2 مامىر 2018, 22:57 1857 0 ءبىلىم دينارا مىڭجاسارقىزى

قىزدار ۋنيۆەرسيتەتىنىڭ عىلىمي جوباسى ۇزدىك دەپ تانىلدى

قازاق مەملەكەتتىك قىزدار پەداگوگيكالىق ۋنيۆەرسيتەتىنىڭ ستۋدەنتتەرىنەن قۇرالعان «يدەال» توبى «جاس تولقىن» ستۋدەنتتىك وليمپياداسىندا «ەڭ كرەاتيۆتى يدەيا» نوميناتسياسى بويىنشا ۇزدىك دەپ تانىلىپ، 1 ميلليون تەڭگە كولەمىندەگى قارجىلاي سىياقىعا يە بولدى، دەپ حابارلايدى وقۋ ورنىنىڭ ءباسپاسوز ورتالىعىنىڭ جەتەكشىسى جاندار اسان.

قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورىنىڭ ۇيىتقى بولۋىمەن وسىمەن ءتورتىنشى رەت ۇيىمداستىرىلىپ وتىرعان عىلىمي جوبالار بايقاۋىنىڭ ماقساتى – قازاقستاندىق ستۋدەنتتەردىڭ شىعارماشىلىق الەۋەتىن ارتتىرۋ جانە جاستاردى عىلىمي كەڭىستىككە ينتەگراتسيالاۋ.

بايقاۋ بارىسىندا ستۋدەنتتەر ءتۇرلى جوبالاردى قازىلار القاسىنىڭ نازارىنا ۇسىندى. ولاردىڭ اراسىندا گۇل ساتاتىن اۆتوماتتار، ەرەكشە قاعاز ستاكاندار،  يننوۆاتسيالىق اۋا تازارتقىشتارعا دەيىن بار.  19-20 ءساۋىر ارالىعىندا وتكەن سايىسقا الماتى، استانا، پاۆلودار، اقتوبە مەن شىعىس قازاقستانداعى جوعارى وقۋ ورىندارىنىڭ بىلىمگەرلەرى قاتىستى.

قىزدار ۋنيۆەرسيتەتىنىڭ اتىنان قاتىسقان «الەۋمەتتانۋ» ماماندىعىنىڭ 4-كۋرس ستۋدەنتى اسەل بەسىمباەۆا، «الەۋمەتتانۋ» ماماندىعىنىڭ 3-كۋرس ستۋدەنتى اينۇر باقىتجانوۆا، «مەملەكەتتىك جانە جەرگىلىكتى باسقارۋ» ماماندىعىنىڭ 3-كۋرس ستۋدەنتى ايجان مامىتوۆا، «ماتەماتيكا» ماماندىعىنىڭ 4-كۋرس ستۋدەنتى ىڭكار المابەك جانە «دەنە شىنىقتىرۋ جانە سپورت» ماماندىعىنىڭ 4-كۋرس ستۋدەنتى ەۆگەنيا ۆاسيلەۆا بارلىق كەزەڭ بويىنشا ۇزدىك دەپ تانىلىپ، جۇلدە قورى 1 ميلليون تەڭگەنى قۇرايتىن سىياقىعا يە بولدى.

– جاستار بولعاننان كەيىن ولاردىڭ ويىنا كوپتەگەن يدەيالار كەلەدى جانە ونى جۇزەگە اسىرۋ ءۇشىن قارجى جاعىنان قولبايلاۋ بولىپ وتىرادى، كوبىنەسە. ەلباسى قورىنىڭ مۇرىندىق بولۋىمەن ۇيىمداستىرىلىپ وتىرعان وسى سياقتى عىلىمي جوبالار بايقاۋى وزىندىك ويى ءھام جوباسى بار جاستارعا قولداۋ كورسەتۋگە كوپ مۇمكىندىك بەرەدى. سايىسقا ەلىمىزدىڭ وڭىرلەرىنەن 40-تان استام ستۋدەنت كەلدى. سونىڭ ىشىندە قىزدار ۋنيۆەرسيتەتىنىڭ بىلىمگەرلەرى وزگەلەردەن وق بويى وزىپ شىعىپ، ۇزدىك اتاندى، – دەيدى توپ جەتەكشىسى، قوعامدىق-گۋمانيتارلىق پاندەر كافەدراسىنىڭ وقىتۋشىسى ريما ساۋىتباەۆا.

سوڭعى جاڭالىقتار