2 ناۋرىز 2018, 19:01 1898 0 وقشانتاي انار لەپەسوۆا

ليۆان ەلشىسى: استانا - ءىش پىستىرارلىق قالا

ليۆان ەلشىسى ۆازكەن كاۆلاكيان قازاقستاننىڭ قىزمەت كورسەتۋ سالاسى تۋرالى پىكىرىمەن ءبولىستى.

قازاقستاننىڭ تۋريزم سالاسىندا وزگە ەلدەرمەن ىنتىماقتاستىعىن كەڭەيتۋگە ارنالعان ديپلوماتيالىق كورپۋس ءۇشىن بريفينگتە سويلەگەن سوزىندە ەلشى ءتۋريزمنىڭ "بيزنەس-سەكترور ەمەس، مادەنيەت" ەكەندىگىن اتاپ ءوتتى.

"سيقىرلى تاياقشانى سەرمەپ قالىپ تۋريزم قۇرۋ مۇمكىن ەمەس. بۇل سەكتوردا جۇمىس ىستەۋ ءۇشىن ادامدار ارنايى دايىندىقتان ءوتۋى كەرەك", — دەدى ليۆان ديپلوماتى.

كاۆلاكيان ايتۋىنشا، ءتۋريزمنىڭ ماڭىزدى اسپەكتىلەرىنىڭ ءبىرى ينفراقۇرىلىم، ورتالىقتار جانە كورىكتى جەرلەر. بۇلاردىڭ كەيبىرى ادامدارعا جاراتقاننىڭ سىيى رەتىندە بەرىلەدى، ال قىزمەت كورسەتۋ سالاسىندا قاجىرلى ەڭبەك كەرەك.

ء"وز باسىم قازاقستاندا تۇرىپ جاتقانىما 10 جىل بولدى. مەيرامحانادا قىزمەت كورسەتەتىن ادامداردىڭ كۇلمەيتىنىن كورىپ شوشىپ كەتكەنمىن. جىميىپ كۇلۋ ادامداردى جاقىن تارتىپ، اڭگىمە-دۇكەن قۇرۋعا يتەرمەلەيدى. تەك كۇلكى تۋرالى عانا ايتىپ تۇرعان جوقپىن، البەتتە. ادامدارمەن سويلەسىپ، قارىم-قاتىناس جاساي ءبىلۋ كەرەك. قىزمەت كورسەتۋ – بۇل مادەنيەت، حالىقپەن جۇمىس ىستەپ، سوعان ۇيرەتۋ قاجەت", — دەدى ەلشى.

ديپلوماتتىڭ ايتۋىنشا، ونسىز تۋريستتەر مەن كليەنتتەردى تارتۋ مۇمكىن ەمەس.

ەلشى قوزعاعان ەكىنشى ماسەلە قازاقستاندا تۇرۋ ءۇشىن قانشا قاراجات كەتەتىنى بولدى.

"كوپتەگەن تۋريست بەس جۇلدىزدى قوناق ۇيدە تۇرمايدى. قوناق ءۇي بيزنەسىن باقىلاپ وتىرعان جوقسىزدار. مىسالى، ەكسپو-2017. ءبىر قوناق ۇيدە تۇنەپ شىعۋ 100 دوللار بولدى، بۇل قوماقتى قاراجات جۇمساۋعا دايىن ەمەس تۋريستەر ءۇشىن جاعا ۇستارلىق جايت، تىم قىمبات باعا", — دەپ ءسوزىن جالعاستىردى كاۆلاكيان.

كەيىن ول استاناداعى ويىن-ساۋىق ورىندارى تۋرالى ءسوز قوزعادى. ەلشىنىڭ ايتۋىنشا، ەلوردا قازاقستاننىڭ ماقتانىشى، سول سەبەپتى شەتەلدىكتەر استانانى ارالاعىسى كەلەدى.

"بىراق استانا ءىش پىستىرارلىق قالا. وكىنىشكە وراي، كوڭىل كوتەرەتىن ورىندار جوق. قايدا بارا الاسىڭ؟ "دۋمان" وكەاناريۋمىنا بارىپ، بايتەرەككە شىعۋعا، مۋزەيلەردى ارالاۋعا بولادى، ءبىتتى. باسقا ەشتەڭە جوق. مەنىڭشە، استاناعا كوبىرەك كوڭىل ءبولىپ، قىزىقتى ەتۋگە تىرىسۋ كەرەك", — دەپ ءسوزىن اياقتادى كاۆلاكيان.

 

سوڭعى جاڭالىقتار