جاتقان. تاعى ءبىر ايتا كەتەرلىگى، ناۋقاستاردىڭ 60 پايىزدان استامى اۋرۋحاناعا شۇعىل جاعدايدا جەتكىزىلگەندەر.

سونداي-اق، الماتىلىق حيرۋرگتەر 2018 جىلى 109 مىڭ وتا جاساعان. وپەراتسيالاردىڭ جارتىسىنا جۋىعى – اۋرۋحاناعا اۋرۋى اسقىنىپ، شۇعىل جاعدايدا جەتكىزىلگەن ناۋقاستارعا جاسالىپتى. ال، كۇندىزگى ستاتسيونارلاردىڭ قىزمەتىن پايدالانعاندار سانى 108 مىڭعا جەتىپ جىعىلادى. وعان قوسا، وڭتۇستىك استانا دارىگەرلەرى 43 مىڭعا جۋىق ايەلدى امان-ەسەن بوساندىرىپ العان، دەلىنگەن حابارلامادا.

قالالىق دەنساۋلىق ساقتاۋ سالاسىندا اتقارىلعان جۇمىستاردىڭ ءبىر ۇشتىعى پروفيلاكتيكالىق شارالارعا قاتىستى. 2018 جىلى تەكسەرىلگەن 145 مىڭ ادامنىڭ 9 مىڭىنان قان اينالىم جۇيەسى اۋرۋلارىنىڭ بەلگىلەرى انىقتالعان. 150 مىڭ ادامنىڭ مىڭعا جۋىعىنىڭ قانت ديابەتىنە شالدىققانى بەلگىلى بولىپتى.

ەستەرىڭىزگە سالا كەتسەك، قازاقستاندا مەملەكەتتىك تاپسىرىس بويىنشا جۇرتشىلىققا تەگىن كەپىلدەندىرىلگەن مەديتسينالىق كومەك كورسەتىلەدى. 2018 جىلدان باستاپ اتالعان پاكەتتى الەۋمەتتىك مەديتسينالىق ساقتاندىرۋ قورى قارجىلاندىرادى. وتكەن جىلى مسق الماتى قالاسى بويىنشا حالىققا تەگىن قىزمەت كورسەتكەن 171 كلينيكاعا 99,5 ملرد تەڭگە تولەگەن بولاتىن. ال، 2019 جىلى قالا بويىنشا مەملەكەتتىك تاپسىرىستى ورىندايتىن مەديتسينا ۇيىمدارىنىڭ سانى 185-كە جەتىپ وتىر.

سوڭعى جاڭالىقتار