6 جەلتوقسان 2018, 15:28 737 0 قوعام "تۇركىستان" گازەتىنىڭ اۆتورلارى

قالىقتاي بەر، «اق  كوگەرشىن» !

استانا قالاسىنداعى  «جاستار» مادەنيەت سارايىندا بۇلدىرشىندەر اراسىندا «اق كوگەرشىن» رەسپۋبليكالىق بايقاۋى ءوتتى. وعان قازاقستاننىڭ تۇكپىر-تۇكپىرىنەن ونەرگە بەيىمى بار بالعىندار قاتىسىپ، ولار استانانىڭ 20 جىلدىعىنا وراي ءتۇرلى  جانر بويىنشا  باق سىنادى. ونىڭ ىشىندە توپتىق بي، مانەرلەپ تاقپاق وقۋ، ءسان ۇلگىسىن كورسەتۋ، جەكە جانە قوس داۋىستا ءان شىرقاۋ سەكىلدى سايىس تۇرلەرى بار.

بۇل ناعىز ونەر مەيرامى بولدى دەسەك، ارتىق ايتقاندىق ەمەس. كورەرمەندەر «وسىنداي سايىستاردى ءجيى-ءجيى ۇيىمداستىرىپ تۇرعان ءجون» دەگەن ۇسىنىس-پىكىر ايتىپ جاتتى. ويتكەنى مۇنداي بايقاۋلار بالالاردىڭ باعىن اشىپ، ونەرىن شىڭداي تۇسەتىنى ايدان انىق.

استانا قالاسىنداعى «ۇلاعات» بالالار باقشاسىنىڭ بيشىلەر توبى وسى كونكۋرستا گران-پري جەڭىپ الدى. ولاردىڭ سول ساتتەگى قۋانىشتان بال-بۇل جانعان جايدارى جۇزدەرى باقىتتى ەكەندەرىن تانىتتى، ءبارى ءبىر-ءبىرىن جاپا-تارماعاي قۇتتىقتاۋمەن بولدى. ارالارىندا «ۇلاعاتتىڭ» تاربيەشىلەرى مەن اتا-انالار دا بار.

– مەنىڭ نەمەرەلەرىم ءنۇرالي مەن ماليكانىڭ «ۇلاعات» جەكەمەنشىك بالالار باقشاسىنا بارىپ جۇرگەنىنە ءۇش جىلداي بولىپ قالدى. وسى ۋاقىت ىشىندە تاربيەلەنۋشىلەردىڭ قانداي دا ءبىر بايقاۋعا قاتىسقانىن ەستىگەن جوقپىن. «نەگە؟» دەپ سۇراسام، جەكەمەنشىك بالاباقشالارعا ونداي ۇسىنىس تۇسە بەرمەيتىن كورىنەدى. مىنا بايقاۋدى دا ۇيىمداستىرىپ وتىرعان «اق كوگەرشىن» قوعامدىق قورى ەكەن. ال مەملەكەتتىك مەكەمەلەر وسىنداي بايقاۋلاردى كوبىرەك ۇيىمداستىرسا وتە دۇرىس بولار ەدى. سونداي-اق، بالاباقشا مەملەكەتتىك پە، الدە جەكەمەنشىك پە، وعان دا قاراماۋ كەرەك. بارلىعىنا بىردەي مۇمكىندىك بەرگەن ءجون. ويتكەنى تالاپتى دا تالانتتى بالدىرعاندار بارلىق بالاباقشالاردا بار، – دەيدى بايقاۋدى تاماشالاۋعا كەلگەن سارا نابيجانقىزى.

شىنىندا دا قۇلاققا كىرەتىن ءسوز. ءسوز رەتى كەلگەندە ايتا كەتەيىك، بايقاۋدى ۇيىمداستىرۋشىلار بۇگىندە تاماشا ونەرىمەن بۇكىل الەمدى ءتانتى ەتكەن ديماش قۇدايبەرگەنوۆتىڭ وسىدان ون ەكى جىل بۇرىن «اق كوگەرشىن» سايىسىندا جۇلدەگەر بولعانىن ايتىپ قالدى. «اق كوگەرشىن» ونىڭ ءان الەمىندەگى داڭعىل جولىن اشقان. ولاي بولسا، وسى بايقاۋدا باعىن سىناعان بۇلدىرشىندەر اراسىندا ديماشتىڭ ءىزباسارلارى جۇرمەگەنىنە كىم كەپىل؟!. سوندىقتان «اق كوگەرشىن» سەكىلدى كونكۋرستاردىڭ كوپ بولعانى جاقسى.

بۇلدىرشىندەر اراسىندا بايقاۋ وتكىزۋدىڭ وزىندىك قيىندىقتارى بار شىعار. ونى ەشكىم جوققا شىعارا قويماس. دەگەنمەن دە بالعىنداردى ءۇش-ءتورت جاسىنان باستاپ ءتۇرلى ونەر جولىنا تاربيەلەۋمەن عانا شەكتەلىپ قالماي، ولاردىڭ تاۋداي تالابى مەن تالانتىنىڭ جارقىراي كورىنۋىنە كەڭ مۇمكىندىك بەرەتىن بايقاۋلارعا كوبىرەك قاتىسقاندارى قۇبا-قۇپ.

تاعى ءبىر ايتارىمىز – وسىنداي شىعارماشىلىق بايقاۋلار مەن ونەر مەرەكەسى بۇلدىرشىندەرگە كول-كوسىر قۋانىش پەن شاتتىق سىيلايدى. ونى وسى جولى دا بايقادىق. بالالار جۇزدەرى بال-بۇل جايناپ، ەرەكشە كوڭىل-كۇيدە ءجۇردى. ال بالالاردىڭ قۋانىشىنان ارتىق باقىت جوق.

قالىقتاي بەر، «اق كوگەرشىن»! ونەرگە بەيىمى بار بالدىرعانداردىڭ باعىن اشا بەر!

اسقار اعابەكۇلى

استانا

سوڭعى جاڭالىقتار