31 قاڭتار 2019, 10:09 1077 0 قوعام دينارا مىڭجاسارقىزى

كوپبالالى بولۋدان قورىقپاۋ كەرەك

جاقىندا استانادا وتكەن جاستار جىلىنىڭ رەسمي اشىلۋىنا قاتىسقان كوپبالالى انا، 27 جاسار جازيرا تۇرعىنوۆانىڭ ەسىمى از ۋاقىتتىڭ ىشىندە شارتاراپقا ايگىلى بولىپ شىعا كەلدى. ەلباسىنىڭ الدىندا تۇركىستان وبلىسى جاستارى اتىنان ءسوز سويلەگەن ول: «7 ءسابيدى ومىرگە الىپ كەلدىم. ءار بالانىڭ ومىرگە كەلۋىمەن قاتار ۇلكەن قۋانىشتار ورىن الادى. بالالارىمنىڭ كۇلكىسىن كورىپ مەنىڭ ومىرگە دەگەن قۇلشىنىسىم ارتا تۇسەدى. كوپبالالى انا رەتىندە، وسىناۋ بايتاق قازاق ەلىمىزدە سابيلەردىڭ كوپ بولۋىن قالايمىن»، – دەدى اقتارىلا. الايدا جاس وتباسىنىڭ وزدەرىنە تيەسىلى باسپاناسى جوق ەكەن. اينالاسى، ەكى-ءۇش كۇننىڭ ىشىندە تۇركىستان وبلىسىنىڭ اكىمى جانسەيىت تۇيمەباەۆتىڭ قولىنان 4 بولمەلى پاتەردىڭ كىلتىنە يە بولدى. ءبىز دە كوپبالالى انا جازيرا تۇرعىنوۆاعا حابارلاسىپ، كوپتەن كۇتكەن قۋانىشىمەن قۇتتىقتاعان ەدىك.

– جازيرا، قونىس قۇتتى بولسىن! ءار بالانىڭ نەسىبەسى بار» دەگەن ءسوز راسقا اينالعانداي ما، قالاي؟

– كوپ راحمەت! جان-جاقتان قۇتتىقتاۋشىلار كوبەيىپ جاتىر. ارينە، بالالارىمنىڭ نەسىبەسى دەپ ويلايمىن. ويلاماعان جەردەن اللا جارىلقاپ، تولە بي اۋدانىنا قاراستى لەنگىر قالاسىنان 4 بولمەلى ءۇيلى بولدىق. تۇركىستان وبلىسىنىڭ اكىمى جانسەيىت تۇيمەباەۆ ءوزى قابىلداپ، وڭىردەگى 134 مىڭ كوپبالالى اناعا دەگەن قۇرمەتىن كورسەتتى. وبلىس اكىمى: «ءبىز جازيرانى ادەيى جىبەردىك. جەتى بالانى تاربيەلەپ، ءوسىرۋدىڭ ءوزى – ەرلىك، ۇلكەن داڭق جانە سىي. ادامدىق كاپيتال – ەلىمىزدىڭ باستى بايلىعى. ءبىز كوپبالالى انالاردى مىسال ەتىپ، ۇلگى تۇتۋىمىز قاجەت. مەن مۇنداي وتباسىلاردى جاقسى تۇسىنەمىن. جاس قىزدار باتىر انالاردان ۇلگى الۋى كەرەك، سەبەبى ولار ەلىمىزدىڭ دەموگرافياسىنا ايتارلىقتاي ۇلەس قوسىپ جاتىر. «جاستار جىلى» وسىلاي باستالعانى قۋانىشتى» دەگەن جۇرەكجاردى تىلەگىن ءبىلدىردى. ال ەلباسى ن.نازارباەۆ مەنى كوپ جاستارعا ۇلگى ەتىپ، كوپبالالى بولۋدان قورىقپاۋ كەرەكتىگىن ايتتى. سونىڭ ءوزى ماعان كۇش بەردى.

– ارينە، جەتى بالانى ومىرگە اكەلىپ، باعىپ-قاعۋ وڭاي ەمەس. مەملەكەت بەرىپ وتىرعان جاردەم­اقى دا ماردىمسىز دەگەندەي...

