10 قازان 2018, 23:15 1300 0 نۇر وتان اسەل انۋاربەك

ارداگەرلەرگە قۇرمەت كورسەتىلدى

شىعىس قازاقستان وبلىسىندا «ارداگەرلەردى ارداقتايىق!» پارتيالىق جوباسى بەلسەندى تۇردە جۇزەگە اسۋدا. اتالمىش جوبانىڭ ماقساتى – سوعىس ارداگەرلەرى، جالعىز قالعان تىل ەڭبەككەرلەرى مەن ەگدە جاستاعى ازاماتتاردىڭ ءومىر ءسۇرۋ دەڭگەيىن جاقسارتۋ.

«نۇر وتان» پارتياسىنىڭ شىعىس قازاقستان وبلىستىق فيليالىندا قارتتار كۇنىنە وراي، ايماقتىڭ ءار اۋدانىنان كەلگەن 20-دان استام اقساقالدار مەن اقجاۋلىقتى اجەلەردىڭ قاتىسۋىمەن سالتاناتتى ءىس-شارا ءوتتى. وبلىستىق فيليال عيماراتىندا ءوڭىردىڭ ەڭ بەلسەندى جانە قۇرمەتتى قارتتارى باس قوستى. ولاردىڭ دەنى وتان يگىلىگى ءۇشىن ەڭ قۇندى بايلىعىن – سانالى عۇمىرىن تارتۋ ەتكەن. قاريالار سالعان سارا جول كوپكە ونەگە.

پارتيانىڭ وبلىستىق فيليالى توراعاسىنىڭ ءبىرىنشى ورىنباسارى انۋاربەك مۇحتارحانوۆ اتاپ وتكەندەي، بۇگىنگى ۇرپاق اعا بۋىننان ادالدىق، مىقتىلىق، ادامگەرشىلىك، قاراپايىمدىلىق پەن ۇلتجاندىلىق قاسيەتتەردى بويعا ءسىڭىرىپ ءوسۋى كەرەك. «بۇگىن «نۇر وتان» پارتياسى شىعىس قازاقستان وبلىستىق فيليالى اتىنان سىزدەردى مەيراممەن قۇتتىقتايمىز! بۇل كەزدەسۋ مەملەكەتىمىزدىڭ، ەلباسىمىزدىڭ سىزدەرگە دەگەن قامقورلىعىنىڭ ءبىر كورسەتكىشى بولسىن. سىزدەر ءاردايىم ەلدە بولىپ جاتقان ەلەۋلى وقيعالاردىڭ قاسىندا جۇرگەندەرىڭىزدى قالايمىز. سوندىقتان ارقاشان قولداپ، قامقورلىق تانىتاتىن بولامىز»، – دەدى انۋاربەك مۇحتارحانوۆ.

كەزدەسۋ بەيرەسمي تۇردە، داستارقان باسىندا ءوتتى. اعا بۋىن وتكەن كۇننىڭ ەستەلىكتەرىن ەسكە الىپ، ۇسىنىستارىن جەتكىزدى. سولاردىڭ ءبىرى – سايلامحان قاليقىزى كوكپەكتى اۋدانىنان كەلگەن. كوپ جىلدار بويى پارتيانىڭ باستاۋىش ۇيىمىن باسقارىپ كەلگەن. ۇلاعاتتى ارداگەر ۇستاز نۇروتاندىقتارعا اعىلشىن ءتىلىن وقىتۋدا قولعا الىنىپ جاتقان جوبالارعا باعاسىن بەردى. «نۇر وتان» پارتياسىنا ريزامىن. بۇگىن مىنە، ءبىزدى شاقىرىپ، قۇرمەت كورسەتىپ جاتىر. بۇگىنگى كەزدەسۋدە مەن اعىلشىن ءتىلى ماسەلەسىن كوتەردىم. ءبىزدىڭ بالالار مەملەكەتىمىز 30 ەلدىڭ قاتارىنا ەنۋى ءۇشىن اعىلشىن ءتىلىن جەتىك ءبىلۋى ءتيىس. بىراق، قازىرگى تاڭدا مەكتەپتە ول ساباقتىڭ ساعاتى ازايدى. سوندىقتان اعىلشىن ءتىلى كلۋبتارى ءدال ۋاقىتىندا قولعا الىنعان جوبا دەپ بىلەمىن. بۇل باعىتتاعى جۇمىستار جالعاسىپ، ءداستۇرلى بولسا دەگەن اۋدان جاستارىنىڭ تىلەگىن الىپ كەلىپ وتىرمىن»، – دەدى سايلامحان قاليقىزى.

ايتا كەتۋ كەرەك، 2017 جىلدان باستاپ وبلىستىق فيليال 45 564 ازاماتتى قامتي وتىرىپ، 1500 اسا ءىس-شارا ۇيىمداستىردى. ارنايى زەرتتەۋ ناتيجەسىندە الەۋمەتتىك كارتا جاسالىندى. وعان ارداگەرلەر، جالعىزباستى تىل ەڭبەككەرلەرى مەن جالعىزباستى قارتتار كىردى. ولاردىڭ الەۋمەتتىك- تۇرمىستىق جاعدايى زەرتتەلدى. بۇعان قوسا، وڭىردە سوعىس ارداگەرلەرىنىڭ قۇرمەتىنە قويىلعان ەسكەرتكىشتەر مەن مەموريالداردى قالپىنا كەلتىرۋ جۇمىستارى جۇزەگە اسىرىلدى.

«قارتتارىم، امان-ساۋمىسىڭ» اكتسياسى اياسىندا قاريالاردىڭ ۇيلەرىن جيناۋ، تازالاۋ، اۋلالارىن قالپىنا كەلتىرۋ سياقتى الەۋمەتتىك جانە اتاۋلى مەديتسينالىق كومەكتەر بەرىلدى. شارا بارىسىندا بارلىق قوناقتارعا تارتۋ جاسالىپ، سىيلىق-سەرتيفيكاتتارى تابىس ەتىلدى. ايتا كەتۋ كەرەك، اكتسيا وڭىردە ءبىر اي بويى وتەدى. ەستافەتانى اۋداندىق اۋماقتىق فيليالدار قابىل الدى.

سوڭعى جاڭالىقتار