15 تامىز 2017, 15:14 3249 0 مۋلتيمەديا اقنيەت وسپانباي

وتاندىق ءونىم 117 ەلگە ەكسپورتتالادى

قر پرەمەر-ءمينيسترى باقىتجان ساعىنتاەۆتىڭ توراعالىعىمەن وتكەن ۇكىمەت وتىرىسى بارىسىندا قر ۇلتتىق ەكونوميكا ءمينيسترى تيمۋر سۇلەيمەنوۆ 2018-2020 جىلدارعا ارنالعان «قازاقستاننىڭ ۇلتتىق ەكسپورتتىق ستراتەگياسىن» جۇزەگە اسىرۋ بويىنشا شارالار جوسپارىن ۇسىندى.

ت. سۇلەيمەنوۆ «قازاقستاننىڭ ۇلتتىق ەكسپورتتىق ستراتەگياسى» مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىنداعى تاپسىرمالارىن ورىنداۋ ءۇشىن ازىرلەنگەنىن، 2015 جىلمەن سالىستىرعاندا، 2025 جىلعا قاراي شيكىزاتتىق ەمەس تاۋارلار ەكسپورتىنىڭ كولەمىن ەكى ەسەگە ارتتىرۋعا باعىتتالعانىن ءتۇسىندىردى.

ءوز كەزەگىندە، ۇكىمەت ازىرلەگەن ونى جۇزەگە اسىرۋ بويىنشا شارالار جوسپارى 2015 جىلعى كورسەتكىشپەن سالىستىرعاندا، 2020 جىلعا قاراي شيكىزاتتىق ەمەس ەكسپورتتى ءبىر جارىم ەسەگە ارتتىرۋعا مۇمكىندىك بەرەدى. بۇگىندە قازاقستاندىق ءونىم الەمنىڭ 117 ەلىنە ەكسپورتتالادى.

وتكەن جىلى قازاقستان الەمدىك ەكسپورت كولەمىنەن 0,23% ۇلەسىمەن 204 ەلدىڭ ىشىندە 52-ءشى ورىنعا يە بولدى. قازاقستاننىڭ ەكسپورتى نەگىزىنەن شيكىزاتتىق ونىمدەر، سونىمەن قاتار وڭدەلۋى تومەن شيكىزاتتىق ەمەس ونىمدەر قۇرايدى. سوڭعى 10 جىل ىشىندە قىزمەت كورسەتۋ ەكسپورتى ەكى ەسەگە دەرلىك ارتىپ، 2016 جىلى $6,3 ملرد قۇرادى.

شيكىزاتتىق ەمەس ەكسپورت كولەمىنىڭ ءوسىمىن قامتاماسىز ەتۋ ءۇشىن باعدارلامادا بىرقاتار مىندەتتەردى كەشەندى شەشۋ ۇسىنىلعان، ونىڭ ىشىندە ەكسپورتشىلاردى قولداۋدىڭ ينستيتۋتتىق نەگىزدەرىن جەتىلدىرۋ بار.

اتاپ ايتقاندا، «قازاقەكسپورت» ۇك-نىڭ ەكسپورتتى قولداۋ جانە دامىتۋ بويىنشا بىرىڭعاي وپەراتورى مارتەبەسىن زاڭ جۇزىندە بەكىتۋ ۇسىنىلادى، ۇلتتىق كومپانيا ەلىمىزدىڭ بارلىق وڭىرلەرىندەگى جانە شەتەلدەردەگى وكىلدىكتەرى ارقىلى «ءبىر تەرەزە» قاعيداتى بويىنشا جۇمىس ىستەيتىن بولادى. بۇدان باسقا، پەرسپەكتيۆالى وتكىزۋ نارىعىن بولۋمەن تاۋارلار مەن كورسەتىلەتىن قىزمەتتەر بويىنشا «ەكسپورتتىق سەبەت» ايقىندالعان. وعان جەتى سالادان 116 تاۋار ەندى. ەكسپورت تۇرعىسىنان، پەرسپەكتيۆالى قىزمەتتەرگە كولىك، تۋريستىك، مەديتسينالىق، ءبىلىم بەرۋ، عارىش، سونىمەن قاتار قارجىلىق جانە ىسكەرلىك قىزمەتتەر جاتادى.

پەرسپەكتيۆالى وتكىزۋ نارىقتارى رەتىندە 27 ەل انىقتالدى، ولار شارتتى تۇردە قازاقستان ءۇشىن ەكسپورتتىق مۇددە دارەجەسى بويىنشا باسىمدىقتى، جوعارى جانە ورتاشا، جانە ۇزاقمەرزىمدى پەرسپەكتيۆادا قىزىعۋشىلىق تۋدىراتىن ەلدەر رەتىندە بولىنگەن.

 

سوڭعى جاڭالىقتار