26 قىركۇيەك 2017, 15:57 1698 0 قوعام دينارا مىڭجاسارقىزى

باسپاناعا مۇقتاجدار جاڭا پورتال ارقىلى پاتەر تاڭداي الادى

«تۇرعىن ءۇي قۇرىلىس جيناق بانكى» اق جاڭا باسپانا.KZ جىلجىمايتىن مۇلىك پورتالىنىڭ تۇساۋىن كەستى، دەپ حابارلايدى قازاقپارات ءتىلشىسى.

ەندى بانك كليەنتتەرى جاڭا پورتال ارقىلى مەملەكەتتىك باعدارلامالار بويىنشا الدىن-الا پاتەر تاڭداي الادى. اقپاراتتىق رەسۋرس تۇرعىن ءۇيدى ءبولۋ پروتسەسىنىڭ اشىق جانە ايقىن بولۋىن قامتاماسىز ەتەدى. پورتال بانك كليەنتتەرىن، قۇرىلىس كومپانيالارىن جانە مەملەكەتتىك ورگانداردى بىرىڭعاي مالىمەتتەر بازاسى بار پلاتفورمادا بىرىكتىرىپ وتىر. «ءبىز سالىمشىنىڭ مەملەكەتتىك باعدارلاماعا قاتىسۋ بارىسىندا ءجۇرىپ وتەتىن جولىن تالداپ-سارالاپ، ول جولدى بارىنشا وڭتايلاندىرۋعا، اۆتوماتتاندىرۋعا تىرىستىق. پورتالدا سالىمشىلار وزدەرى قىزىعۋشىلىق تانىتقان قۇرىلىس نىسانىن تاڭداپ، مەملەكەتتىك باعدارلاماعا قاتىسۋعا ءوتىنىم بەرىپ، تۇرعىن ءۇيدى ءبولىستىرۋ پروتسەدۋراسىنان ءوتىپ، ۇناتقان پاتەرىن تاڭداي الادى. شارشى مەترلەردى ساتۋ پروتسەسى باستان-اياق اشىق جانە ايقىن جۇرەدى»، - دەدى «تۇرعىن ءۇي قۇرىلىس جيناق بانكى» اق باسقارما ءتورايىمى ءلاززات يبراگيموۆا. 2005 جىلدان بەرى «تۇرعىن ءۇي قۇرىلىس جيناق بانكى» تۇرعىن ءۇي قۇرىلىسى سالاسىنداعى رەسپۋبليكانىڭ بارلىق ايماقتارىن قامتيتىن ءىرى مەملەكەتتىك باعدارلامالارعا وپەراتور بولىپ كەلەدى. قازىرگى ۋاقىتتا تۇرعىن ءۇي قۇرىلىس جيناق بانكىندە اشىلعان سالىمدار سانى ميلليونعا جۋىقتاپ قالدى. ال ءاربىر ءۇشىنشى سالىمشى مەملەكەتتىك باعدارلاما اياسىندا باسپانالى بولۋدى جوسپارلاپ وتىر. تەك وسى جىلدىڭ سوڭىنا دەيىن تۇقجب سالىمشىلارى اراسىندا ساۋداعا شىعارۋ ءۇشىن مەملەكەتتىك باعدارلامالار بويىنشا 12 مىڭداي پاتەر پايدالانۋعا بەرىلمەك. جاڭا پورتالدا سالىمشى تۇرعىن ءۇي نىسانىن تاڭداپ، وسى نىساننان پاتەر الۋ ءۇشىن بىردەن ءوتىنىم بەرە الادى. «ياعني ءسىز ءالى دە قاجەت سومانى جيناپ ءجۇرسىز، بىراق، وسىعان قاراماستان، ءدال وسى ساتتە مەملەكەتتىك باعدارلاما اياسىندا العىڭىز كەلگەن ناقتى ءبىر پاتەردى الدىن-الا «برونداپ» قويا الاسىز»، - دەپ ءتۇسىندىردى ءلاززات يبراگيموۆا. بۇگىنگى كۇنى 240 مىڭعا جۋىق بانك كليەنتتەرى «تۇرعىن ءۇي قۇرىلىس جيناق بانكى 24» ينتەرنەت-بانكينگىن پايدالانادى. ەندى وسى ينتەرنەت-بانكينگتىڭ بارلىق قولدانۋشىلارى اۆتوماتتى تۇردە باسپانا.KZ سايتىنىڭ دا قولدانۋشىسى اتاندى. پورتالمەن جۇمىس ىستەۋ ءۇشىن ولارعا ينتەرنەت-بانكينگتەگى جەكە مالىمەتتەرىن پايدالانىپ، سايتقا بىراق رەت كىرۋ جەتكىلىكتى بولماق. جەكەمەنشىك قۇرىلىس كومپانيالارى  وزدەرى سالىپ بىتكەن نەمەسە سالىپ جاتقان  تۇرعىن ءۇيدى تۇقجب سالىمشىلارى اراسىندا ساتۋ ءۇشىن تۇرعىن ءۇي قۇرىلىس جيناق بانكىنە ءوتىنىمدى وسى جاڭا جىلجىمايتىن مۇلىك پورتالى ارقىلى بەرە الادى. ال سالىمشىلار جەكەمەنشىك قۇرىلىس يەسىنىڭ قانداي دا ءبىر نىسانى قانشالىقتى قىزىقتى بولاتىنىن وزدەرى شەشەدى. وسىنىڭ ارقاسىندا قۇرىلىس جۇرگىزۋشى ىقتيمال كليەنتتەرىنىڭ تىلەك-قالاۋى تۋرالى اقپاراتقا جىلدام قول جەتكىزەدى. نىسانعا دەگەن سۇرانىس تومەن بولىپ جاتسا، قۇرىلىس كومپانيالارى قوسىمشا شارالار قولدانىپ، ساتۋ تالاپتارىن جاقسارتا الادى. بانك باسشىلىعى «باسپانا.kz» ارقىلى «ءوز ءۇيىم» سەكىلدى بانكتىڭ جەكە باعدارلامالارى اياسىندا تۇرعىن ءۇي ساتۋدى جوسپارلاپ وتىر.

سوڭعى جاڭالىقتار