23 ماۋسىم 2017, 19:16 1559 0 سىرتقى ساياسات دينارا مىڭجاسارقىزى

قىتاي قازاقستان ارقىلى ەۋروپاعا جول اشپاقشى

استانادا قر تۇڭعىش پرەزيدەنتى ەلباسى كىتاپحاناسى مەن قازاقستانداعى قىتاي ەلشىلىگى ۇيىمداستىرعان «ءبىر بەلدەۋ، ءبىر جول» حالىقارالىق دوڭگەلەك ۇستەلى ءوتتى، دەپ حابارلايدى «قازاقپارات» حاا ءتىلشىسى.

دوڭگەلەك ۇستەلدە مامىر ايىندا بەيجىڭدە وتكەن «ءبىر بەلدەۋ، ءبىر جول» حالىقارالىق ىنتىماقتاستىق فورۋمىنىڭ ناتيجەلەرى، ءىرى جوبالاردى جۇزەگە اسىرۋ اياسىنداعى ىقپالداستىق جولدارى تالقىلاندى. جيىنعا اتاقتى ديپلوماتتار مەن ساراپشىلار، ونىڭ ىشىندە قىتاي سىرتقى ىستەر مينيسترلىگى كوپشىلىك ديپلوماتيا جونىندەگى كونسۋلتاتسيالىق كەڭەس مۇشەلەرى، ەلباسى كىتاپحاناسى تالداۋ ورتالىعىنىڭ قىزمەتكەرلەرى، مەملەكەتتىك-جەكەمەنشىك ارىپتەستىك ورتالىعى مەن مەملەكەتتىك ورگانداردىڭ وكىلدەرى كەلدى.   «ءبىر بەلدەۋ، ءبىر جول» باستاماسىنىڭ جەتىستىكتەرى بويىنشا ءوز پىكىرلەرىمەن ءبولىسىپ، باعا بەرۋ ءۇشىن قىتايدىڭ تانىمال ساراپشىلارى ارنايى كەلىپ وتىر. بۇگىنگى ساراپشىلىق قۇرامىمىز باستامانى جەتە تالقىلاۋعا مۇمكىندىك بەرەدى دەگەن ويدامىن. شارانى ۇيىمداستىرۋعا قول ۇشىن سوزعان قازاقستانداعى قحر ەلشىلىگىنە العىس بىلدىرەمىن»، - دەدى ديرەكتورىنىڭ ورىنباسارى تيمۋر شايمەردەنوۆ. «بۇل باستاما - حالىقارالىق ارەنادا تانىمال بولا ءتۇستى. حالىقارالىق قاۋىمداستىق تاراپىنان، حالىقارالىق ساراپشىلاردان بەرىلگەن باعالار از ەمەس. اسىرەسە، قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ باستاماعا بىردەن قولداۋ كورسەتكەن ەدى»، -  دەدى كونسۋلتاتسيالىق كەڭەس مۇشەسى، ۇلىبريتانياداعى قىتايدىڭ بۇرىنعى ەلشىسى ما چجەنگان.

ەلباسى كىتاپحاناسى تالداۋ ورتالىعىنىڭ اعا عىلىمي قىزمەتكەرى قازبەك مايگەلدينوۆ ەكى ەل اراسىنداعى ىنتىماقتاستىقتىڭ دامۋى جونىندە پىكىر ءبىلدىرىپ، قىتايدىڭ نەگىزگى ەۋروپاعا جول اشۋ ەكەنىن باسا ايتتى. «جاقىندا عانا ەلباسى تالداۋ ورتالىعىنىڭ قىزمەتكەرلەرى سيان قالاسىنا بارىپ قايتتىق. سيان قالاسى جىبەك جولىنىڭ تاريحي باستالعان جەرى ەكەنى بارشاعا ايان. ءبىر بەلدەۋ، ءبىر جول تۋرالى ءتۇرلى پىكىرتالاستار وتكىزدىك. سونداعى ءبىزدىڭ تۇسىنگەنىمىز، قىتايدىڭ نەگىزگى ماقساتى - قازاقستاندى جاۋلاپ الۋ ەمەس، ەۋروپاعا جول اشۋ. ياعني، قازاقستاننىڭ ترانزيتتىك الەۋەتى قىتاي ءۇشىن ماڭىزدى بولىپ وتىر. بىرىنشىدەن، قازاقستان ارقىلى ەۋروپاعا جول قىسقارادى، ەكىنشىدەن قىتايدى قازاقستانداعى جاعدايدىڭ تۇراقتىلىعى قىزىقتىرادى. وسى تۇرعىدا قىتايدىڭ نەگىزگى كوزدەگەنى ترانزيتتىك الەۋەت بولسا، ءبىزدىڭ كوزدەگەنىمىز  ءترانزيتتى وتكىزۋ ارقىلى ءوز جەرىمىزدەگى ينفراقۇرىلىمداردى دامىتۋ»، - دەپ ءتۇسىندىردى قازبەك مايگەلدينوۆ.   «ءبىر بەلدەۋ، ءبىر جول» بىرلەسكەن قۇرىلىسى اياسىندا قىتاي 39 ەلمەن جانە حالىقارالىق ۇيىمدارمەن 46 ىنتىماقتاستىق تۋرالى كەلىسىمگە قول قويعان. بۇل كەلىسىمدەر مەملەكەتتەر اراسىنداعى ءوزارا بايلانىس جانە قاتىناس، وندىرىستىك قۋات، ينۆەستيتسيالار، ەكونوميكا جانە ساۋدا، قارجى، عىلىم مەن تەحنيكا، قوعام، مادەنيەت، تەڭىز جانە مۇحيت سالالارىنداعى ىنتىماقتاستىقتى قامتيدى.

سوڭعى جاڭالىقتار