25 قاڭتار 2019, 12:50 863 0 قوعام نازىم تويلىباەۆا

قازاقستاندا جاستارعا ارنالعان الەۋمەتتىك جەلى پايدا بولادى

قازاقستاندا جاستارعا ارنالعان الەۋمەتتىك جەلى پايدا بولادى. ينتەرنەت-پلاتفورمانىڭ جوباسى نۇرسۇلتان نازارباەۆقا تانىستىرىلعان، دەپ حابارلايدى «حابار 24».

قازاقستاندىق جەلىنى 12 جانە 14 جاستاعى امينا مەن اليليا ويلاپ تاپتى. ءساتى ءتۇسىپ، ءجاسوسپىرىم قىزدار الەۋمەتتىك پلاتفورمانى كۇنى كەشە عانا ەلباسىنا تانىستىردى. نۇرسۇلتان نازارباەۆ جاستاردىڭ ونەرتابىسىنا وڭ باعاسىن بەردى.

«ءبارى تاماشا ءوتتى. ەلباسى ءبىزدى ماقتاپ-ماداقتاپ، مۇنداي پلاتفورمانىڭ بۇگىنگى جاستارعا بەرەر پايداسى مول ەكەنىن ايتتى. سونىمەن بىرگە قازاقستان پرەزيدەنتى ءبىزدىڭ الدىمىزدا ءالى تالاي مۇمكىندىكتەر اشىلاتىنىن تىلگە تيەك ەتىپ، سول مۇمكىندىكتەردى قالت جىبەرىپ الماۋ قاجەت دەپ اقىل-كەڭەس بەردى. جانە ءبىز ويلاپ تاپقان الەۋمەتتىك جەلىنى ءارى قاراي دامىتۋ كەرەكتىگىن ءسوز ەتتى»،  – دەدى Next Generation جوباسىنىڭ اۆتورى امينا نارىقباەۆا.

Generation Next دەپ اتالاتىن پورتال - بۇل الەۋمەتتىك جەلىنىڭ جاڭارتىلعان ءتۇرى. دالىرەك ايتقاندا، سايت وزىنە بىرنەشە ينتەرنەت-رەسۋرستاردى بىرىكتىرگەن. مۇندا عالامتور پايدالانۋشىلارى ءبىر-بىرىمەن تانىسىپ، اڭگىمەلەسىپ قانا قويماي، سونىمەن بىرگە سان ءتۇرلى تاقىرىپتا جاڭالىقتار وقىپ، پسيحولوگتىڭ اقىل-كەڭەسىنە جۇگىنە الادى.

«ءبىز بۇل جوبانى ەكى اي بويى ازىرلەدىك. الداعى ەكى اپتا ىشىندە ونى تەستىلەۋدەن وتكىزەمىز. تەك سودان كەيىن عانا پورتالدىڭ سىلتەمەسىمەن ءبولىسۋدى جوسپارلاپ وتىرمىز»، – دەيدى Next Generation جوباسىنىڭ جەتەكشىسى گۇلنار ارىستانوۆا.

جاسوسپىرىمدەردىڭ جوباسى اتا-انالار تاراپىنان قولداۋ تاپقان. Next Generation يدەياسى اليليا مەن امينانىكى بولسا، قارجىلىق كومەكتى اكە-شەشەسى كورسەتكەن ەكەن.

اليليا نارىقباەۆا، Next Generation جوباسىنىڭ اۆتورى: - «مىناۋ ءبىزدىڭ كوماندا. ءبىز قىزىقتى تۇلعالاردان سۇحبات الىپ، ءوزىمىزدىڭ كونتەنتىمىزدى قۇرامىز. مىسالى، اكتەرلەرمەن، ۆاينەرلەرمەن، سونداي-اق عالىمدارمەن كەزدەسىپ، ولارمەن تىلدەستىك. جالپى ءبىزدىڭ سايتقا تىركەلگەن قولدانۋشى تەك شىنايى ءارى پايدالى اقپاراتپەن بولىسۋگە كەلىسىمىن بەرەدى»، – دەيدى  Next Generation جوباسىنىڭ اۆتورى اليليا نارىقباەۆا.

بۇل ەكى قىزدىڭ باستاماسى ەلباسىنىڭ كوڭىلىنەن شىقتى. جوبانىڭ ءساتتى ىسكە اسۋى ءۇشىن پرەزيدەنت ۇكىمەتكە وسى ءىستى ەرەكشە باقىلاۋعا الۋدى تاپسىردى.

سوڭعى جاڭالىقتار