14 ماۋسىم 2018, 22:52 1328 0 ونەر TURKYSTAN.KZ

«سالەم ساعان، استانا!»

ەلوردانىڭ 20 جىلدىعىنا وراي قازاقستان رەسپۋبليكاسى مادەنيەت جانە سپورت مينيسترلىگىنىڭ ۇيىمداستىرۋىمەن «قازاق­ستان» ورتالىق كونتسەرت زالىندا قازاقستاننىڭ حالىق ءارتىسى، قر مەملەكەتتىك سىيلىعىنىڭ لاۋرەاتى التىنبەك قورازباەۆتىڭ «سالەم ساعان، استانا!» كونتسەرتى جوعارى دارەجەدە ءوتتى.

ا.قورازبايۇلى «التىن قورىمىزدى» قۇندى تۋىندىلارمەن بايىتىپ، سونىمەن قاتار تاريحىمىزعا وراسان زور ءارى باعا جەتپەس ۇلەس قوسىپ كەلە جاتقان ونەر قايراتكەرى. ءانشى-كومپوزيتور جاس ۇرپاقتىڭ بويىنا ۇلتتىق قۇندىلىقتاردى ءسىڭىرىپ، نەبىر ءدۇلدۇل دارىندار مەن دارابوز ساڭلاقتاردىڭ شەبەرلىگىن شىڭداعان. كومەيىنەن بال تامعان ورىنداۋشى ءان ايتقاندا، تاريحىن قوسا ايتىپ، تىڭدارمانداردى ءاننىڭ تۇڭعيىعىنا جەتەلەيدى.

وركەستردىڭ سۇيەمەلدەۋىمەن جاندى داۋىستا وتكەن «سالەم ساعان، استانا!» كونتسەرتىندە مادەنيەت جانە سپورت ءمينيسترى ارىستانبەك مۇحامەديۇلى اق تىلەگىن ءبىلدىرىپ، التىنبەك قورازباەۆقا شاپان جاپتى. قازاق ەستراداسىنىڭ بەلگىلى انشىلەرى – ماقپال ءجۇنىسوۆا، باعدات سامەدينوۆا، «مۋزارت» توبى، توقتار مەن بەيبىت، جۇبانىش جەكسەنۇلى، سايات مەدەۋوۆ، قىدىرالى مەن قاراقات، گۇلنۇر ورازىمبەتوۆا، ءمادينا سادۋاقاسوۆا، ءمولدىر اۋەلبەكوۆا، الما امانجولوۆا، «مەلومەن» توبى، ەرنار ايدار، نۇربولات ابدۋللين، «ايتۇمار» توبى ونەر كورسەتتى.

ەلوردانىڭ تورقالى تويىن اتاپ ءوتۋ التىنبەك قورازباەۆتىڭ كەشىمەن باستالعان  بۇل كونتسەرت استانالىقتار مەن قالا قوناقتارى ءۇشىن تاماشا تارتۋ بولدى.

سوڭعى جاڭالىقتار