21 ناۋرىز 2006, 05:48 405 0 جاڭالىقتار "تۇركىستان" گازەتىنىڭ اۆتورلارى

الماتى ۇلكەن وزگەرIستەر الدىندا...

2011 جىلعى ازيا ويىندارىنا دايىندىق، ايماقتىق قارجى ورتالىعىنا اينالۋ مۇمكىندىگى وسىنى تالاپ ەتەدى

الماتى قالاسىن الدا ۇلكەن وزگەرىستەر كۇتىپ تۇر. بۇل قالانىڭ بيىلعى جىلدان باستاپ ايماقتىق قارجى ورتالىعىنا اينالۋ مۇمكىندىگىمەن تىكەلەي بايلانىستى. بۇل ماسەلە ۇكىمەتتىك دەڭگەيدە، كاسىپكەرلەر كونگرەسىندە ءبىراز تالقىعا تۇسكەن بولاتىن.

ال 2011 جىلى الماتىدا قىسقى ازيالىق ويىندار وتەدى. بۇل شارالاردىڭ ءبارى الماتىنى رەسپۋبليكالىق دەڭگەيدەگى قالا دەڭگەيىنەن ەلىمىزدەگى ەڭ ماڭىزدى ستراتەگيالىق ايماقتاردىڭ بىرىنە اينالدىرماق. پرەزيدەنتتىڭ بيىلعى جولداۋىندا الماتى قالاسىنا ايرىقشا ءمان بەرىلۋىنىڭ ءبىر سەبەبى دە وسىندا.

وتكەن اپتادا ەلباسى الماتىنىڭ دامۋ بولاشاعىن سارالاۋ ماقساتىندا قالانىڭ 2020 جىلعا دەيىنگى باس جوسپارىمەن تانىسىپ قايتتى.

الماتى قالاسىنىڭ اكىمى يمانعالي تاسماعامبەتوۆ پرەزيدەنتتى قالانىڭ قۇرىلىس جوسپارىمەن، تۇرعىن ءۇي باعدارلاماسىنىڭ جۇزەگە اسۋ بارىسىمەن تانىستىردى.

قالانىڭ باس جوسپارىنا سايكەس، تولە بي كوشەسى باتىسىندا قالقامان ەلدىمەكەنى ارقىلى رايىمبەك اۋىلىنا دەيىن سوزىلىپ، شىعىسىندا تاۋ ەتەگىنە دەيىن جالعاسادى. اباي داڭعىلى مەن شالياپين كوشەلەرىن دە ۇزارتا ءتۇسۋ جوسپاردا بار. ءال-فارابي مەن روزىباكيەۆ كوشەلەرىنىڭ قيىلىسى Iسكەرلىك ورتالىق دەپ اتالماق. بۇل ماڭدا 40 قاباتتى ءزاۋلىم عيماراتتار تۇرعىزىلاتىن بولادى. ال قالانىڭ ورتالىعىنداعى ۇيلەردىڭ بيىكتىگى 9 قاباتتان، تاۋ جاقتاعى ۇيلەردىڭ بيىكتىگى 6 قاباتتان اسپاۋى كەرەك.

پرەزيدەنت ۇكىمەتكە قىسقى ازيالىق ويىندارعا دايىندىق جۇمىستارىنا كىرىسۋ جونىندە تاپسىرما بەرىپ تە قويعان. ول يمانعالي تاسماعامبەتوۆكە ۇلتتىق وليمپيادالىق كوميتەتپەن تىزە بىرىكتىرە وتىرىپ الماتىدا وليمپيادا وتكىزۋگە لايىقتى سپورت نىساندارىن سالۋ جوسپارىن جاساپ، ۇكىمەتكە وتكىزۋ كەرەكتىگىن ەسكەرتتى. پرەزيدەنتتىڭ ايتۋىنشا، ازيا ويىندارىن وتكىزۋ قازاقستانعا 2014 جىلعى وليمپيادا ويىندارىن وتكىزۋگە تايتالاسۋ مۇمكىندىگىن الىپ بەرۋ كەرەك.