– 16 جاسىمدا تولە بي اۋدانىنىڭ ۇزىنارىق اۋىلىنا كەلىن بولىپ ءتۇستىم. كۇيەۋىم الىپ قاشقان جوق. ءوز ەركىممەن تۇرمىسقا شىقتىم. اۋىلدا جۇمىس بولماعان سوڭ، شىمكەنت قالاسىنىڭ ىرگەسىنەن پاتەر جالداپ تۇردىق. ءوزىم بالالارمەن ۇيدە، ال كۇيەۋىم كۇندەلىكتى ناپاقا تاباتىن جۇمىس ىستەدى. ايتەۋىر تاپقانىن جەتكىزۋگە تىرىسامىن. 4 ۇل، 3 قىزىمىز بار. ۇلكەنى – 11 جاستا، كىشكەنتايىم – 9 ايلىق. ونىڭ تورتەۋى مەكتەپكە بارادى. بىرەۋدەن كەيىن، بىرەۋدەن ىلگەرى ءومىر ءسۇرىپ كەلدىك. الايدا كوپبالالى انالارعا بەرەتىن جاردەماقى از. قازىر جەتى بالاعا 45 مىڭ تەڭگە الامىن. 1 جاسقا دەيىنگى بالاما 20 مىڭ تەڭگە تولەنەدى. ءبىر جاستان اسقان سوڭ، توقتايدى. سوسىن نەبارى 25 مىڭ تەڭگە قالادى. شىن مانىندە، بۇل ماردىمسىز. جەتى بالامنىڭ كيىم-كەشەگى، تاماعىنا جەتپەيدى. جالپى، جاعدايىمىز جاقسى. بىرەۋدەن نان سۇراپ جۇرگەن جوقپىز. بالالارىمدى باعۋعا اتا-ەنەم كومەكتەستى.

– تاياۋدا ەڭبەك جانە حالىقتى الەۋمەتتىك قورعاۋ ءمينيسترى مادينا ابىلقاسىموۆا انالارعا تولەنەتىن 16 مىڭ تەڭگە جاردەم­اقىنىڭ تىم كوپ ەكەنىن ايتقان ەدى. ابىلقاسىموۆانىڭ سوزىنە سەنسەك، مۇنداي جۇماق جاعداي الەمنىڭ ەشبىر ەلىندە جوق ەكەن. كوپبالالى انا رەتىندە پىكىرىڭىز قانداي؟

– بۇل پىكىردى ەستىدىم. ءتىپتى، نەگە سۇيەنىپ ايتقانىن تۇسىنبەيمىن. 16 مىڭ تەڭگە ەشتەڭەگە جەتپەيدى. كۇن سايىن قىمباتشىلىق قىسقان قوعامدا 16 مىڭ تەڭگە بالانىڭ تاماعى مەن جايالىعىنا جەتپەيدى. اسىرەسە، اۋىلدا تۇراتىن ءبىز سياقتى كەيبىر كوپبالالى وتباسى بالالارىن قالاي كيىندىرەم، قالاي تويدىرامىن دەگەن ۋايىممەن ءومىر ءسۇرىپ ءجۇر.

– بۇعان دەيىن كوپبالالى وتباسى رەتىندە مەملەكەتتىك باعدارلاماعا قاتىسىپ، ءۇيلى بولۋعا تىرىسىپ كورمەدىڭىزدەر مە؟

– شىمكەنت قالاسىندا پاتەر جالداپ تۇرساق تا، لەنگىر قالاسىندا تىركەۋدەمىز. سودان كەيىن ءۇيدى سول لەنگىردەن بەردى. ال تۇرعىن ۇيگە قاتىستى مەملەكەتتىك باعدارلاما تۋرالى ەستىمەپپىن، بىزگە ەشكىم دە ايتپاپتى.

– اللا بەرسە، تاعى دا قۇرساق كوتەرەتىن ويىڭىز بار ما؟

– ارينە، اللا بەرسە، كوپ كورمەيمىن. وسى كوزگە كورىنگەن بالالارىمدى ءوز قالاۋىمىزبەن ومىرگە اكەلدىك. قازىر بالالى بولعىڭ كەلمەسە، ءتۇرلى امالدار بار. ماعان انا بولۋ باقىتىن ءناسىپ ەتكەن ەكەن، سول پارىزدى ورىنداۋعا كىرىستىم. الايدا ۇزىنارىق اۋىلىندا مەنەن باسقا جەتى بالا ومىرگە اكەلگەن انا جوق. جاستار اراسىندا كوپبالالى بولعىسى كەلەتىندەر از. البەتتە، ول ءۇشىن باسقا ەلدەردەگىدەي جاردەماقىنىڭ مولشەرىن كوبەيتۋ كەرەك.

– اڭگىمەڭىزگە راحمەت! قونىس قۇتتى بولسىن!

اڭگىمەلەسكەن  دينارا مىڭجاسارقىزى

سوڭعى جاڭالىقتار