8 اقپان 2019, 17:09 1161 0 الەۋمەت اسەل انۋاربەك

جاستارعا ارەندالىق باسپانا بەرىلمەك

رەسپۋبليكالىق ماڭىزى بار قالالاردا (استانا، الماتى، شىمكەنت) جاستارعا ارەندالىق باسپانا بەرىلەدى. بۇل تۋرالى قر قوعامدىق ءمينيسترى دارحان كالەتاەۆ كەشەگى سەناتتا وتكەن جيىندا ايتتى. ال بۇگىن مينيستر جاستارعا ارەندالىق باسپانا تاراتۋ مەرزىمىن مالىمدەدى.

قوعامدىق مينيستر دارحان كالەتاەۆ جاستارعا ارەندالىق باسپانا تاراتۋ تەتىكتەرىن اقپان ايىنىڭ سوڭىنا دەيىن دايىندالاتىنىن تىلگە تيەك ەتتى. ءدال قازىرگى ۋاقىتتا قر يندۋستريا جانە ينفراقۇرىلىمدىق دامۋ مينيسترلىگىمەن بىرلەسىپ، تالقىلاۋ جۇمىستارى جۇرگىزىلۋدە.

قر قوعامدىق دامۋ ءمينيسترى «قازاقپارات» اگەنتتىگىنە بەرگەن سۇحباتىندا: «جاستارعا ارنالعان پاتەرلەر بيىل تاراتىلادى. ەندى، ونى ءبىز ەمەس، جەرگىلىكتى اتقارۋشى ورگاندار بەرەدى. ءبىز ناقتى تالاپتارىن ازىرلەيمىز. اعىمداعى جىلى ءۇش قالاعا، شامامەن، 1 مىڭ پاتەر بولىنەدى. بۇل – پرەزيدەنتتىڭ تاپسىرماسى. سوندا استانا، الماتى مەن شىمكەنتتىڭ اربىرەۋىنە 300-دەن استام پاتەر كەلەدى»، – دەدى.

ءمينيستردىڭ ايتۋىنشا، جاستارعا بەرىلەتىن ارەندالىق باسپانانىڭ اۋدانى 40-50 شارشى مەتر بولادى. دەگەنمەن، بيىل جاستارعا ارنالعان تيپتىك تۇرعىن ۇيلەردى سالىپ ءبىتىرۋ مۇمكىن ەمەس. سوندىقتان، اكىمدىكتەر دايىن ۇيلەردى ساتىپ الادى دا، جاستارعا جالعا بەرەدى. «ازىرشە، ارەندالىق تولەمنىڭ كولەمى 10-12 مىڭ تەڭگە بولسا ەكەن دەپ وتىرمىز. بۇل – الدىن الا ەسەپ. سوسىن كوممۋنالدىق تولەمدەر تاعى بار»، – دەدى دارحان كالەتاەۆ.

ايتا كەتەيىك، مۇنداي ارەندالىق باسپانا 29 جاسقا دەيىنگى تۇراقتى جۇمىسى بار جاستارعا بەرىلەدى دەپ جوسپارلانىپ وتىر.

سوڭعى جاڭالىقتار