21 ناۋرىز 2006, 05:53 513 0 جاڭالىقتار "تۇركىستان" گازەتىنىڭ اۆتورلارى

ءسال كەشىكسەك، كوشتەن قالىپ قويار ەدىك

دامىعان 50 ەلدىڭ قاتارىنا قوسىلۋدىڭ تەتىكتەرى نە؟

ەلباسى تاعىنا نىق وتىرعان كۇنى، دالىرەگىندە حالىق الدىندا انت بەرۋ ءراسىمى كەزىندە يناۋگۋراتسياعا جينالعان شەتەلدىك ليدەرلەر كوزىنشە قازاقستاندى باسەكەگە شىدامدى 50 ەلدىڭ قاتارىنان كورگىسى كەلەتىن ارمانى بار ەكەندىگىن ايتقان ەدى. كەيىننەن حالىققا ارناعان جولداۋىندا بۇل يدەياسىن ناقتىلاي تۇسكەن. دامىعان مەملەكەتتەر قاتارىنا قوسىلۋ ءۇشىن ىسكە قوسىلاتىن تەتىكتەردىڭ ءبارىن ايقىنداعان پرەزيدەنت ۇكىمەتكە ارنايى تاپسىرما بەرگەن. ەكونوميكانىڭ دامۋى شيكىزات فاكتورىمەن عانا ايقىندالاتىن قازاقستان ءۇشىن مۇنداي باستاما اسا قاجەت ەدى.

ۇكىمەت ارنايى باعدارلاما ءتۇزىپ، پارلامەنت الدىندا تالقىعا دا سالدى. قازاقستاننىڭ «ازيا جولبارىستارى» سەكىلدى جوعارى تەحنولوگيالار ورتالىعىنا اينالۋى وسى باعدارلاماعا تىكەلەي بايلانىستى. ويتكەنى، ەلدە زاماناۋي عىلىمي ورتالىقتار حالىقارالىق كومپانيالاردىڭ قاتىسۋىمەن «تەحنولوگيالىق پاركتەر» قۇرىلادى. ءبىز سوزگە تارتقان ساراپشىلار جوعارى تەحنولوگيالى مەملەكەتتەر قاتارىنا، ياعني، باسەكەگە شىدامدى، دامىعان ەلدەر توبىنا قوسىلۋ ءۇشىن الدىمەن قانداي شارالاردى قولعا الۋ قاجەتتىگىن ورتاعا سالعان ەدى.

قۋانىش ايتاحانوۆ، سەناتور:

ەلباسىنىڭ قازاقستاندى دامىعان 50 ەلدىڭ قاتارىنا قوسۋى جايلى باستاماسى ءدال ۋاقىتىندا جاسالىندى. ويتكەنى، بۇل باستاماسا كەشىگەتىن بولسا، ءبىز باسەكەلەستىك قابىلەتىمىزدەن ايرىلىپ، كوشتەن قالىپ قويار ەدىك. قازىرگى كۇنى ءبىزدىڭ دامۋ باعىتىمىز نەگىزىنەن شيكىزات سەكتورىنا تاۋەلدى عوي. مۇنىڭ ۋاقىتشا نارسە ەكەنى بەلگىلى. قازىرگى قارا التىن قورىمىز 40 جىلعا عانا جەتەدى. سوندىقتان، قازىردەن جوعارى تەحنولوگياعا، تەحنيكاعا نازار اۋدارۋىمىز قاجەت. بۇعان دەيىن وسى سالادا ەشبىر جۇمىس اتقارىلعان جوق. ونى مويىنداۋىمىز كەرەك. ەندى ساياساتىمىزدى وزگەرتۋىمىز قاجەت. شەتەلدەگى يننوۆاتسيانى، جاڭا تەحنولوگيالاردى قازاقستانعا تارتىپ، بەيىمدەۋىمىز كەرەك. نەمەسە ونداعى يننوۆاتسيالىق ءوندىرىس كوزدەرىنە ءوز قارجىمىزبەن كىرۋىمىز كەرەك. سوندا عانا الدىڭعى قاتارداعى دامىعان ەلگە اينالامىز. بىراق بۇل ارادا مىنا ءبىر جايتقا نازار اۋدارۋىمىز كەرەك. مىقتى تەحنولوگيالار ەلىنە اينالۋىمىز ءۇشىن ءبىلىمنىڭ ءرولى زور. بىراق بىزدە قازىر مىناداي تەندەنتسيا بايقالىپ وتىر: بۇرىنعى وداق كەزىندە العان ءبىلىم مەن قازىرگى ءبىلىمنىڭ اراسىندا ايىرماشىلىق وتە ۇلكەن. بۇرىن جوعارى ءبىلىمدى ماماندار مول بولاتىن، قازىر ولاردىڭ قاراسى ازايىپ، ءبىلىم دەڭگەيى جىل سايىن تومەندەپ بارادى. وقۋ ورىندارىنداعى وقۋ جۇيەسى دۇرىس ۇيىمداستىرىلماعان. ءتۇپتىڭ تۇبىندە، باسەكەدە ءبىلىمنىڭ جەڭىسكە جەتەتىنىن ەسكەرسەك، وسى ءبىلىم جۇيەسىن قولىمىزعا مىقتاپ الۋىمىز كەرەك.

