2 ناۋرىز 2018, 19:17 1551 0 ءوندىرىس انار لەپەسوۆا

قازاقستان ۆەتنامعا 5 مىڭ توننا بيداي جەتكىزدى

جىل باسىنان بەرى قازاقستاننان ۆەتنامعا 5 مىڭ توننا بيداي جەتكىزىلگەن، دەپ حابارلايدى 24.kz.

ليانيۋنگان قازاق-قىتاي حالىقارالىق لوگيستيكالىق كومپانيانىڭ باس ديرەكتورى ليۋ ءبيننىڭ ايتۋىنشا، قازاقستاندىق ءونىم تەڭىز ارقىلى قالىپتى تاسىمال اينالىمىنا تۇسكەن. ول الداعى ۋاقىتتا قورعاس جانە الاشانكوۋ كەدەندەرىنىڭ جۇك وتكىزۋ قۋاتىن ارتتىرىپ، قىتاي – ەۋروپا باعىتىنداعى تاسىمالعا سەرپىن بەرۋ جوسپارلانىپ وتىرعانىن ايتتى. وسىلايشا ىشكى قۇرلىقتا جاتقان ەلىمىزدىڭ ەكسپورتى تەك كورشى مەملەكەتتەرمەن شەكتەلمەي، الەمنىڭ كەز كەلگەن بۇرىشىنا ءوز ءونىمىن جەتكىزە الاتىن مۇمكىندىككە يە بولىپ وتىر.

قازاقستان ليانيۋنگان تەڭىز پورتى ارقىلى جىل سايىن 150 مىڭ كونتەينەر جۇك وتكىزە الادى. 2020 جىلعا قاراي كونتەينەر سانى 500 مىڭعا جەتەدى. ليانيۋنگان قالاسىنداعى قازاق-قىتاي لوگيستيكالىق تەرمينال 2014 جىلى پرەزيدەنت نۇرسۇلتان نازارباەۆتىڭ باستاماسىمەن قۇرىلعان.

 

"قازاقستان استىعى تيەلگەن كونتەينەرلەردى جاقىندا عانا ۆەتنامعا وتكىزدىك. بۇل جۇمىس ارى قاراي دا جالعاسا بەرەدى. قازاقستاننان تاسىمالداناتىن ونىمدەردىڭ كولەمى مەن تۇرلەرىن ارتتىرۋدى جوسپارلاپ وتىرمىز. تەك بيداي عانا ەمەس، سونىمەن قاتار سيىر جانە تاۋىق ەتتەرىن وڭتۇستىك-شىعىس ازيا ەلدەرىنە، ال كەرى باعىتتا جەمىس-جيدەكتەر تاسىمالداۋ ارقىلى لوگيستيكالىق اينالىم جاساي الامىز. سوندا تاسىمال قۇنى ارزاندايدى، سول ارقىلى ءونىم باعاسى دا قىمبات بولمايدى", - دەيدى ليانيۋنگان قازاق-قىتاي حالىقارالىق لوگيستيكالىق كومپانيانىڭ باس ديرەكتورى ليۋ بين.

سوڭعى جاڭالىقتار