3 ناۋرىز 2018, 10:52 1922 0 وقشانتاي انار لەپەسوۆا

بەكبولات تىلەۋحان: كينوتەاترلار رەپەرتۋارىنىڭ جارتىسىن ۇلتتىق ءونىم قۇراۋى كەرەك

كەشە الماتى قالاسىندا «كينەماتوگرافيا» زاڭ جوباسى تالقىلاندى. ءماجىلىس دەپۋتاتتارى وتاندىق فيلمدەردىڭ كينوتەاترداعى ۇلەسى ەلۋ پايىزدى قۇراۋ كەرەك دەگەن تالاپ قويدى. كينو سالاسىنىڭ ماماندارى، زيالى قاۋىم وكىلدەرى مەن ءماجىلىس دەپۋتاتتارى باس قوسقان جيىندا زاڭدى قابىلداۋ بارىسىندا قاتەلىكتەرگە بوي الدىرماۋ كەرەكتىگى ايتىلدى، دەپ حابارلايدى كتك.

سونداي-اق، دوڭگەلەك ۇستەلدە قۇجاتتا ءورىپ جۇرگەن قاتەلەر، تاريحي فيلمدەرگە بولىنەتىن قاراجاتتىڭ ازدىعى، سىرتتان كەلگەن فيلمدەرگە سالىق سالۋ سىندى ماسەلەلەر قىزۋ تالقىلاندى.

وسى ماسەلەگە وراي، بۇگىن الماتى قالاسىندا ءبىر توپ ءماجىلىس دەپۋتاتتارى، زيالى قاۋىم وكىلدەرى مەن كينو قازانىندا قايناپ جۇرگەن كينوگەرلەر باس قوستى. جينالعاندار وتاندىق كينووندىرىستى رەتتەۋگە، ياكي جەتىلدىرۋگە مۇمكىندىك بەرەتىن تارماقتاردى جان-جاقتى قىزۋ تالقىلادى. كينو كەز كەلگەن مەملەكەتتىڭ مادەنيەت ايناسى بولعاندىقتان زاڭنىڭ كەمشىن تۇستارىن مايشاممەن قاراۋ قاجەت.

“زاڭنىڭ باستىسى ساپالىق تۇردەگى قابىلداۋى. ءار باپتىڭ دەڭگەيلىگىن جوعارىلاۋ. ءوزىمىزدىڭ مەنتاليتەمىزگە، ساياساتىمىزعا قايشىلىق كەلمەۋ ءۇشىن ونى دۇرىس دەڭگەيدە قابىلداۋىمىز كەرەك. سەبەبى، ەرتەڭ ول پايدالانىسقا بارعاننان كەيىن نارازىلىق بولماۋى ءتيىس”، – دەيدى ءماجىلىس دەپۋتاتى باقتيار ماكەن.

زاڭدى دايىنداۋ بارىسىندا رەسەي، فرانتسيا سياقتى مەملەكەتتەردىڭ كينەماتوگرافيا سالاسىنداعى تاجىريبەسى زەرتتەلگەن. وسى ورايدا، دوڭگەلەك ۇستەلدە ءسوز العان ءماجىلىس دەپۋتاتى بەكبولات تىلەۋحان فرانتسۋزداردىڭ گوليۆۋد فيلمدەرىنە سالىق سالۋ جۇيەسىن زاڭعا ەنگىزۋ كەرەكتىگىن ايتتى.

“بىلە بەرسەڭىزدەر، قازىر كورىلىمدەگى ۇلتتىق كينونىڭ ۇلەس مولشەرى ءتورت-اق پايىز. توقسان التى پايىز سىرتتان كەلەتىن كينولار. سول سەبەپتى، بۇكىل رەپەرتۋاردىڭ جارتىسىن ۇلتتىق ونىمگە بەرۋ كەرەكپىز. كەم دەگەندە قىرىق پايىزىن الۋ كەرەك. ولاي بولماسا، قازاق كينوسى قازىر مۇشكىل حالدە”، – دەيدى ءماجىلىس دەپۋتاتى بەكبولات تىلەۋحان.

بىراق، قۇجاتتىڭ ورىسشادان قازاقشاعا اۋدارماسى جازۋشى دۋلات يسابەكوۆتىڭ كوڭىلىنەن شىقپادى. جازۋشى-دراماتۋرگ زاڭ جوباسىنداعى قاتەلەرگە قاتىستى تۇشىمدى جاۋاپ الا الماي جۇرگەنىن جەتكىزدى. سونداي-اق، دۋلات يسابەكوۆتىڭ ايتۋىنشا، تاريحي فيلمدەرگە بولىنگەن قاراجات جەتكىلىكسىز.

“تاريفتىك كوميسسيا باعانى بەكىتكەندە كينونىڭ قۇندىلىعىن ەسەپتەپ بەكىتەتىن بولسا جاقسى بولار ەدى. ايتپەسە، ءبىر-ەكى سەريالدى فيلمدەر، سەريالداردا قالانىڭ ىشىندە تۇسىرىلەتىن فيلممەن سالىستىرعاندا دالادا تاريحي تاقىرىپتارعا تۇسىرىلەتىن اقشالارى سايكەس كەلمەيدى. ول دۇرىس ەمەس”، – دەيدى جازۋشى دۋلات يسابەكوۆ.

دامىعان مەملەكەتتەردىڭ بارلىعىندا دەرلىك بۇل سالا زاڭمەن رەتتەلىپ، جۇيلەنگەن. وسى تۇستا، «كينەماتوگرافيا تۋرالى» زاڭ دا قابىلدانىپ قانا قويماي، بۇگىنگى كينو سالاسىندا كەنجەلەپ تۇرعان ماسەلەلەردى رەتتەۋى ءتيىس.

سوڭعى جاڭالىقتار