28 قاڭتار 2019, 11:38 807 0 دەنساۋلىق نازىم تويلىباەۆا

قازاقستاندا دارىلىك زاتتار تاڭبالانادى

2019 جىلى دارىلىك زاتتاردى تاڭبالاۋ بويىنشا قاناتقاقتى جۇمىستار باستالادى. بۇل تۋرالى پارلامەنت ماجىلىسىندەگى ۇكىمەت ساعاتىندا قر قارجى ءمينيسترى ءاليحان سمايىلوۆ ايتتى، دەپ حابارلايدى قازاقپارات.

«كونترافاكتىلىك ونىمدەردەن قورعاۋ، بيزنەستىڭ باسەكەلەستىك جاعدايلارىن تەڭەستىرۋ جانە كولەڭكەلى ەكونوميكا كولەمىن قىسقارتۋ ماقساتىندا تاۋارلاردى تاڭبالاۋ جانە قاداعالاۋ جۇيەسىن قۇرۋ بويىنشا جۇمىس جۇرگىزىلۋدە. تەرى بۇيىمدارىن تاڭبالاۋ بويىنشا قاناتقاقتى جوبا جۇرگىزىلدى. ونىڭ وڭ ناتيجەلەرىن كورىپ وتىرمىز، ياعني 250 مىڭنان استام تەرى بۇيىمدارى تاڭبالانعان. تەرى بۇيىمدارىن دەكلاراتسيالايتىن يمپورتتاۋشىلاردىڭ سانى 40 پايىزعا ءوستى»، - دەدى ءا. سمايىلوۆ.

ونىڭ سوزىنە قاراعاندا، اتقارىلعان شارالاردىڭ ناتيجەسىندە تابىستى تومەندەتىپ كورسەتەتىن سالىق تولەۋشىلەر انىقتالدى. پاتەنت نەگىزىندە قىزمەتىن جۇزەگە اسىراتىن سۋبەكتىلەر سانى 13 ەسەگە قىسقاردى (247-دەن 19-عا دەيىن).  يمپورت بويىنشا كەدەندىك باجدار مەن سالىقتار تۇسىمدەرى 1,5 ەسەگە ءوستى (372 ملن تەڭگەدەن 516 ملن تەڭگەگە دەيىن).

«2018 جىلعى قازاڭىنان باستاپ تەمەكى ونىمدەرىن تاڭبالاۋ بويىنشا قاناتقاقتى شارالار باستالدى. اعىمداعى جىلى دارىلىك زاتتاردى تاڭبالاۋ بويىنشا قاناتقاقتى جۇمىستار باستالادى. وسى باعىتتاعى جۇمىس «ەۋرازيالىق ەكونوميكالىق وداقتا تاۋارلاردى سايكەستەندىرۋ قۇرالدارىمەن تاڭبالاۋ تۋرالى» كەلىسىمدى راتيفيكاتسيالاۋ كەزىندە دەپۋتاتتاردىڭ ەسكەرتۋلەرى مەن ۇسىنىستارىن قاراي وتىرىپ، جالعاسىن تاباتىن بولادى»، - دەدى ءاليحان سمايىلوۆ.

بۇدان بۇرىن حابارلانعانداي، تاۋارلاردى تاڭبالاۋ كەزىندە الەۋمەتتىك ماڭىزداعى ونىمدەر قۇنى وسپەيدى.

ايتا كەتەيىك، قر پارلامەنت ءماجىلىسىنىڭ توراعاسى نۇرلان نىعماتۋلين تاڭبالاۋدى ەنگىزۋ ءدارى-دارمەك باعاسىنىڭ وسۋىنە ىقپال ەتپەۋى كەرەكتىگىن اتاپ وتكەن ەدى.

سوڭعى جاڭالىقتار