6 اقپان 2019, 17:54 622 0 سىرتقى ساياسات نازىم تويلىباەۆا

ترامپ پەن كيم چەن ىن ۆەتنامدا كەزدەسەتىن بولدى

اقش پرەزيدەنتى دونالد ترامپ سولتۇستىك كورەيا باسشىسى كيم چەن ىنمەن اقپاننىڭ 27-28-ءى كۇنى ۆەتنامدا كەزدەسەتىن بولدى، دەپ حابارلايدى «حابار 24».

بۇل تۋرالى اق ءۇي قوجايىنى كونگرەستە جاساعان جولداۋىندا مالىمدەدى. بىراق باسقوسۋدا قانداي ماسەلەلەر تالقىلاناتىنى ازىرگە بەلگىسىز. ساراپشى تاراپتار وسىعان دەيىن قول قويىلعان كەلىسىمنىڭ جۇزەگە اسىرىلۋىن، كورەيانىڭ يادرولىق الەۋەتىن تەكسەرۋ مەن سانكتسيالاردى ازايتۋدى قاراۋى مۇمكىن دەپ وتىر. ايتا كەتەيىك، اقش پرەزيدەنتى مەن سولتۇستىك كورەيا باسشىسىنىڭ العاشقى كەزدەسۋى بىلتىر 12 ماۋسىمدا سينگاپۋردە وتكەن بولاتىن. وندا پحەنيان يادرولىق قارۋدان باس تارتۋعا، ال اقش بۇل مەملەكەتتىڭ قاۋىپسىزدىگىنە كەپىل بەرۋگە كەلىستى.

سوڭعى جاڭالىقتار