11 ماۋسىم 2018, 12:53 963 0 ىشكى ساياسات دينارا مىڭجاسارقىزى

شىۇ-نىڭ ستراتەگيالىق باسىمدىعى نەدە؟

شانحاي ىنتىماقتاستىق ۇيىمىنىڭ ستراتەگيالىق باسىمدىعى ساياسي ديالوگتى نىعايتۋ بولىپ قالا بەرۋى ءتيىس. بۇل تۋرالى بۇگىن قىتايدىڭ تسينداو قالاسىندا شانحاي ىنتىماقتاستىق ۇيىمىنا مۇشە مەملەكەتتەر باسشىلارىنىڭ كەڭەيتىلگەن قۇرامداعى وتىرىسىندا ەلباسى نۇرسۇلتان نازارباەۆ ايتتى، دەپ حابارلايدى قازاقپارات ءتىلشىسى.

«بىرىنشىدەن، شىۇ-نىڭ ستراتەگيالىق باسىمدىعى ساياسي ديالوگتى نىعايتۋ، سەنىم، قاۋىپسىزدىكتى قامتاماسىز ەتۋ جانە ءبىزدىڭ ۇيىم كەڭىستىگىندەگى دامۋدى جالعاستىرا بەرۋ بولىپ قالۋى ءتيىس. وسىعان بايلانىستى ءبىز شىۇ مەملەكەتتەرىمەن ۇزاقمەرزىمدى تاتۋ كورشىلىك، دوستىق جانە ىنتىماقتاستىق تۋرالى قابىلدانعان شارتتى كەزەڭ-كەزەڭىمەن جۇزەگە اسىرۋدى قولدايمىز. بۇل ءبىزدىڭ سەرىكتەستىگىمىزدىڭ نەگىز قۇراۋشى، قۇقىقتىق قۇجاتى. ونسىز باسقا دا العان قويعان ماقساتتارعا قول جەتكىزۋ مۇمكىن ەمەس. بۇگىن ءبىز قول قوياتىن شارتتىڭ ەرەجەلەرىن جۇزەگە اسىرۋ جونىندەگى 2018-2022 جىلدارعا ارنالعان ءىس-قيمىل جوسپارى وسى جولداعى جول كارتاسىنا اينالادى»، - دەدى ەلباسى. ەكىنشىدەن، مەملەكەت باسشىسى ۇيىم ەلدەرى كەڭىستىگىندەگى ءۇش ميلليارد ادامدىق جيىنتىق قۋاتتى شىۇ-نىڭ ەكونوميكالىق ىنىتماقتاستىعىن جانداندىرۋ ءۇشىن قولدانۋ قاجەت. بۇل رەتتە ۇيىم ەلدەرى اراسىنداعى ساۋدا ينۆەستيتسيالىق جوبالاردى ەكىجاقتىدان كوپجاقتى دەڭگەيدەگى كوشىرۋدى قامتاماسىز ەتكەن ءجون. «ءبىز ۇيىم اياسىندا جوبالاردى قارجىلاندىرۋدىڭ بىرلەسكەن جوبالارى مەن تەحنولوگيالىق رەسۋرستاردى شوعىرلاندىرۋدى قولدايمىز. شىۇ-نىڭ بانكارالىق بىرلەستىگى ىسكەرلىك كەڭەسىن جۇمىلدىرىپ، ونىڭ الەۋەتىن تولىقتاي پايدالانۋ قاجەت»، - دەدى نۇرسۇلتان نازارباەۆ. ايتا كەتەيىك، وتىرىسقا قازاقستان پرەزيدەنتى نۇرسۇلتان نازارباەۆ، رەسەي پرەزيدەنتى ۆلاديمير پۋتين، قىرعىز پرەزيدەنتى سوورونباي جەەنبەكوۆ، پاكىستان پرەزيدەنتى مامنۋن حۋسەين، تاجىكستان پرەزيدەنتى ەمومالي راحمون، وزبەكستان پرەزيدەنتى شاۆكات ميرزيەەۆ، ءۇندىستان پرەمەر-ءمينيسترى نارەندرا مودي، شىۇ-عى بايقاۋشى مارتەبەسى بار اۋعانستان پرەزيدەنتى اشراف عاني، بەلارۋس پرەزيدەنتى الەكساندر لۋكاشەنكو، يران پرەزيدەنتى حاسان روۋحاني جانە موڭعوليا پرەزيدەنتى حالتمااگين باتتۋلا جانە بىرقاتار حالىقارالىق ۇيىمنىڭ باسشىلارى قاتىسۋدا. كەڭەيتىلگەن قۇرامداعى وتىرىستان كەيىن ءسامميتتىڭ باستى قۇجاتى تسينداو دەكلاراتسياسى قابىلدانىپ، 20-دان استام قۇجاتقا قول قويىلماق. ونىڭ 17-ءسىن مەملەكەت باسشىلارى راسىمدەيدى.

سوڭعى جاڭالىقتار