26 تامىز 2015, 09:52 3288 0 مۋلتيمەديا جانىبەك عالىم

300 وقۋشى وقۋ قۇرالدارىن تەگىن الدى

قازاقستان مۇسىلماندارى ءدىني باسقارماسى مەن الماتى ورتالىق مەشىتى جاڭا وقۋ جىلىنا وراي Family Park ساياباعىندا «مەكتەپكە جول» اكتسياسىن ۇيىمداستىردى. يگى ءىس شاراعا باس ءمۇفتي ەرجان قاجى مالعاجىۇلى قاتىسىپ، وقۋشىلارعا وقۋ قۇرالدارىن تابىستادى.

اكتسيا بارىسىندا 300 وقۋشىعا قالام، داپتەر سىندى وقۋ قۇرالدارى بەرىلدى. سونىمەن قاتار، بالالار ءبىر كۇن Family Park ساياباعىنا تەگىن كىرىپ، ويىن-ساۋىق اتتراكتسيوندارىندا ويناۋعا مۇمكىندىك الدى.

«ۇيىمداستىرىلىپ جاتقان ءىس شارانىڭ  باستى ماقساتى از قامتاماسىز ەتىلگەن وتباسىلار مەن كوپبالالى وتباسىلاردان شىققان بالالارعا مەكتەپكە بارار كەزىندە كيىم-كەشەك، اياق-كيىم، كەڭسە تاۋارلارى، وقۋ قۇرالدارىمەن قامتاماسىز ەتىپ دەمەۋ جاساۋ. بۇل «مەكتەپكە جول» اكتسياسى رەسپۋبليكا بويىنشا ءار مەشىتتە جىل سايىن ۇيىمداستىرىلىپ كەلەدى. تەك الماتى قالاسى بويىنشا كەشە «العاباس» مەشىتىندە 150 وقۋشىعا مەكتەپ فورماسى مەن قاجەتتى زاتتار تابىستالدى. بۇل شارا ەلىمىزدىڭ بارلىق ايماقتارىندا الداعى ۋاقىتتا دا جالعاسىن تاباتىن بولادى»، – دەدى باس ءمۇفتي ەرجان قاجى مالعاجىۇلى.

سوڭعى جاڭالىقتار