11 اقپان 2019, 17:32 3130 0 قوعام نازىم تويلىباەۆا

قازاقستاندا جاسى 1-دەن اسقان بالالارعا جاردەماقى تولەنۋى مۇمكىن

قازاقستاندا جاسى 1-دەن اسقان بالالارعا دا جاردەماقى تولەۋ مۇمكىنشىلىگى قاراستىرىلىپ جاتىر. بۇل تۋرالى بۇگىن ۇكىمەت ۇيىندە وتكەن ءباسپاسوز ءماسليحاتىندا قر قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات.

ونىڭ ايتۋىنشا، قر ۇكىمەتىنىڭ جانىنان قۇرىلعان ازاماتتاردىڭ تابىسىن ارتتىرۋ، تۇرمىس ساپاسىن جاقسارتۋ جانە كوپبالالى وتباسىلارعا قولداۋ شارالارىن كۇشەيتۋ جونىندەگى جۇمىس توبى بالا كۇتىمىنە بايلانىستى جاردەماقى تولەۋ مەرزىمىن ۇلعايتۋ ۇسىنىسىن قاراستىرۋدا.

«بۇل ماسەلە قازىرگى ۋاقىتتا جۇمىس توبىندا قاراستىرىلىپ جاتىر. ەڭ الدىمەن، بۇل، بالا ءبىر جاسقا تولعاننان كەيىن دە كومەك كورسەتۋ ءۇشىن جاس شەگىن ۇزارتۋعا، سونىمەن قاتار جاردەماقى كولەمىن ارتتىرۋعا قاتىستى. مۇنداي ۇسىنىستاردى ەنگىزەمىز. مۇنى جۇزەگە اسىرۋعا بولادى جانە بۇل باعىتتا جۇمىس ىستەپ جاتىرمىز»، - دەدى مينيستر.

وسى ورايدا ول  بالالارى بار وتباسىلارعا بەرىلەتىن جەردەماقىنىڭ قولدانىستاعى جۇيەسىنە سايكەس بالا 1 جاسقا تولعانعا دەيىن جورگەكپۇل الاتىندىعىن ايتتى. جانە ونىڭ كولەمى وتباسىداعى بالا سانىنا بايلانىستى تەڭگەرىمدى ەكەندىگىن ەسكە سالدى.

«2018 جىلى 395 مىڭ ادام بالانى دۇنيەگە اكەلگەنى ءۇشىن 40,7 ملرد تەڭگە جاردەماقى الدى. ال بالانىڭ ءبىر جاسقا دەيىنگى كۇتىمىنە بايلانىستى 125 مىڭ ادام 30 ملرد تەڭگەگە جۋىق جاردەماقىعا يە بولدى»،- دەدى ول.

ءمينيستردىڭ دەرەگىنشە، مۇدەگەك بالا تاربيەلەپ وتىرعان 80,6 مىڭ ادامعا 29,5 ملرد تەڭگە جاردەماقى بەرىلدى.  مۇنان بولەك، «التىن القا» مەن «كۇمىس القا» يەگەرلەرىنە، كوپبالا انالارعا اي سايىن جاردەماقى تولەنەدى. وتكەن جىلى مۇنداي 271 مىڭ وتباسىنا 33 ملرد تەڭگە بولىنگەن.

«سونداي-اق جۇمىس ىستەيتىن ايەلدەرگە جۇكتىلىگىنە جانە بالا تۋىنا بايلانىستى تابىسىنان ايىرىلعان جاعدايدا الەۋمەتتىك تولەم تولەنەدى. بىزدە ونى 188 مىڭ ادام الدى، تولەمنىڭ ورتاشا كولەمى 391 مىڭ تەڭگەنى قۇرادى. ءبىر جاسقا دەيىنگى بالا كۇتىمىمەن 429 ادام اينالىسىپ، تولەم سوماسى 96 ملرد تەڭگەنى قۇرادى. بۇل مەملەكەتتىك الەۋمەتتىك ساقتاندىرۋ قورىنان تولەنگەن سوڭعى تولەمدەر. 2018 جىلدىڭ قورىتىندىسىندا ماسق-تەن 165 ملرد تەڭگە تولەندى. سونىمەن قاتار قولداۋدىڭ سالىقتىق جەڭىلدىكتەر سەكىلدى باسقا دا تۇرلەرى بار»،-  دەدى ءا.سمايىلوۆ.

ايتا كەتەيىك، قر قارجى ءمينيسترى ءاليحان سمايىلوۆ ۇكىمەت جانىنان قۇرىلعان جۇمىس توبى، سونداي-اق كوپبالالى وتباسىلاردى باسپانامەن قامتۋ ماسەلەسىن دە قاراستىرىپ جاتقانىن ءمالىم ەتتى.

 

سوڭعى جاڭالىقتار