5 ماۋسىم 2018, 19:00 1134 0 سىرتقى ساياسات دينارا مىڭجاسارقىزى

پۋتين دونباستى شەشەنستانمەن سالىستىردى

رەسەي پرەزيدەنتى ۆلاديمير پۋتين دونباستاعى سوعىستى شەشەنستانداعى سوعىسپەن سالىستىرىپ، ۋكراينانىڭ شىعىسىنداعى كيكىلجىڭدى شەشۋ ءۇشىن كيەۆ سەپاراتيستەر اۋماعىنا ەرەكشە مارتەبە بەرۋ كەرەك، كەزىندە ماسكەۋ دە شەشەنستان رەسپۋبليكاسىنا وسىنداي مارتەبە بەرگەن دەپ مالىمدەدى.

پۋتين ۆەناعا ساپارى الدىندا اۋستريالىق ORF تەلەكانالىنا سۇقبات بەرىپ، قىرىمدى ۋكرايناعا قايتارۋ مۇمكىندىگىن جوققا شىعاردى. "مۇنداي جاعداي بولۋى مۇمكىن ەمەس", – دەپ مالىمدەدى رەسەيلىك ليدەر. ول سونىمەن بىرگە 2014 جىلى دونباستا قۇلاعان "بوينگ" ۇشاعى اپاتى جايىندا دا پىكىرىن ءبىلدىردى. اپاتتى زەرتتەۋ حالىقارالىق توبى ۇشاقتى رەسەيلىك اۋە كۇشتەرى قۇلاتقان دەگەن توقتامعا كەلگەن.

رەسەيدىڭ ىشكى جاعدايىنا قاتىستى سۇراقتارعا جاۋاپ بەرگەن پۋتين ءوزى باسقارىپ كەلە جاتقان جىلدارى رەسەيدى ​اۆتوريتارلىق مەملەكەتكە اينالدىردى دەگەن پىكىرگە كەلىسپەيتىنىن جەتكىزدى. "بۇل ارينە، ەشقانداي شىندىققا جاناسپايدى. ويتكەنى، ءبىز دەموكراتيالىق مەملەكەتپىز، كونستيتۋتسيا اياسىندا ءومىر سۇرەمىز", – دەدى پۋتين.

ول سونىمەن بىرگە رەسەيدە ءوزى ءومىر بويى باسقارۋ ءۇشىن رەفەرەندۋم وتكىزۋى مۇمكىن دەگەن ماسەلەگە "مەن الىپ-قاشپا پىكىرگە تۇسىنىكتەمە بەرمەيمىن. بۇل رەسەي فەدەراتسياسى پرەزيدەنتىنىڭ دەڭگەيىنە ساي ەمەس", – دەپ مالىمدەدى پۋتين.

ۆلاديمير پۋتين 5 ماۋسىمدا ۆەناعا رەسمي ساپارمەن بارادى.

سوڭعى جاڭالىقتار