24 جەلتوقسان 2018, 16:55 748 0 دەنساۋلىق نازىم تويلىباەۆا

تالدىقورعاندا ونكولوگيالىق دەرتتى ەرتە انىقتاۋ ورتالىعى ىسكە قوسىلدى

ەلباسى جولداۋىندا ايتىلعان ونكولوگيالىق اۋرۋلاردى ەرتە انىقتاۋ تاپسىرماسىن ورىنداۋ ماقساتىندا تالدىقورعاندا ارنايى ورتالىق ىسكە قوسىلدى، دەپ حابارلايدى «حابار 24».

بۇل ەلىمىزدىڭ دەنساۋلىق ساقتاۋ سالاسىن تسيفرلاندىرۋعا باعىتتالعان بىرەگەي جوبا. راديولوگيالىق-اقپاراتتىق كەشەن ونكولوگيالىق اۋرۋلاردى العاشقى كەزەڭىندە انىقتاۋعا مۇمكىندىك بەرەدى. ورتالىق الماتى وبلىسىنداعى 13 ەمدەۋ مەكەمەسىنىڭ 70-تەن استام قوندىرعىلارىمەن بايلانىسقان. جاساندى ينتەللەكت اپپاراتتارداعى اقپاراتتى جەدەل سارالاپ، رەنتگەن سۋرەتىنەن ىسىكتىڭ بار-جوعى، دەڭگەيى تۋرالى ناقتى اقپارات بەرەدى. جوبا مەملەكەتتىك-جەكەمەنشىك سەرىكتەستىك نەگىزىندە جۇزەگە اسقان. جاڭا باعدارلامانى تۇركيا مەملەكەتىنىڭ ماماندارى قازاقستاندىق ارىپتەستەرمەن بىرلەسىپ قۇراستىرعان.

«ءبىزدىڭ ەلىمىزدە دياگنوستيكانىڭ ەرتە جاسالۋىنا ەكپىن بەرۋ وتە ماڭىزدى. بۇل جوبا وكپە مەن ءسۇت بەزى وبىرىن انىقتاۋعا مۇمكىندىك بەرەدى. سوندىقتان بۇل ورتالىقتىڭ پايداسى وتە كوپ دەۋگە بولادى»، – دەدى قر دەنساۋلىق ساقتاۋ ءمينيسترىنىڭ ورىنباسارى ءلاززات اقتاەۆا.

 

سوڭعى جاڭالىقتار