28 قاڭتار 2019, 13:30 994 0 ونەر ماقسات قۇسايىنوۆ

«رومەو مەن دجۋلەتتا» العاش رەت قۋىرشاقتار بەينەسىندە!

ماحاببات بار جەردە ماشاقاتقا دا ورىن تابىلادى. اۋلەت پەن توبىردىڭ كەسىرىنەن قانشاما ماحابباتقا تولى تاعدىرلار قۇربان بولدى. بۇل - ىقىلىم زاماننان بەرى كەلە جاتقان ادامزاتتىق احۋال. اعىلشىننىڭ ۇلى دراماتۋرگى، اقىن ۋيليام شەكسپيردىڭ ايگىلى «رومەو مەن دجۋلەتتا» وقيعاسىن سۋرەتتەيتىن تراگەدياسى ەلىمىزدە العاش رەت قۋىرشاقتار بەينەسىندە 84 جىلدىق تاريحى بار الماتى قالاسىنىڭ مەملەكەتتىك قۋىرشاق تەاترىندا اعىمداعى جىلدىڭ 24-25 قاڭتار كۇندەرى ارالىعىندا كورەرمەنگە جول تارتپاق. قويىلىم رەجيسسەرى - دينا جۇماباەۆا، سۋرەتشىسى - يۋليا چەرنوۆا، بالەتمەيستەرى - اننا تسوي، قۋىرشاقتاردى جاساۋشى شەبەر - نيكولاي پروسكۋرين. سپەكتاكل +18 جاس ەرەكشەلىگىن قۇرايدى.

اتالمىش قويىلىمداعى باستى كەيىپكەرلەر رومەو مەن دجۋلەتتانى ساحنالاۋ ءۇشىن جاس ونەرپازدار، ت.جۇرگەنوۆ اتىنداعى قازاق ۇلتتىق ونەر اكادەمياسىنىڭ «دراما اكتەرى» ماماندىعىنىڭ 3 كۋرس ستۋدەنتتەرى امانگەلدىۇلى عالىم مەن تورەباي سالتانات 50-گە جۋىق جاس تالانتتار باق سىناعان كاستينگتەن ارنايى ءوتىپ، تەاتردىڭ كوركەمدىك كەڭەسى مۇشەلەرى ءارى رەجيسسەر شەشىمىمەن باستى رولدەرگە بەكىتىلدى.

شىرعالاڭعا تولى بۇل قويىلىم ادام بويىنداعى قاندى كەك پەن قىزعانىشتى، مەنمەنشىلدىك پەن پەندەشىلىك سىندى قاسيەتتەردى جەڭگەن ءمولدىر ماحاببات تۋرالى بولماق. رومەو مەن دجۋلەتتا تەك قانا ەسكى كوزقاراستار مەن قاتىناستارعا قارسى شىعىپ قانا قويماي، ولار جاڭا ومىرگە ۇلگى بولدى. ولاردىڭ اراسىن قاستىق بولە المادى، ولاردى ماحاببات قوستى. بۇل ماحاببات سۇلۋلىققا سۇيسىنۋدەن تۋىندادى، ادامنىڭ ۇلىلىعىنا دەگەن سەنىمنەن جانە ونىمەن ومىردە قۋانىشتى بولىسۋگە تىرمىسۋىنان تۋىنداعان.

بۇگىندە كىشكەنتاي بۇلدىرشىندەردەن تىس ەرەسەكتەرگە ارنالعان كەشكى قويىلىمداردى دا ساحنالاپ، جاڭا فورماتقا كوشكەن ونەر ورداسى الەمنىڭ كلاسسيكالىق تۋىندىلارىن قۋىرشاقتار بەينەسىندە سويلەتىپ، ۇلتتىق قۋىرشاق تەاترى ونەرىنە جاڭا تىنىس سىيلاۋدا. بۇعان دەيىن ساحنا تورىندە كورەرمەنمەن قاۋىشىپ، رەسپۋبليكالىق، حالىقارالىق فەستيۆالدەردە سىنشىلار تاراپىنان جوعارى باعاعا يە بولىپ، قانجىعاسىن جۇلدەلى ورىندارمەن مايلاپ جۇرگەن «انا جۇرەگى» (اۆت. ە.يونوۆ، رەج. ا.زايتسەۆ), «انا-جەر انا» (اۆت. ش.ايتماتوۆ، رەج. د.جۇماباەۆا), «مەدەيا» (اۆت. ەۆريپيد، رەج. ا.سالبان) سىندى ەرەسەكتەرگە ارنالعان قويىلىمدار قاتارى ەندى «رومەو مەن دجۋلەتتا» شىعارماسىمەن تولىسپاق.

سپەكتاكلدە ءبىر ارتيست بىرنەشە ءرولدى ساحنالاپ، كورەرمەنگە وزگەشە قىرلارىنان تانىلۋعا اسىق. ماسەلەن: اكتريسا ساقتاعانوۆا اراي - لەدي كاپۋلەتتي، لەدي مونتەكي، روزالينا; اكتەر قۇلنازاروۆ شوحان - لورەنتسو ءپىرادار، تيبالت، سينور كاپۋلەتتي، سينور مونتەككي; اكتريسا بايىربەكوۆا ارايلىم - كۇتۋشى جانە اكتەر كامالوۆ ماقسات - مەركۋتسيو، ەسكال، پاريس، بالتازار، بەنۆوليوعا جان بەرىپ، تاڭعاجايىپ قۋىرشاق بەينەسىندە ءۇن بىتىرمەك.

مەملەكەتتىك قۋىرشاق تەاترىنىڭ ۇجىمى الماتى قالاسىنىنىڭ تۇرعىندارى مەن قالا قوناقتارىن عاجايىپقا تولى قۋىرشاقتار الەمىنە بىرگە ساياحات جاساپ، ونەر سۇيەر جانداردىڭ جانىنا رۋحاني ازىق سىيلاپ، كوڭىل

سوڭعى جاڭالىقتار