نەگىزىنەن بۇل باستاما ناعىز ۋاقىتىندا جاسالدى. بۇيتپەسەك، وزىمىزبەن قاتارلاس ەلدەردىڭ دامۋ دەڭگەيىنەن دە قالىپ قويامىز. جوعارى عىلىمي تەحنولوگيالاردى ەنگىزۋدى قولعا الماساق، ەرتەڭگى كۇنى كورشى مەملەكەتتەرگە كىرىپتار بولىپ قالۋىمىز بەك مۇمكىن عوي.

ميحايل تروشيحين، ءماجىلىس دەپۋتاتى:

ۇرپاققا قالدىراتىن ءبىر ءىلىمىمىز بولىپ، عىلىم مەن تەحنولوگياعا جەتىك دارەجەگە جەتۋىمىز كەرەك. قازىرگى مۇنايدان، مەتالدان تۇسەتىن قارجىنى ەلدىڭ جوعارى تەحنولوگيالار ەلىنە اينالۋى ءۇشىن جۇمساۋعا ءتيىسپىز. وزگە مۇمكىندىك بىزدە بولمايدى. مىسالى، جاپونياعا قاراڭىزشى، تۇگى جوق مەملەكەت قالايشا بايىپ كەتكەن! ءوز ءىسىڭنىڭ مامانى بولۋ دەگەن باستامانى ەڭ العا شىعارۋ كەرەك.

بەكسۇلتان تۇتقىشەۆ، سەناتور:

قانداي دا ءبىر باستامانىڭ جۇزەگە اسۋى ءۇشىن ۋاقىت كەرەك. ءارى باستامانىڭ ءوزى كەشەندى تۇردە جۇزەگە اسىرىلعانى دۇرىس. بىزدە ءبىر سالانىڭ ءمۇلت ەتكەن جەرى ءبىراز نارسەنى شەگەرىپ تاستايدى عوي. مىسالى، مۇناي باعاسى ءتۇسىپ كەتسە، ءبىراز قيىندىق تۋى مۇمكىن. تەتىكتەردى جۇزەگە اسىراتىن قارجى وسى سالادان كەلەدى عوي. مۇنداي مىسال بىزدە جەتكىلىكتى. مەتاللۋرگيالىق وبەكتىلەردە ءبىر زاۋىتتىڭ تسەحىندا ورىن العان ءورتتىڭ كەسىرىنەن بۇكىل ءوندىرىستىڭ دەڭگەيى ءتۇسىپ كەتتى. جاڭاعى ايتقانىم، سول سەكىلدى مىسال عوي.

مۇنداي اۋقىمدى باستامانى جۇزەگە اسىراتىن بولعان سوڭ، «بارماق باستى، كوز قىستى» دەگەن سەكىلدى پسيحولوگيادان ارىلۋ كەرەك. پارا الۋ دەگەن جايتتاردان قۇتىلعان ءلازىم. اشىقتىق قاجەت.

ازىرلەگەن گۇلنار مۇقانوۆا

سوڭعى جاڭالىقتار