31 قازان 2018, 13:29 1172 0 تەحنولوگيالار نازىم تويلىباەۆا

الماتى 2021 جىلى تولىق تسيفرلىق تەلەۆيزياعا كوشەدى

الماتىدا «تسيفرلىق قازاقستان» مەملەكەتتىك باعدارلاماسى اياسىندا تسيفرلىق تەلەۆيزيا جوباسى ەنگىزىلەتىن بولدى. بۇل تۋرالى وڭىرلىك كوممۋنيكاتسيالار قىزمەتىندە الماتى وبلىستىق راديوتەلەحابار تاراتۋ ديرەكتسياسىنىڭ ديرەكتورى قايسار رازدىقوۆ ايتتى، دەپ حابارلايدى قازاقپارات ءتىلشىسى.

«تسيفرلىق حابار تاراتۋ ەلىمىزدىڭ باسىم باعىتتارىنىڭ ءبىرى. قازاقستاندا تسيفرلىق تەحنولوگياعا كوشۋدىڭ كەزەڭدىك جوسپارى قۇرىلدى. تسيفرلىق تەلەۆيدەنيەگە كوشكەن جاعدايدا تەلە جانە راديوباعدارلامالاردىڭ سانى كوبەيەدى، بىراق ولاردى جاساۋعا كەتەتىن رەسۋرس ازايادى. سونىمەن قاتار، بۇل سالا جارناما نارىعىن دامىتۋعا دا سەپتىگىن تيگىزەدى. قالالىق ابونەنتتەر تسيفرلىق ساپاداعى 30 كانالدى، اۋىلدىقتار 15 كانالدى كورە الاتىن بولادى. تسيفرلاندىرۋ جۇمىستارى ءۇشىن ابونەنتتەر اقشا تولەمەيدى»، - دەدى قايسار رازدىقوۆ.

ونىڭ ايتۋىنشا، جوبانى جۇزەگە اسىرۋ بارىسىندا بايلانىس وپەراتورلارىمەن ارادا جۇمىس جۇرگىزىلىپ جاتىر.

«تسيفرلاندىرۋ جوباسى 2021 جىلعا دەيىن جالعاسادى دەگەن جوسپار بار. ناتيجەسىندە 2-3 جىلدا قازاقستاننىڭ بارلىق وڭىرىنە تسيفرلىق تەلەارنا تارالادى. قازاقستاندىقتار ابونەنتتىك اقى تولەمەي-اق 30 ارنانى ساپالى رەجىمدە كورە الادى»، - دەدى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ ءبولىم باسشىسى گۇلنار مۇحامەتوۆا.

سوڭعى جاڭالىقتار