12 ءساۋىر 2018, 21:57 1727 0 قاۋىپسىزدىك انار لەپەسوۆا

تەگىن ساعىز تاراتام دەپ باسى داۋعا قالدى

شىمكەنتتە ساعىزدان ۋلانعان بالالار تۋرالى جالعان اقپارات تاراتۋشىلارعا قاتىستى تەرگەۋ شارالارى جۇرگىزىلۋدە. بۇل تۋرالى بۇگىن قالالىق اكىمدىكتىڭ ءباسپاسوز حاتشىسى ايگەرىم جۇماعۇلوۆا ءمالىم ەتتى، دەپ حابارلايدى  قازاقپارات.

ايگەرىم جۇماعۇلوۆانىڭ سوزىنشە، الەۋمەتتىك جەلىلەردە جانە WhatsApp مەسسەندجەرىندە بالالاردىڭ ۋلانعانى تۋرالى شىندىققا جاناسپايتىن اقپارات تاراعان. اتاپ ايتساق، «قالاداعى مەكتەپتەردە وقۋشىلارعا بەلگىسىز جاستار "بيبو" دەپ اتالاتىن ساعىز تاراتىپ، سالدارىنان بالالار ۋلانعان. وقيعا 1,7,47,80,87-مەكتەپتەردە بولعان. اتا-انالاردى بالالارىنا مۇقيات بولۋعا شاقىرىپ، بوتەن ادامنان ساعىز، تاتتىلەر الماۋدى ەسكەرتكەن. بالالار ەستەرىنەن تانىپ، ەسىرتكىلىك زاتقا ۋلانىپ قالعان، جەدەل جاردەم شاقىرىلدى»، دەگەن ماتىندە حابارلاما تاراپ جاتىر.

وسى حابارلاما تاراعاننان كەيىن وقيعا ورنىنا قالالىق ءبىلىم ءبولىمىنىڭ، وبلىستىق دەنساۋلىق ساقتاۋ باسقارماسىنىڭ باسشىلارى، ىشكى ىستەر قىزمەتكەرلەرىمەن بىرگە اتالعان مەكتەپتەرگە بارعان. الايدا، ول جەرلەردە ۋلانۋ جايتى انىقتالماعان. بارلىق وقۋشى ساباقتارىندا بولعانى، ولاردىڭ اتا-انالارى  بالالارىنىڭ ۋلانباعانىن جەتكىزگەن. قازىر اكىمدىك تاراپىنان جالعان حابارلاما تاراتقاندار انىقتالۋدا. بىراق، ءمالىم ەتىلگەندەي، مەكتەپتەردىڭ اۋلالارىندا "بيبو" ساعىزدارى راسىمەن دە تاراتىلعان.

«ساعىز تاراتقان كومپانيانىڭ ادامدارى انىقتالدى. ولاردىڭ بارلىعى "NURTAU Distribution company" كومپانياسىنىڭ قىزمەتكەرلەرى. كومپانيانىڭ "بيبو" ماركالى ساعىز بەن كامپيتتەرىنە ساي بارلىق سەرتيفيكاتتارى بار. مەكتەپ وقۋشىلارىنا ساعىز تاراتىپ، وزدەرىنىڭ مەرەيتويلارىن اتاپ وتپەك بولعان. قازىر قۇقىق قورعاۋ ورگاندارى تەرگەۋ امالدارىن جۇرگىزۋدە»، - دەيدى ايگەرىم جۇماعۇلوۆا.

 

سوڭعى جاڭالىقتار