14 اقپان 2019, 10:36 887 0 نۇر وتان اسەل انۋاربەك

قارتتارعا قاجەتتى ورتالىق

«نۇر وتان» پارتياسى «ارداگەرلەردى ارداقتايىق» جوباسى اياسىندا زەينەت جاسىنداعى قاريالاردىڭ ۋاقىتىن ءتيىمدى وتكىزۋىنە جول اشتى. ياعني، ەلىمىزدىڭ بىرقاتار وڭىرىندە قارتتارعا ارنالعان «بەلسەندى ءومىر» ورتالىعى جۇمىسىن باستادى. بۇل ورتالىقتا زەينەت جاسىنداعى قاريالار شاحمات ويناپ، كىتاپ وقىپ، دومبىرا تارتىپ، قولونەرمەن شۇعىلدانىپ، ءتىپتى، فيتنەس زالىندا جاتتىعۋلار جاساي الادى.

وسىنداي ورتالىقتىڭ ءبىرى تالدىقورعان قالاسىندا اشىلدى. «بەلسەندى ءومىر» ورتالىعىنىڭ اشىلۋىنا «نۇر وتان» پارتياسىنىڭ وبلىستىق فيليالى مەن قازاقستان حالقى اسسامبلەياسى تۇرتكى بولعان. جاڭا ورتالىقتا مادەني-رۋحاني كلۋبتار، ءتىل ۇيرەتۋ جانە كومپيۋتەرلىك سىنىپتار جۇمىس ىستەيدى. ارداگەرلەردى بەلسەندى ءومىر سۇرۋگە باۋليتىن ورتالىقتا پسيحولوگ پەن زاڭگەرلەر دە قىزمەت كورسەتىپ، كەڭەس بەرەدى.

ءدال وسىنداي ورتالىق قىزىلوردا وبلىسىندا دا اشىلدى. بۇل – پارتيانىڭ قازاقستان حالقى اسسامبلەياسىمەن بىرلەسكەن ءىس-شارالار جوسپارىنا سايكەس قولعا الىنىپ وتىرعان يگى شارالاردىڭ ءبىرى. ورتالىقتىڭ نەگىزگى ماقساتى – قازىنالى قارتتارىمىزدىڭ تۇرمىستىق جاعدايىن جاقسارتۋعا، الەۋمەتتىك بەلسەندىلىگىن دامىتۋعا، بوس ۋاقىتتارىن قىزىعۋشىلىقتارىنا قاراي ءتيىمدى  وتكىزۋگە، سونداي-اق ولاردى قوعامدىق ومىرگە تارتۋ جانە قوسىمشا جاعدايلار جاساۋ.

ارداگەرلەر قاۋىمىن قۇتتىقتاعان «نۇر وتان» پارتياسى قىزىلوردا وبلىستىق فيليالى توراعاسىنىڭ ءبىرىنشى ورىنباسارى يبادۋللا قۇتتىقوجاەۆ ورتالىق جۇمىسىنىڭ قازىرگى قوعامدا «بەلسەندى قارتتىقتىڭ مودەلىن» قالىپتاستىرۋداعى رولىنە توقتالىپ، ارداگەرلەردى قولداۋعا باعىتتالعان  جۇمىستاردى اتاپ ءوتتى.

سالتاناتتى شاراعا وڭىردە جۇمىس ساپارىمەن جۇرگەن قر پارلامەنتى ءماجىلىسىنىڭ دەپۋتاتى احمەت مۋرادوۆ قاتىسىپ، مەملەكەت باسشىسىنىڭ ۇلكەندى قۇرمەتتەۋ، قولداۋ كورسەتۋ باعىتىنداعى مىندەتتەرىن ءتيىمدى جۇزەگە اسىرۋدا «نۇر وتان» پارتياسى مەن قازاقستان حالقى اسسامبلەياسىنىڭ يگىلىكتى باستامالارىنا ساتتىلىك تىلەدى. ورتالىقتىڭ اشىلۋىنا وبلىستىڭ ارداگەرلەرى مەن زەينەتكەرلەرى، ەتنومادەني بىرلەستىك وكىلدەرى، سونداي-اق، قورقىت اتا اتىنداعى قمۋ وقىتۋشىلارى مەن بەلسەندى جاستار قاتىستى.

قاراعاندىنىڭ دوستىق ۇيىندە دە زەينەت جاسىنداعى ازاماتتارعا ارنالعان «بەلسەندى ءومىر» ورتالىعى جۇمىسىن باستادى. وندا قارتتار كەز كەلگەن ۋاقىتتا باس قوسىپ، پىكىر بولىسە الادى. ورتالىقتا مادەني-رۋحاني كلۋبتار، مەملەكەتتىك، اعىلشىن ءتىلىن وقىتۋ  ساباقتارى جانە كومپيۋتەرلىك سىنىپتار  جۇمىس ىستەيدى. سونداي-اق، كىتاپحانا، شاحمات ويىنى، دەمالىس، دەنساۋلىق زالدارى بار. قولونەرمەن شۇعىلدانام دەۋشىلەرگە شىعارماشىلىقتى دامىتۋ ورتالىعى اپتانىڭ كەز كەلگەن كۇنىندە جۇمىس ىستەيدى. سول ارقىلى قالادا تۇراتىن زەينەت جاسىنداعى ازاماتتاردىڭ ۋاقىتىن ءتيىمدى وتكىزۋى ءۇشىن جاعداي جاساۋ كوزدەلگەن. ءتىپتى، پسيحولوگ پەن زاڭگەر كەڭەسىنىڭ قىزمەتى دە ۇسىنىلعان.

 

سوڭعى جاڭالىقتار