26 قىركۇيەك 2017, 23:45 1620 0 ايماق انار لەپەسوۆا

2018 جىلى باسپانا نارىعىندا قانداي وزگەرىستەر بولادى؟

قر ينۆەستيتسيالار جانە دامۋ مينيسترلىگى كەلەسى جىلى جاڭا تۇرعىن ءۇي نارىعىندا باعا وسپەيدى دەگەن بولجام جاساپ وتىر، دەپ حابارلايدى Sputnik قازاقستان ءتىلشىسى.
ۆيتسە-مينيستر رومان سكلياردىڭ ايتۋىنشا، مەملەكەت تۇرعىن ءۇي قۇرىلىسىن تۇراقتى تۇردە قارجىلاندىرىپ وتىرعاندىقتان جاڭا باسپانالار مەن پايدالانىلىپ جۇرگەن ۇيلەردىڭ قىمباتتاۋىنا جول بەرىلمەدى.
«وڭىرلەردە پاتەردىڭ ءبىر شارشى مەترىنىڭ باعاسى — 140 مىڭ تەڭگە. بۇل نەسيەگە بەرىلەتىن ۇيلەر، ولار كەيىن تۇرعىن ءۇي قۇرىلىس جيناق جۇيەسى ارقىلى ساتىلىمعا شىعارىلادى. ال استانا، الماتى، اتىراۋ جانە اقتاۋ قالالارىندا پاتەردىڭ ءبىر شارشى مەترى 180 مىڭ تەڭگە. 2 جىلدا، ياعني 2015-2016 جىلدارى 19 مىڭ 200 ارزانداتىلعان پاتەردى ءبىز نارىققا شىعاردىق. ال وسى جىلى وسىنداي 15 مىڭ پاتەر ساتىلادى»، — دەدى ول.
بۇدان بولەك، ۆيتسە-مينيستر كەلەسى جىلى ەلىمىزدە 10 ميلليون شارشى مەتر تۇرعىن ءۇي سالىناتىنىن اتاپ ءوتتى.
"نۇرلى جەر" باعدارلاماسى 15 جىلعا ەسەپتەلگەن. وسى ۋاقىت ارالىعىندا ءبىز 1,5 ملن تۇرعىن ءۇي سالۋىمىز قاجەت. تۇرعىن ءۇي نارىعىنداعى باعانى بىرنەشە جىل بويى تۇراقتى ۇستاپ تۇرۋعا مۇمكىندىك تۋدى. ءبىر شارشى مەتردىڭ باعاسى جەكە ۇيلەر مەن پاتەرلەرگە بەلگىلەنگەن. سوندىقتان الداعى ۋاقىتتا باسپانا باعاسى وسەدى دەپ بولجاپ وتىرعان جوقپىز. نەگىزىنەن قۇرىلىس ماتەريالدارى جەرگىلىكتى، سول سەبەپتى ونىڭ باعاسى دا تۇراقتى. وسى ورايدا جاڭا تۇرعىن ءۇي قۇرىلىسى نارىعىندا باعانىڭ وسۋىنە سەبەپ بولاتىن العىشارتتاردى كورىپ تۇرعان جوقپىز»، — دەدى سكليار.
تۇرعىن ءۇي قۇرىلىس جيناق بانكىنىڭ دەرەگىنە سايكەس، قازىرگى تاڭدا پاتەر العىسى كەلەتىن 914 مىڭ سالىمشى بار ەكەن. بانكتەگى قازىرگى 30% جانە 50% كولەمىندەگى جيناق سوماسىن تومەندەتۋ مۇمكىندىگى تۋرالى سۇراققا رومان سكليار ازىرگە ونداي مۇمكىنشىلىك قاراستىرىلمايتىنىن اتاپ ءوتتى.

 

سوڭعى جاڭالىقتار