8 اقپان 2019, 17:47 504 0 دەنساۋلىق اسەل انۋاربەك

مەملەكەتتىك تاپسىرىستى ورىنداعان مەديتسينا ۇيىمدارىنا 142,1 ملرد تەڭگە تولەندى

«الەۋمەتتىك مەديتسينالىق ساقتاندىرۋ قورى» كەاق 2019 جىلدىڭ العاشقى ايىندا حالىققا تەگىن قىزمەت كورسەتكەن مەديتسينا ۇيىمدارىنا 142,1 ملرد تەڭگە تولەدى. قارجى كەپىلدەندىرىلگەن تەگىن مەديتسينالىق كومەك پاكەتى  (تمككك) شەڭبەرىندە ءبولىندى.

«1 اقپانداعى مالىمەت بويىنشا، قورمەن كەلىسىمشارت بەكىتكەن جەتكىزۋشى كومپانيالارعا 142,1 ملرد تەڭگە تولەندى. بۇل جالپى كەپىلدەندىرىلگەن تەگىن مەديتسينالىق كومەك پاكەتى (تمككك) شەڭبەرىندە بەكىتىلگەن كەلىسىمشارت سوماسىنىڭ 16,8 پايىزىن قۇرايدى. جۇمىس كەستەگە ساي ءجۇرىپ جاتىر. بولىنگەن قاراجات مەديتسينا مەكەمەلەرىنىڭ وپەراتسيالىق شىعىندارىن وتەۋگە جەتكىلىكتى. ەگەر سۇرانىس كۇشەيگەن جاعدايدا قور قوسىمشا قاراجات بولەدى. قوردىڭ مۇمكىندىگى شەكتەۋلى بولعاندىقتان قارجىنى وزگە قارادات كوزدەرىنەن الىپ، قايتا بولىسكە سالۋ تيىمدىرىك بولىپ وتىر»، - دەدى مسق باسقارما توراعاسىنىڭ مىندەتىن اتقارۋشى بوتاگوز جاقسەلەكوۆا.

قارجىنى قايتا بولىسكە سالۋ ءۇشىن مەديتسينا ۇيىمدارىنىڭ وكىلدەرى قورعا ءوتىنىم جولدايدى. ءوتىنىش زاڭدا بەلگىلەنگەن ءتارتىپ بويىنشا قارالادى.

مەديتسينالىق ساقتاندىرۋ قورى ەمدەۋ مەكەمەلەرىمەن تمككك پاكەتى شەڭبەرىندە حالىققا تەگىن كومەك كورسەتۋ جونىندە كەلىسىمشارتتار بەكىتكەن بولاتىن. 2019 جىلى بەكىتىلگەن كەلىسىمشارتتاردىڭ جالپى سوماسى 846 ملرد تەڭگەنى قۇراپ وتىر. بۇل وتكەن جىلمەن سالىستىرعاندا 5 پايىز كوپ.

بيىلعى جىلى مەملەكەتتىك تاپسىرىستى 1412 مەديتسينا ۇيىمى ورىنداماق. ونىڭ 698-ءى – جەكە مەنشىك. تاعى ءبىر ايتا كەتەرلىگى، بيىل جەكە كلينيكالار سانى 2018 جىلمەن سالىستىرعاندا 59-عا كوبەيگەن.

مەملەكەتتىك تاپسىرىستى ورىنداۋعا قۇلشىنىس بىلدىرگەن جەكە مەنشىك مەديتسينا ۇيىمدارىنىڭ سانى جاعىنان شىمكەنت، استانا، الماتى قالالارى، قىزىلوردا، جامبىل جانە قاراعاندى وبلىستارى كوش باستاپ تۇر.

ەستەرىڭىزگە سالا كەتسەك، مسق 2018 جىلدان باستاپ تمككك جانە مىندەتتى الەۋمەتتىك مەديتسينالىق ساقتاندىرۋ ء(مامس) پاكەتتەرىنىڭ قارجىلىق وپەراتورى بولىپ تابىلادى جانە حالىققا كورسەتىلەتىن مەديتسينالىق قىزمەتتەردى قر ۇكىمەتى بەكىتكەن ءتارتىپ بويىنشا ساتىپ الۋمەن اينالىسادى.

 

سوڭعى جاڭالىقتار