ازىرگە بەلگىلىسى، 2011 جىلعا دەيىن الماتىدا 20 مىڭ كورەرمەنگە لايىقتالعان مۇزدى ساراي، 400 مەترلىك جولاقتى مۇز ستاديونىن سالۋ، شاڭعى جانە بياتلون ستاديوندارىن، جاڭا تاۋ شاڭعىسى بازاسىن، 20 مىڭ كورەرمەنگە لايىقتالعان ك-90 جانە ك-120 ترامپليندەرىن، شانا-بوبسلەي تراسساسىن سالۋ جوسپارلانىپ وتىر. قىسقى ويىندار سپورتتىڭ 14 ءتۇرى بويىنشا وتەدى.

الماتىنىڭ مادەني-ەستەتيكالىق مازمۇنى دا جاقىن بولاشاقتا ۇلكەن وزگەرىسكە ۇشىراماق. سوڭعى جىلدارى بۇل قالادا ويىنحانالاردىڭ ەسەپسىز كوبەيىپ كەتكەندىگى ءباسپاسوز بەتىندە تالاي جازىلدى. بۇل ماسەلەنى «تۇركىستان» گازەتى دە بىرنەشە رەت كوتەرگەن بولاتىن. وسى سىنداردان ناتيجە شىققان سياقتى. بولاشاقتا الماتىداعى ويىنحانالار تۇگەلىمەن قالا سىرتىنا كوشىرىلەتىن بولدى. «ويىنحانا ورتالىعى» الماتىدان 80 شاقىرىم قاشىقتىقتا ورنالاسقان قاپشاعاي قالاسىنا اۋىسادى.

«الماتىنى قارجى ورتالىعىنا عانا ەمەس، تۋريزم ورتالىعىنا اينالدىرۋ دا ماڭىزدى ماقساتتاردىڭ ءبىرى» دەپ اتاپ كورسەتتى پرەزيدەنت. قازاقستانعا كەلىپ-كەتەتىن تۋريستەردىڭ 60 پايىزى مىندەتتى تۇردە الماتى قالاسىنا سوعادى ەكەن. ءتۋريزمدى دامىتۋ ءۇشىن قالاداعى كولىك جۇيەسىن رەتتەۋ كەرەك. مىسالى، مەترونىڭ ءبىرىنشى ساتىسىن پايدالانۋعا بەرىپ، جەر بەتىندە رەلستى كولىك جۇرگىزۋ كەرەك. سونداي-اق ەلباسى الماتى ماقتانىشتارىنىڭ ءبىرى – شىمبۇلاق كۋرورتىنا قاراي ەكولوگيالىق تازا كولىك جۇرگىزۋدى تاپسىردى.

يمانعالي تاسماعامبەتوۆ وتكەن ايدا قالا تۇرعىندارىنىڭ الدىندا ەسەپ بەرۋ بارىسىندا الماتىنىڭ 2020 جىلعا دەيىنگى دامۋ جوسپارىن ۇسىنعان بولاتىن. اكىمنىڭ العا قويعان ماقساتتارىنا كوز جۇگىرتسەك، الماتىنىڭ ەكىنشى تىنىسى اشىلعالى تۇرعانداي. 2005 جىلدان بەرى الماتىدا قالانى كوركەيتۋ باعىتىندا بىرقاتار شارالار اتقارىلدى. «جاقسىنى سوقىر دا كورەدى» دەمەكشى، جاقسى ىستەردىڭ جۇزەگە اسىپ جاتقاندىعىن ايتپاي كەتۋ ورىنسىز. ەندى جوسپارداعى جاقسى وزگەرىستەرگە كوپ ۇزاماي كۋا بولامىز با دەگەن ءۇمىت بىلدىرەمىز.

گۇلبيعاش وماروۆا

سوڭعى جاڭالىقتار